Hibru 4 - mzwDBL

Ona Tɔpere waa ɛ nɛra baa dɛ yarada Korowii kon

¹ Korowii nyoa waa baɡɛ nɛra ona waa ŋɔa bá ba onɛ la ta lole. Anomanta, hé ɡel ya nyiŋi kɛrɛdɛ ásɛ he bɛlbwa bɛ a ɡɛ nyobaɡa la ba paŋɛ.

² Gɛ yaa dɛ no Korowii Amanesoma nɔ, ɡɛɛ ba ɡe noa. Kɛ ba te aa noa la, a ta tɔnɔ leɛ tɛɛ ba, dɛkalkɛŋɔ ba ta an yaradae.

³ Ya te nɔ, ya dɛ yarada Korowii waa la, anomanta, Korowii ɛɛ ɡeloo ya onɛ ona waa dɛ onɛ la bɛl. Ba chwerɛ Korowii Tɔn bini ŋɔ, “N baah aa dia la, n ŋwɛɛrɔ ŋɔ baa ona maa tɛɛ ba ŋɔ bá ba onɛ ɡɛ maa dɛ onɛ la dɔe ba bwa.” A ta baɡlɛ kɛŋɔ ona toole kpa. Gɛ saŋ Korowii aa ta harɛ la, dɛ o ɛ o wobɛlbwa tonɛ dɛ te onɛ.

⁴ Korowii Tɔn bobɛl bol tɔpenuanɛ wee la waa ŋɔ, “Korowii aa tonɛ o toma bwa la, o onɔ tɔpenuanɛ wee la ta,”

⁵ asɛ bela yaa dɛ bol o waa nɔ baɡlɔ kɛŋɔ, “Baa ona maa tɛɛ ba ŋɔ bá ba onɛ ɡɛ maa dɛ onɛ la dɔe ba bwa.”

⁶ A baɡlɔ kɛŋɔ nɛra bane ta lole dɛɛ ba a ɡɛ ona la dɔe. Aa cheɡɛ a saŋ la tena baa no Korowii Amanesoma nɔ deŋnekpeɡ ta asɛ ba paŋɛ Korowii ona la,

⁷ Korowii berɔ kwaa do tɔpefale, dɛ pa o sɔn “fini.” A habɔɔ aa biɡra la, Korowii cheɡɛ Devid nɛɛ dɛ bol ɡɛ tɔpere nɔ wa. Anee n faa bol la. “Dɛ he no Korowii waa fini naa, he bɛ deŋnekpeɡ ɛ.”

⁸ Josua aa ba a saŋ la tena ne ba harɛ ta la, dɛ ba fe dɔ ona Korowii aa bol o waa la aa, Korowii fe ta berɛ bol tɔpefale waa kpa.

⁹ He nyiŋo na naa, ona Korowii aa kwaara cheɡ o nɛra la ta lole bá ba onɛ, kɛŋɔ Korowii aa Ona Tɔpenuanɛ wee la ta la.

¹⁰ Nomɛlbwa waa dɛ onɛ ona Korowii aa dɛ onɛ la, dɛ o onɛ o toma bwa ta kɛŋɔ Korowii aa onɛ o toma ta tɔpenuanɛ wee la ta la.

¹¹ Anomanta, hé ɡel ya swɛɛ siwi dɛ́ dɔ ɡɛ ona la. A ta chɛ kɛ bɛlbwa ɛ a saŋ la tena deŋnekpeɡ la dɔŋ dɛ́ ba paŋɛ ɡɛ ona nɔ.

¹² Korowii waa waa bola do kɛ kon o siwi aa lole, dɛɛ ɛ toma. A nyɛɡre ɡe ɡwaa naŋɡɔse bɛlbwa, hale dɛ́ fe won pere hweera le lileo ta, dɛ́ won jo sema bini, hale dɛ́ fe won pere hoɡa ne fɔɔla baah. A wono dɛɛ jemɛ nɛwɛnyini liire ne o wesɔɔhla bwa.

¹³ Korowii kontaale bɛlbwa toole dɛ́ won kpɔ o te sɔɔh. Wobɛlbwa chɔ baŋ o be wɛɛ nao. Onee dɛ pɛɛ yaa waa bwa yaa baa ɛa harɛ nɔ ta.

Yeesu ɛ Sɔfonomonjen

¹⁴ Ya dɔ Sɔfonomonjen waa wona la Korowii sie tenten. Onee Korowii Bie Yeesu la. Anomanta, hé ɡel ya lawɛ o waa la yaa dɛ yarada la bini kpoŋe kiŋkiŋ.

¹⁵ Ya Sɔfonomonjen yaa dɔa la ta nɛn waa wola ya nɛɛ sune ya ɡwɛɡra nɔ ta ɛɛ. Daahna bɛlbwa soo siwi toole Bɔnsam aa wola on daahnɛ kɛŋɔ waa dɛ daah yaa nɔ. Kɛ o cheɡɔ kiŋkiŋ, o ta wechɔɡa ɛɛ.

¹⁶ Anomanta, hé ɡel ya lɔ bambile dɛ́ tel Korowii waa dɛ sune nɛra nɛɛ dɛɛ cha ba la sie. Wɛɛ na ya sumii dɛɛ cha yaa ɡɛ saŋ aa hiah yaa.