Hibru 7 - mzwDBL

Sɔfo Mɛlkesɛdɛk

¹ A ɡɛ Mɛlkesɛdɛk nɔ, dɛ Salɛm kooroo on, asɛ o ɛ Nemenɛ Korowii Sɔfo. A saŋ la Abraham aa le laa waa kaa yo dɛ pɔ koranar banaarɛ bane nɛɛ dɛɛ ba la, Mɛlkesɛdɛk chemo dɛ swee andɛɛɡa tɛo.

² Belaa Abraham bɔne kwaa waa dɔa laa la ta bwa bini bɔre fi dɛ kpɔ bɔrbeŋkpoŋ tɛo. Mɛlkesɛdɛk sɔn la munii “Waa aa Toɡra Kooro.” Salɛm ɡe munii “bambisɔɔhna.” Anomanta, dɛ “Bambisɔɔhna Kooroo” on.

³ Mɛlkesɛdɛk ta nya ne mɛɛ dɔe ya jemɛ. O ta lolanar dɔe. O ta lola tɔpere ne sewa tɔpere ɡba dɔe ya jemɛ. O ɛ Sɔfo saŋ bɛlbwa dɛɛ la aa wola jaɡa dɔe kɛŋɔ Korowii Bie la ken.

⁴ He na ɡɛ waa ɛ nɛnjen kenɛ? Ya nabaa Abraham o sɔn aa lea kohona la, o ɡbabir bɔne kwaa waa dɔa o laa ta bwa bini fi dɛ kpɔ bɔrbeŋkpoŋ tɛo.

⁵ Lewi naanar baa ɛ sɔfore la, Mosis Mmara la ŋɔ ba bwɛɛ tena la bɛlbwa ɛɛ bɔne o kwaa bini bɔre fi, dɛ́ kpɔ bɔrbeŋkpoŋ dɛɛ tɛɛ ba. Kɛ Abraham naanaree ba bwa ɡe ɡba.

⁶ Lewi dea laa Mɛlkesɛdɛk le. Kɛ Abraham ɡe bɔne o kwaa bini bɔre fi, dɛ kpɔ bɔrbeŋkpoŋ tɛo, asɛ Mɛlkesɛdɛk swee andɛɛɡa tɛ o kwaraa Korowii aa baɡɔ nyoa la.

⁷ Ya bwa jemɔ kɛŋɔ nomoaa sweera dɛɛ tɛ bechala.

⁸ Lewi luɡe ta sɔfore baa dɛ lɛ kwaa fi bɛlbwa bɔrbeŋkpoŋa la, ba dɛ sewɛ. Mɛlkesɛdɛk te aa lɛa la, Korowii Tɔn baɡlɔ kɛŋɔ o lole saŋ bɛlbwa.

⁹ Lewi luɡe ta sɔforee dɛɛ lɛ kwaa fi bɛlbwa bɔrbeŋkpoŋa. Kɛ yaa wonoo ŋɔ o nabaa Abraham aa bɔne o kwaa bini bɔre fi dɛ kpɔ bɔrbeŋkpoŋ tɛ Mɛlkesɛdɛk la, Lewi ɡba tɛo.

¹⁰ Dɛ ba ta Lewi lolɛ mɔɔ, kɛ yaa wonoo ŋɔ o ta ɛ o nabaa Abraham dwee dɛ ta ɛɛ ba bala a ɡɛ saŋ Mɛlkesɛdɛk aa cheme Abraham la.

Yeesu do kɛŋɔ Mɛlkesɛdɛk

¹¹ Gɛ saŋ Korowii aa tɛ o nɛra Mmara la, ɡɛ saŋee Lewi dea tena pa mun dɛɛ di sɔfore. Dɛ nɛra fe ɛɛ wonoo che saraha Lewi dea sɔfore la fa aa ɛa dɛɛ tɛɛ ba la ta dɛ ɛ nɛndɛɛɡa ka tonaa, a fe ta hiaih kɛŋɔ Sɔfo waa do kɛŋɔ Mɛlkesɛdɛk berɛ ba, dɛ́ ɡel onɔ la waa le Lewi dea dɛ do kɛŋɔ Arɔn.

¹² Dea o tena aa dɛ di sɔfore la, o beraa, a chɛ kɛ mmara la ɡe berɛ.

¹³ A ɡɛ waa nɔ yaa dɛ baɡle nɔ, ya Dɔɔ Yeesu waa yaa bol la. O ɡe dea waa le o ta la korɛ sɔfore dea ta. O dea waa le o ta la te bɛlbwa ta Sɔfo toma ɛɛ bwa.

¹⁴ Nomɛlbwa jemɔ kɛŋɔ Juda deaa o le. Mosis ɡe fa ta bolɛ ŋɔ Juda dea tena dɛ di sɔfore bwa.

¹⁵ Tarakenii waa la bini ta chaah, dɛkalkɛŋɔ Sɔfo bɛl balɔ dɛ do kɛ Mɛlkesɛdɛk ken kati.

¹⁶ Nɛwɛnyini sɔfore dii mmara ta laa a che o ɛ Sɔfo. O mkpa aa wola jaɡa dɔe la kpeɡri taa a che o ɛ Sɔfo.

¹⁷ Maa dɛ ŋɔ nɔ, Korowii Tɔn di danseɛ o waa ŋɔ, “Hɛɛ ɛ Sɔfoo saŋ bɛlbwa dɛɛ la kɛŋɔ Mɛlkesɛdɛk.”

¹⁸ Mmarabene la aa wola kpeɡri ne tɔnɔ bɛlbwa dɔe la waa Korowii laa kpɔ.

¹⁹ A ɡɛ Mosis Mmara nɔ fa ta wone ɡel nɛwɛnyina ɛ nɛndɛɛɡa ka tonɛ. Kɛ taraken te, ya dɔ wefala dɛɛ hwɛɡɛ a ta a ɡwaa ambena la, dɛ che a ta dɛ́ won tuuh dɛɛ tel Korowii.

²⁰ Waa aa bera ja laanee kɛŋɔ Korowii ŋwɛɛra waa ŋwɛɛra la. Ba fa aa dɛ cheɡ Lewi dea sɔfore la, Korowii fa ta ken ŋwɛɛrɛ bwa.

²¹ Yeesu te la, ŋwɛɛraa Korowii ŋwɛɛ dɛ cheɡo Sɔfo. Ba baɡle a waa Korowii Tɔn bini ŋɔ, “N Naa Korowii ŋwɛɛrɔ, waa nyoa bera ba. ‘Hɛɛ ɛ Sɔfoo saŋ bɛlbwa dɛɛ la.’ ”

²² A ɡelɔ Yeesu ɛ ajinamuu te, ásɛ nɛwɛnyina nyiŋi dɛ́ na fɔofale Korowii aa fɔwa dɛ tɛ yaa la wera waa wera dɛ ɡwaa ombene la.

²³ Anɔ la aa jaa laanee kɛŋɔ dɛ Lewi dea sɔfore la dɛ serewe. Anomanta, a ɡelɔ nɛra baa di sɔfore la warɛ.

²⁴ Kɛ Yeesu te, o lole saŋ bɛlbwa. O sɔfore toma la aa berɛ dɛɛ kaa nɛnfale bɛlbwa be bwa.

²⁵ Nomɛlbwa waa cheɡɛ Yeesu nɛɛ dɛ tuuh dɛɛ tel Korowii la, Yeesu ɛɛ lɛo waa wola nyoɡre kpa bwa. O lole saŋ bɛlbwa dɛ soŋe Korowii dɛɛ tɛ nɛwɛnyina.

²⁶ Maɡraa a den maɡre kɛŋɔ yaa dɔ Sɔfonomoa waa do kɛ Yeesu dɛɛ cha yaa. Doŋa bɛlbwa toole o nɛ, o tea too, o ne wechɔɡ-ɛɛra ta pɛɛ. Korowii tɛo nomonome dɛ keeru kaa o be nyundujaɡla.

²⁷ O ta doe kɛŋɔ Lewi dea Sɔfonomonome la baa dɛ ɛ wechɔɡa saraha tɔpere bɛlbwa la. Ba te chɛ kɛ ba tɔ sie ɛ ba ɡbaɡba wechɔɡa saraha mɔɔ dɛ ɛ nɛra la ɡe wechɔɡa saraha. Saraha beŋkpoŋ ɡboo Yeesu ɛ, bɛl ta jae kpa. O kpɔ o te ɡbaɡba ɛ saraha.

²⁸ Baa nyiŋi Mosis Mmara ta dɛɛ kpɔ Sɔfonomonome la, nɛra baa wola wone dɛɛ vɛh wechɔɡa kɛŋɔ nɛwɛnyina bwa aa doa laanee baa kpɔ. Kɛ Mosis Mmara la habɔɔ la, waa Korowii aa bola dɛ ŋwɛɛ o ɡbaɡba la, an ɡela o Bie ɛ Sɔfonomoa. O te vɛh wechɔɡa dɛ do kaih saŋ bɛlbwa dɛɛ la.