Hibru 2 - mzwDBL

Ya lɛɛ waa do kan

¹ Gɛɛ a do te naa, a chɛ kɛ ya do sie dɛ nyiŋi waa yaa noa la kɛrɛdɛ, ásɛ dɛ bɛ ba koni dɛ́ nyoɡre ŋwɛnɛ.

² Waa Korowii fa aa kpɔa tɛ o nyundua toroma ba bol la ɛo kɛ mmarakpeɡ bɛl. Nomɛlbwa waa wola a ta teŋɛ la, bá tɛr o deŋne ɡɛ aa chɛa.

³ A do ɡɛ naa, ya lɛɛ waa nɔ aa ɡwaa nyundua toroma waa la kohona nɔ, dɛ ya vɛah aa, ɛrɛɛ yaa ba ɛɛ dɛ́ leɔ? Ya Dɔɔ Yeesu ɡbaɡba fa tɔ sie bol ya lɛɛ waa nɔ, asɛ nɛra baa noa ɡe di danseɛ ya be kɛ a ɛ kasinteŋ.

⁴ Korowii ɡbaɡba cheɡɛ nyokpowaa ne wekpeɡa ɛɛ ta, ne o Domadɛɛɡe waa kpɔa bɔne nɛra ɡɛ waa dɛ nyin la ta dɛ di a danseɛ.

Yeesu baa kpɔ nɛwɛnyini bwadabi

⁵ Nɛra baa dɛ ba le doe yaa dɛ bol ba waa nɔ, o ta ban kpɔe do nyundua toroma lɔɡa.

⁶ Ba chwerɛ Korowii Tɔn bini bobɛl ŋɔ, “Korowii, nɛwɛnyini ɡee bɔkwa asɛ hɛɛ lii o waɔ? Nɛwɛnyini ɡee bɔkwa hɛɛ dawɛ o waɔ?

⁷ Tamaa kenii he ɡel nyundua toroma ɡwaalo. He ɡelɔ o dɔ jirima, asɛ komɛlbwa ɛɛ tɛo duure,

⁸ dɛ kpɔ komɛlbwa do o lɔɡa.” Waa kpɔ komɛlbwa do nɛwɛnyini lɔɡa nɔ, a baɡlɔ kɛŋɔ komɛlbwa toole waa wola o kpeɡri dɔe. Kɛ ya ta nae kɛŋɔ kwaa bwa lɔ nɛwɛnyini lɔɡa mɔɔ.

⁹ Kɛ ya dɛ na Yeesu te kɛŋɔ Korowii aa ba o ne harɛ, asɛ nyundua toroma ɡwaalo tama, asɛ waa na wahala dɛ sewɛ la, o tɛo jirima dɛ ɡel komɛlbwa ɛɛ tɛo duure. Korowii alaworomɛɛ o sewɛ tɛ nɛwɛnyini bwa la.

¹⁰ Korowiirii ta komɛlbwa, asɛ a che o kpeɡri ta komɛlbwa ɡe do le. Waa ɡela Yeesu na wahala la, maɡraa a maɡre kɛrɛdɛ. Waa dɛ nyin o lɛ nɛndamanta dɛ ɡel ba ɛ o bii, dɛ do o be dɛ dɔ jirima la waa o ɡel Yeesu waa ɛ ba Sitɔɔ la ɡbaɡba kpɔ a ɡɛ ŋwɛnɛ la ta, dɛ na wahala dɛ won ɛ ba Sitɔdɛɛɡe kaih ka tonɛ dɛ lɛɛ ba la.

¹¹ Yeesuu laa nɛwɛnyini doŋa dɛɛ kpɔ ba nɛɛ dɛ ɡel ba ɛ Korowii nɛra. O ne nɛra waa laa doŋa dɛɛ kpɔ ba nɛɛ la bwa Mɛɛ beŋkpoŋ. A waa aa wola on sihiih ɛ kɛŋɔ o yer ba o nimanar la.

¹² O ŋɔ Korowii be ŋɔ, “Mɛɛ bol he waa haa ɛa n nimanar bee. Mɛɛ kpɛɛree ba chema binii.”

¹³ O toolo berɛ ŋɔ, “Mɛɛ kpɔ n hwɛɡaa do Korowii nɛ.” O berɔ ŋɔ, “N ne bechale Korowii aa tɛ mɛ laanee la.”

¹⁴ Nɛra Yeesu aa dɛ yer ba bechale la, baa ɛ nɛwɛnyina dɛ dɔ bwadabii ne chal nomanta la, o ɡbabir baa berɛ nɛwɛnyini dɛ do kɛ ban, dɛ dɔ bwadabii ne chal. O ɛ ɡɛ, ásɛ dɛ won che o seo waa dɛ ba sewa ta dɛ chɔɡ naate seo aa tɛo kpeɡri nɛra nɛɛ la. Onee Bɔnsam.

¹⁵ Yeesu ɛ ken ásɛ dɛ won lɛ nɛra baa koh seo ɔma waa dɛ ɛ yoma ba soɡa bini bwa la.

¹⁶ Ya jemɔ kɛŋɔ kasinteŋ, nyundua toroma laa o cha nɔ, Abraham naanaree o cha.

¹⁷ Dɛ a chɛ kɛ Yeesu do ɡɛ o nimanar la aa doa ŋwɛnɛ bɛlbwa ta. Gɛɛ ó ɛ dɛ́ won tomɛ Korowii kɛŋɔ ba Sɔfonomoa kasinteŋ ne dɛɛ na ba sum, dɛ́ won dɛɛ soŋe ba wechɔɡa, dɛ́ won dɛɛ kwaa ba ne Korowii baah.

¹⁸ Bɔnsam daahno na dɛ ɛo hɔhɔrɔwa ó fe ɛ wechɔɡa, kɛ o ta on wone. Anomanta, wɛɛ wonoo cha nɛra Bɔnsam aa dɛ daah ba dɛɛ na la.