Hibru 5 - mzwDBL

¹ Sɔfonomoa bɛlbwa waa dɛ ɛ toma Korowii Dea la, o dɔŋa nɛwɛnyini binii ba yon leo, dɛ kpɔɔ ŋɔ ó ɛ Korowii toma dɛɛ tɛɛ ba, dɛ́ kpɔ jam kwaa dɛɛ tɛ Korowii, dɛ́ kpo kondɛɛra dɛ́ fuah dɛɛ tɛo ba wechɔɡa wa.

² A ɡɛ Sɔfonomoa nɔ ɛɛ wonoo dɛɛ sune nɛra baa wola waa jemɛ dɛɛ koni la nɛ, dɛkalkɛŋɔ o ɡba kwaraa ta kpeɡri dɔe dɛ́ won dɛɛ vɛh wechɔɡa ɛɛ.

³ Gɛ o yon kpo kwaa ɛ saraha dɛɛ tɛ nɛra ba wechɔɡa waa la, ɡɛɛ wɛɛ ba ɛɛ dɛɛ tɛ o tenten, dɛkalkɛŋɔ o ɡba ɡe dɛ ɛ wechɔɡa.

⁴ Sɔfonomoa ɛɛ nɔ ɛ wejena. Nomɛlbwa toole dɛ ɡbaɡba won le o te dɛ ɛ a ɡɛ toma nɔ, nemenɛ Korowii aa leo kɛŋɔ waa le Arɔn o ɛ bɛl la.

⁵ Gɛɛ a do Yeesu Kristo ɡe aa wola o te ɡbaɡba leɛ Sɔfonomoa toma aa ɛ wejena nɔ ta. Korowiirii ŋɔ o be ŋɔ, “N Biee hen, fini n berɛ he Mɛɛ.”

⁶ Korowii bol bobɛl ɡe ŋɔ, “Hɛɛ ɛ Sɔfoo saŋ bɛlbwa dɛɛ la kɛŋɔ Mɛlkesɛdɛk.”

⁷ Yeesu aa lɔ harɛ ta la, dɛ wii ne siniire nee wɛɛ soŋe komɛlbwa dɛɛ le Korowii be. Dɛ Korowii dɔ kpeɡri dɛ leo seo ta. Waa pwɛra dɛɛ no Korowii deŋna waa la nomanta, dɛ Korowii dɛ no o wesoŋa.

⁸ Yeesu ɛ Korowii Bie, kɛ o na wahala, dɛ che a ta dɛ won pwɛr o te dɛ no o Mɛɛ deŋna wa.

⁹ Waa wona teŋɛ o Mɛɛ ŋwɛnɛ ta kɛrɛdɛ ka tonɛ la, o berɛ nɛra baa dɛ teŋɛ o Yeesu ŋwɛnɛ ta bwa Lɛɛ, bá che o nɛɛ dɛ́ dɔ lɛɛ aa wola jaɡa dɔe bwa.

¹⁰ Korowii bol o waa dɛ ɛo Sɔfonomoa kɛŋɔ Mɛlkesɛdɛk fa aa ɛ Sɔfo la.

Habɔɔ bera jae wa

¹¹ Waa yaa dɔa dɛ bol he be dɛ le ɡɛ waa nɔ ta la warɔ, kɛ a bini baɡla kpeɡri, dɛkalkɛŋɔ haa waa mun no.

¹² Haa lea hweli waa nɔ biɡro, a chɛ kɛ saŋ nɔ he fe aa jema dɛɛ baɡle nɛra a wa. Kɛ he ta do kɛ nɛra baa pa mun dɛɛ hweli Korowii wa, asɛ a chɛ kɛ ba le mun ta dɛ́ baɡ ba a wa. A fe aa chɛ kɛ he won dɛɛ di kondikwaa tenten la, elee he ta ɛɛ ɔr.

¹³ Nomɛlbwa o ta aa dɛ ɔr Korowii waa ta la, bechalaa on. Waa waa jemɛ, waa wedɛɛɡa aa dɛ su Korowii siwi jemɛ.

¹⁴ Nomonomee dɛɛ di kondikwaa tenten. Banee ɛ waa biɡri, dɛ jemɛ wedɛɛɡa ne wechɔɡa.