Hibru 3 - mzwDBL

Yeesu ɡwaa Mosis

¹ Anomanta, n bala Korowii nɛra waa le ya ne he bwa tɛ o te, hé ta sie nyiŋi Yeesu na. Korowiirii tomɔ ŋɔ ó ba ɛ ya waa yaa dɛ yarada nɔ Sɔfonomoa.

² O waa dɔ kasinteŋ Korowii waa kpɔɔ ŋɔ ó ɛ o toma la be kɛŋɔ Mosis fa aa dɛ nyiŋi Korowii nɛra nɛɛ o waa dɔ kasinteŋ wobɛlbwa ta la.

³ Nɛn do dem aa, nɛra dɛ kpɛɛro dɛ ɡwaa dem la. Gɛɛ Yeesu ɡe do. A chɛ kɛ ba kpɛɛro ɡwaa Mosis,

⁴ dɛkalkɛ dem bɛlbwa waa ɛ dem la, dɛ nɛnee doo. Korowii ɡee ta komɛlbwa.

⁵ Mosis aa ɛ Korowii bonɔɔ dɛɛ nyiŋi Korowii nɛra waa bwa ta la, dɛ o waa dɔ kasinteŋ taeh, kɛŋɔ bonɔɔ kasinteŋ te wa aa dɔ kasinteŋ o dɔɔ be la. Dɛ o dɛ bol waa Korowii aa ba bol kerekere la nɛra be.

⁶ Kɛ Yeesu Kristo te kasinteŋ waa dɔa la, Korowii Bie on, asɛ o ɛ Korowii nɛra bwa nomoa. Ya yarada yaa dɔa Yeesu Kristo nɛɛ, ne hwɛɡa yaa dɔa ya sie lɛ a ta la, ya lawɛ a bini kpoŋe kiŋkiŋ naa, Yeesu Kristo nɛraa yan.

Nɛra baa vɛh Korowii waa ta teŋa jae

⁷ Anomanta, Korowii Domadɛɛɡe bolɔ ŋɔ, “Dɛ he no Korowii waa fini naa,

⁸ he bɛ deŋnekpeɡ ɛ kɛŋɔ he naawa fa aa ɛ deŋnekpeɡ dɛ vɛh o waa noe dɛ jo o nɛɛ la.

⁹ He naawa bene fifraanaarɛ baa dia kpɔɡ baah la, ba daah mɛ na dɛ na waa maa ɛa bwa.

¹⁰ Anomanta, n baah di ɡɛ nɛra la nɛ, asɛ n ŋɔ ba bambile ta n waa lawɛ bwa, asɛ ba vɛh n waa ta teŋa.

¹¹ N baah aa dia la, n ŋwɛɛrɔ ŋɔ, ‘Baa ona maa tɛɛ ba ŋɔ bá ba onɛ ɡɛ maa dɛ onɛ la dɔe ba bwa.’ ”

¹² Anomanta, yabala, hɛ́ɛ nyiŋi kɛrɛdɛ ásɛ he bini bɛlbwa bɛ liichɔɡa ba dɔ kɛŋɔ waa Korowii waa lole saŋ bɛlbwa laanee yarada, dɛ́ ba vɛh o waa ta teŋa.

¹³ Anomanta, hɛ́ɛ ja dɔŋa tɔperee bwa mɔɔ tɔpere la o Domadɛɛɡe aa bol o waa dɛ ŋɔ “fini” la ɡarɛ, ásɛ wechɔɡa bɛ heyaa ba neɡre, he deŋne ba do kpeɡri.

¹⁴ Gɛ ya yarada aa doa le mumpar la, dɛ ya wono che ɡɛ kiŋkiŋ ka tel wobɛlbwa jaɡa aa, dɛ ya ne Yeesu Kristo pɛo wobɛlbwa ta.

¹⁵ Korowii Tɔn bolɔ ŋɔ, “Dɛ he no Korowii waa fini naa, he bɛ deŋnekpeɡ ɛ kɛŋɔ he naawa fa aa ɛ deŋnekpeɡ dɛ vɛh o waa noe dɛ jo o nɛɛ la.”

¹⁶ Dɛ lepetenaa no Korowii waa dɛ ɛ deŋnekpeɡ dɛ vɛh o waa noe dɛ jo o nɛɛ nɔɔ? Nɛra Mosis aa tɔ ba sie dɛ le Ijipt harɛ la bwaa ɛ deŋnekpeɡ la.

¹⁷ Lepetena nɛɛ Korowii baah di bene fifraanaarɛ nɔɔ? Nɛra baa ɛ wechɔɡa dɛ serewe kpɔɡ baah la, ba nɛɛ o baah di.

¹⁸ Korowii aa ŋwɛɛra ŋɔ baa ona waa tɛɛ ba ŋɔ bá ba onɛ la dɔe ba la, dɛ lepetena bee o ŋɔ ɡɛ nɔɔ? Nɛra baa ɛ deŋnekpeɡ la bee o ŋɔ ɡɛ.

¹⁹ He ta nae kɛŋɔ ba yarada bɛ dɔe waa Korowii aa wola ban ŋwɛnɛ tɛɛ ba dɔ ona waa dɔa tɛɛ ba la aa?