Hibru 6 - mzwDBL

¹ Yaa jemɛ Yeesu Kristo weloɡla la nomanta la, siee a chɛ kɛ yaa kaa, dɛɛ la nomonome bini. Yaa berɛ pa mun bol ɡɛ aa chɛ kɛ ya charɛ liire le ya wechɔɡa aa dɛ kaa ya ne seo ta la ta, ne ɡɛ aa chɛ kɛ ya yarada Korowii dɛ kpɔ ya te tɛo waa kpa.

² Yaa berɛ bol Korowii nee sɔe wa, ne nɔɔra kpɔe dɛ dawɛ nɛra nɛ, ne ɡɛ lala bwa aa ba ir seo ta, ne ɡɛ Korowii aa ba bol nɛra waa dɛ́ pa bole dɛ́ bɔ ba ba wechɔɡa kem aa wola jaɡaa dɔ waa kpa.

³ Dɛ Korowii sɛoh waa, yaa ɡel anɔ bwa waa baɡlaa, dɛ́ kaa sie.

⁴ Nɛra baa yarada Korowii waa ka la, ɛrɛɛ bá ɛ dɛ charɛ ba liire dɛ́ le ba wechɔɡa ta dɛ berɛ yaradao jaɔ? Korowii chaah ba sie o waa nɔ ta ka, asɛ ba na Korowii doa koŋkɛɛle la som la bɛl, asɛ dɛ tɛɛ ba o Domadɛɛɡe la ka.

⁵ Ba no Korowii waa la dɛ jemɛ wera aa wera, dɛ dɔ kpeɡri baa dɛ ba dɔe tɔpere waa lɔ sie dɛɛ ba bala la ta ane.

⁶ Anɔ bwa habɔɔ la, ba ɡel Korowii waa ba fa aa dɛ yarada la! A kpeɡri kɛ ba charɛ ba liire dɛ́ le ba wechɔɡa ta dɛ berɛ ba yaradao, dɛkalkɛŋɔ ba kaa ɛ kɛŋɔ baa kwaara kpaa Korowii Bie la dɛɛ pɛl o daɡaɡre ta, dɛ ɡel sihiih kpoo nɛra baah ta. Ba ɛo dawɛ ba nyu ta.

⁷ Harɛ bɛlbwa bwaala aa dɛ nɛ o ta wɛɛ ɛ kondikwaa dɛɛ tɛ nɛra baa dɛ parɔ la, Korowii ɛɛ ɡeloo ó ɛ harɛdɛɛɡe.

⁸ Kɛ dɛ harɛ bɛlbwa le kpɔɡa ne sɔɔhne aa, o ta tɔnɔ dɔe. O cheɡɛ Korowii taahna nyoa. Baa fuuh.

⁹ N dandɛɛɡa, yaa dɛ bol anɔ bwa nɔ, he te la, he wa aa yaa ɡwaŋɛ. Ya jemɔ kɛ he we-ɛɛla ɛɛ do werii a baɡle kɛŋɔ Korowii lɛ heya.

¹⁰ Korowii ta nɛn waa wola waa ɛ aŋwɛnɛ ta ɛɛ, á ba ɛ kɛŋɔ wɛɛ soh he tondɛɛɡa haa dɛ ɛ, ne ɡɛ haa dɛ nyinu dɛ koh a waa cha o nɛra dɛ ta ɛɛ cha ba la waa.

¹¹ Ya dɛ nyin kɛŋɔ he bɛlbwa swɛɛ siwi ɡɛ dɛ́ ka tonɛ, ásɛ dɛ won dɔ kon haa dɛ hwɛɡɛ o ta la.

¹² Yaa nyin kɛ he bwara hwah heya. Ya dɛ nyin he kpɔ nɛra baa lawɛ bambile dɛɛ yarada Korowii, ásɛ o tɛɛ ba kwaa waa baɡ ba nyoa la.

Korowii aa o nyobaɡaa charɛ bwa

¹³ Korowii baɡɛ Abraham nyoa. Waa baɡɔ nyoa la, komɛlbwa aa wola toole dɛ ɡwaalo la, o ɡbaɡbaa o ŋwɛɛ, dɛ ŋɔ,

¹⁴ “N ŋwɛɛrɔ kɛŋɔ mɛɛ sweeree andɛɛɡaa, dɛ́ tɛɛ naanar kohona.”

¹⁵ Abraham ɡe wono lawɛ bambile aaa, dɛ ba dɔ kon Korowii aa baɡɔ nyoa la.

¹⁶ Dɛ nɛn dɛ ba ŋwɛɛra aa, kon waa ɡwaaloo o yon ŋwɛɛ, ásɛ ba jemɛ kɛ kasinteŋii wɛɛ bol, dɛ tɔŋla bɛlbwa teŋo.

¹⁷ Dɛ Korowii dɛ nyin o baɡle nɛra baa dɛ ba kon waa baɡ ba nyoa ŋɔ wɛɛ ɛo tɛɛ ba la kɛŋɔ waa o liire chara ba bwa, a waa o ŋwɛɛ la.

¹⁸ Korowii baɡɛ nyoa dɛ ŋwɛɛ o tenten ja. Webele anɛ nɔ ɡelɔ nyobaɡa la do kpeɡri, dɛkalkɛŋɔ Korowii aa won teŋe nyosone. Anee dɛ do ya nɛra yaa ba Korowii be ŋɔ ó lɛ yaa la ɡbemba, ásɛ ya won do kpeɡri ya hwɛɡa yaa dɛ hwɛɡɛ o nɛɛ la ta.

¹⁹ A ɡɛ hwɛɡa nɔɔ dɛ ɡel ya bambile won che bobeŋkpoŋ, ásɛ ya che kɛrɛdɛ. Hwɛɡa nɔ nomanta, a kaa ɛ kɛŋɔ yaa won jo Korowii Dea la bini tenten, bela pateesan fa aa tɔa nɛmpɛɛne aa wola bela jo la.

²⁰ Yeesu aa ɛ Sɔfonomoa saŋ bɛlbwa dɛɛ la kɛŋɔ Mɛlkesɛdɛk la, o koh ya waa dɛ tɔ sie ya nɛɛ jo bela mɔɔ ya ɡe ba.