Hibru 9 - mzwDBL

Korowii Tɛnte Dea toma harɛ nɔ ta

¹ Taraken, loɡle fɔo Korowii ne o nɛra fa aa fɔwa la ɡba fa dɔ mmara baa cheɡɛ o ta dɛɛ tomɛ Korowii, dɛ dɔ bela baa dɛ tomɛ Korowii harɛ nɔ ta,

² asɛ o do Korowii Tɛnte Dea la bini. Pateesan teŋe dea la doonyoa, asɛ bɛl ɡe bɔne dea la bini anɛ. Dea la boloɡle la sɔne Boɡoroŋ. A ɡɛ Boɡoroŋ la bɔr belaa kandea da ne teebur, dɛ paanoo baa kpɔa dɛɛ cheɡ Korowii sie la do.

³ Asɛ bela baa dɛ yerɛ Boɡoroŋ Tenten la ɡe do pateesan nɛɛte la habɔɔ.

⁴ Korowii Boɡoroŋ Tenten la bɔr bela la, dɛ suuɡaswɛm kon baa dɛ fuh daawiile a sɔɔh aa soma o bini la lɔ bela. Dɛ Korowii Ne Nɛwɛnyina Fɔo Daka baa kpɔ suuɡaswɛm ɛ o bwara bwa, asɛ o che tɛ ba ne Korowii fɔo la lɔ bela. Dɛ suuɡaswɛm vii la baa kpɔ kondikwaa aa le nyundua baa yera maana do o bini la, ne Arɔn daŋɡbala waa moɡɛ papooni la, ne bwepɛle anɛ la ba fa aa chwerɛ o ne ba fɔobene la mmara fi la do a ta la lɔ Daka la bini.

⁵ Ba kwaa kena kwaa anɛ ane baa dɛ yera Kerobim la chɔŋɛ Daka la ta a paɡri kena tɔ o ta a sie chaɡɛ dɔŋa. Belaa ba laa Korowii bandia dɛɛ kpɔ o nɛra nɛɛ la, aa baɡle kɛŋɔ Korowii jirima lɔ bela. Yaa won dɔ bɔr taraken dɛ baɡle kwaa nɔ waa bwa ka tonɛ.

⁶ Yoo, kenii dea la bini kwaa cheche, asɛ sɔfore la ɛɛ jo o boloɡle la bini tɔperee bwa dɛ kaa ɛ ba toma.

⁷ Dea la bonɛɛte la te la, Sɔfonomoa ɡboo dɛɛ jo o bini. O ɡba kwaraa la, kerabeŋkpoŋ ɡboo wɛɛ jo bela bena bɛlbwa. O ta chal kpoŋaa, waa bela jo. A nee o kaa soŋe o wechɔɡa ne nɛra la wechɔɡa baa ɛa baa wola jemɛ kɛŋɔ ba ɛ wechɔɡa la.

⁸ Korowii Domadɛɛɡe dɛ baɡle yaa waa dɛ le ɡɛ waa nɔ ta kɛŋɔ, dɛ Korowii Tɛnte Dea la ta lole naa, Boɡoroŋ Tenten la ŋwɛnɛ ta pile mɔɔ.

⁹ A ɡɛ waa nɔ cheɡɔ dɛ tɛ fini nɔ. A baɡlɔ kɛŋɔ saraha ɛɛ ne konaatena fuih dɛɛ tɛ Korowii aa won ɡel nɛn baa fuh kwaa la dɛɛ tɛo la tea to.

¹⁰ A ɡɛ waa nɔ bwa ɛ kondiile ne konnyɔɔla ne bwara sarama waa aa ɛ nawee wa. Bwadabii waa a bwa, aa wone ɡel nɛn tea ɛɛ to. Korowiirii kpɔa tɛ o nɛra ásɛ baa teŋɛ a ta dɛ́ ka tel kɛŋɔ o ŋwɛnɛfale la aa bala.

Yeesu chal la wa

¹¹ Taraken te, Yeesu Kristo balɔ dɛ ba ɛ Sɔfonomoa, dɛɛ ɛ wefala aa bala dɛ do wer ya jemɛ a waa taraken nɔ la toma. Korowii Tɛnte Dea waa dɛ ɛ toma o bini la dɔ jirima, dɛ do wer kɛrɛdɛ ɡwaa onɔ la. Nɛwɛnyini laa doo, harɛ bonɔ kon laa.

¹² Yeesu Kristo jo Korowii Boɡoroŋ Tenten la. Waa jo bela la, boohna ne nabie chal laa o kpɔ jo bela. O ɡbaɡba chalee o kpɔ jo bela, dɛ lɛ yaa ta aa wola jaɡaa dɔ bwa. Kerabeŋkpoŋii o jo bela. A ta hiaih kɛŋɔ o jo bela kpa.

¹³ Nɛn waa kah doŋa la, dɛ baa won kpɔ boohna ne nabala chal dɛ naloni tɔɔ kpɔe dɛ́ merɛ o nɛɛ ásɛ dɛ laa doŋa kpɔ o nɛ Korowii peraa,

¹⁴ ɛrɛɛ a ɛ Yeesu Kristo chal aa wola won laa ya doŋa kpɔ ya nɛɛ kohona nɔ? Korowii Domadɛɛɡe waa lole saŋ bɛlbwa aa wola jaɡa dɔe la, on cha Yeesu Kristo o won kpɔ o te kɛŋɔ konaate waa wola kirihiah bɛlbwa dii dɛ ɛ saraha dɛ tɛ Korowii. Yeesu chal ɛɛ laa ya wechɔɡa aa dɛ kaa ya ne seo ta la bwaa kpɔ ya nɛɛ ásɛ ya tea to, ásɛ a waa bɛ yaa hiah kpa, ásɛ ya won tomɛ Korowii waa lole saŋ bɛlbwa la.

¹⁵ Yeesu cheɡɔ tɛ nɛwɛnyini ne Korowii baah ta taraken dɛ fɔwɛ fɔo dɛ tɛ nɛwɛnyini ne Korowii, ásɛ nɛra Korowii aa lee ba ŋɔ ba ɛ o nɛra la won dɔ kwaa waa baɡ ba nyoa la saŋ bɛlbwa dɛɛ la. Baa wonoo dɔa saŋ bɛlbwa dɛɛ la, dɛkalkɛ wechɔɡa ba fa aa dɛ ɛ fɔobene la ta la, Yeesu Kristo aa baa sewɛ la, o bɔ a kem. O sewɔ ásɛ ba wechɔɡa la bɛ won dɔ kpeɡri ba nɛɛ kpa.

¹⁶ Dɛ nɛn chwerɛ ɡɛ aa chɛ kɛ ba di o kapɛrɛ, dɛ o ta sewaa, nɛn aa won di.

¹⁷ Kɛ dɛ o sewɔ te naa, baa wonoo bɔne o kwaa name. Dɛ naate waa chwerɛ tɔn la ta lole te naa, ŋwɛnɛ toole kɛŋɔ nɛn bɔne o laala.

¹⁸ A waa ɡela fɔobene la kwaraa ta la, chal ɛɛ fuɡe mɔɔ baa ɛ o we-ɛɛla la.

¹⁹ Mosis tɔ sie baɡle waa bwa Korowii aa ŋɔa ó nɛra la ɛ dɛ le Korowii Mmara Tɔn bini, mɔɔ dɛ kpɔ nabie ne boohna chale koo nee ta, dɛ kpɔ pee pona aa swɛɛra ne hesɔp ɛ chal ne nee la merɛ Korowii Mmara Tɔn la ne nɛra la bwa nɛ.

²⁰ Waa kpɔa dɛɛ merɛ ba nɛɛ la, o ŋɔ, “Chal nɔɔ ɡela fɔo he ne Korowii aa fɔwa dɛ ŋɔ hɛɛ dɛɛ teŋɛ o Mmarare ta la ta, á ɛ danseɛ kɛŋɔ he sɛoh.”

²¹ Gɛ tentenee o yon ɛ chal la dɛ merɛ Korowii Tɛnte Dea la ne numoli ne koŋkwaare baa dɛ ɛ a ne toma bela la bwa ta.

²² Mmara la ta la, chal nee baa fee doŋa waa ne kwaa kɛrɛdɛ ta. Dɛ chal ta fuɡaa, Korowii aa wechɔɡa kpɔe dɛɛ kɛ.

²³ A ɡɛ kwaa la bwa, dɛ Korowii doa kwaa la chaaree a bwa. Dɛ ɡɛɛ chɛ kɛ ba fee doŋa a ta. Kɛ Korowii doa kwaa la te ɡbaɡba la, kwaa baa kpɔa dɛɛ ɛ saraha dɛɛ fee a doŋa la ɡwaa anɔ.

²⁴ Bela Yeesu Kristo aa joa la, Korowii Boɡoroŋ Tenten nɛwɛnyini aa mao o ɛ Korowii doa kon chaa la ɡbo bini laa o jo. Korowii doa ɡbaɡbaa o la, dɛ ka che Korowii sie ásɛ dɛ won cha yaa taraken.

²⁵ A ta hiaih kɛ o teŋɛ dɛɛ jo Boɡoroŋ Tenten la dɛ́ kpɔ o te ɛ saraha bena bɛlbwa ɡɛ Juu tena Sɔfonomoa aa dɛ jo ba kon ta chal aa wola o ɡbaɡba bwara chal ɛɛ ne la.

²⁶ Dɛ bena bɛlbwaa wɛɛ jo bela dɛ kpɔ o te ɛ saraha aa, bena bɛlbwaa o fe ɛɛ ba wahala nae dɛ kpoŋe le harɛ mumpar ba le fini. Kɛ kerabeŋkpoŋ ɡboo o ba harɛ nɔ ta tɔpere tama waa kaa nɔ ta, dɛ ba kpɔ o te ɛ saraha dɛɛ laa nɛra wechɔɡa kpɔ, waa wola ɡɛɛ ɛ kpa.

²⁷ Kerabeŋkpoŋii nɛwɛnyini bɛlbwa ɛɛ ba sewa, ásɛ a habɔɔ la, Korowii bol o waa dɛ́ pa bole.

²⁸ Gɛɛ ba kpɔ Yeesu Kristo ɡe ɛ saraha kerabeŋkpoŋ, ásɛ o che nɛndamanta wechɔɡa. Wɛɛ berɔɔ ba nɛɛtena ja. Wechɔɡa waa laa wɛɛ ba bala name te. Nɛra baa dɛ kpao siswɛm ne laanee wɛɛ ba ba lɛ.