Hibru 13 - mzwDBL

Waa aa dɛ su Korowii siwi

¹ He nya biirii dɔŋa Yeesu Kristo waa nɔ ta, anomanta, hɛ́ɛ nyin dɔŋa saŋ bɛlbwa.

² He bɛ soh kɛŋɔ a chɛ kɛ hɛɛ lɛ hɔɔhra dɛɛ nyiŋ ba kɛrɛdɛ. Bane ɛ ɡɛ dɛ nyiŋi nyundua toroma, dɛ baa jemɛ.

³ Hɛ́ɛ lii nɛra baa do ba dea waa kɛŋɔ he ne banee ba do dea ken. Hɛ́ɛ lii nɛra baa dɛ ɛɛ ba hɔhɔrɔwa ɡe waa kɛŋɔ he ɡe aa dɛ na weweele la bɛl ken.

⁴ A chɛ kɛ nomɛlbwa kpɔ duure dɛɛ tɛ hahmor, dɛ bɛ nɛmpɛɛne lawɛ dɛɛ chɔ dɛ ka ja ba haahna kɛɛ ba jaranar nɛ. Korowii ɛɛ tɛr nɛra baa dɛ ɛ wedoŋa baa ne haah chɔe be pera dɛɛ nyin ba dɔŋa haahna kɛɛ ba dɔŋa jaranar la deŋnee.

⁵ He bɛ ɡel suuɡa waa swɛɛ he siwi kohona. Hé ɡel anɔ la haa dɔa la maɡre he ne, dɛkalkɛŋɔ Korowii bolɔ ŋɔ, “Maa heyaa ta bwa, maa sie laa kpɔ he nɛɛ bwa.”

⁶ Anomanta, yaa wonoo lɔ bambile ŋɔ, “N Naa Korowii dɛ cha mɛ, anomanta, maa ɔmɛ. Ɛrɛɛ nɛwɛnyini ɛɛ ba wona ɛɛ mɛ nɔ?”

⁷ Hé nyiŋi he nomonome ba fa aa bol Korowii waa dɛɛ baɡle heyaa la. Hé nyiŋi ɡɛ ba fa aa teŋɛ Korowii ŋwɛnɛ ta dɛ ba serewe, dɛɛ yarada Korowii ɡɛ ba fa aa dɛ yaradao la.

⁸ Yeesu Kristo aa beɡre. Gɛ waa doa a saŋ la, ɡɛɛ o ta do fini, ɡɛɛ wɛɛ ba doe saŋ bɛlbwa.

⁹ He bɛ ɡel wefala chɔɡ he liire ásɛ he le Korowii ŋwɛnɛdɛɛɡe la ta. He dɛ nyin he do kpeɡri Korowii nɛɛ teŋa ta naa, hé kpɔ sie dawɛ chae Korowii aa sune nɛra nɛɛ dɛɛ cha ba la ta. He bɛ sie kpɔ dawɛ kondikwaare ane kii ne ane dii ta, dɛkalkɛŋɔ a ta wone cha nɛra baa kpɔ sie dawɛ a ta la.

¹⁰ Juu tena sɔfore baa dɛ ɛ toma Korowii Tɛnte Dea bini la ta ŋwɛnɛ dɔe kɛŋɔ ba di ya saraha kwaa yaa dɛ di la ane.

¹¹ Juu tena Sɔfonomoa dɛ ba chal ne saraha ɛɛ Boɡoroŋ Tenten la aa, o dɛ jo a ne bela dɛ́ kpɔ soŋe o nɛra wechɔɡa. Kondɛɛra la baa ɛ a chal la te la, ba dɛ le a ne dahara dɛ́ ka fuah.

¹² Gɛ tentenee Yeesu ɡe na wahala dɛ sewɛ bwɛjen Jerusalam dahara, asɛ dɛ kpɔ o chal dɛ laa doŋa kpɔ nɛwɛnyina nɛɛ ásɛ ba ɛ Korowii nɛra.

¹³ Anomanta, hé ɡel ya la o be dahara bela, dɛ́ ka puu di o sihiih waa dia la,

¹⁴ dɛkalkɛŋɔ, ya ta bwɛjen dɔe dɛ so o ta saŋ bɛlbwa harɛ bonɔ. Bwɛɛ o ta aa lɔ sie dɛɛ ba la, o taa ya sie dawɛ.

¹⁵ Anomanta, a chɛ kɛ ya che Yeesu nɛɛ dɛ ɛ ya saraha dɛɛ tɛ Korowii saŋ bɛlbwa. Saraha yaa dɛ ba ɛɛ laanee kɛŋɔ yáa dɛɛ kpɛɛroo dɛɛ yerɛ o sɔn.

¹⁶ He bɛ dɔŋa wedɛɛɡa ɛɛ ne dɔŋa chae waa soh, dɛkalkɛŋɔ a ɡɛ waa nɔ ɛ saraha a waa aa dɛ lɛ Korowii sie.

¹⁷ Hɛ́ɛ no nɛra baa dɛ tɔ he sie la nyoa wa, dɛɛ ɛ waa baa ŋɔa hɛ́ɛ ɛ la, dɛkalkɛŋɔ ban dɛɛ nyiŋi heya. Ba dɔ nkontaa dɛ bu Korowii sie dɛ baɡle ɡɛ bwa baa nyiŋi heya. Hɛ́ɛ no ba nyoa wa, ásɛ ba won ɛ toma silɛɛ ne. Dɛ haa ba nyoa waa no aa, baa ɛa tebinichɔɡ nee, aa wola tɔnɔ bɛlbwa lee ba dɛ́ tɛ heya.

¹⁸ Hé soŋe Korowii dɛɛ tɛ yaa. Ya jemɔ kɛŋɔ ya tea bini too, dɛkalkɛŋɔ ya dɛ nyin kɛ yaa ɛ waa aa toɡra saŋ bɛlbwa.

¹⁹ N dɛ soŋe heyaa kohona, ásɛ he soŋe Korowii, ásɛ o ba n ne he be warane.

²⁰ N dɛ soŋe Korowii waa ir ya Dɔɔ Yeesu seo ta la. Ya Dɔɔ Yeesu ɛ Peteɡrejen dɛɛ nyiŋi o peera ta. Seo o ɡbaɡba aa sɛah dɛ sewɛ la, a taa a che asɛ Korowii fɔwɛ fɔo waa wola pura dɔe bwa la.

²¹ Kórowii waa dɛ tɛ bambisɔɔhna la tɛ heyaa dadɛɛɡe aa chɛ kɛ he dɔ, dɛ́ won dɛɛ ɛ o tetoora bwa. Ó che Yeesu Kristo nɛɛ dɛ ɛ waa waa dɛ nyin bwa ya bini. Yeesu Kristo chɛ jam saŋ te bɛlbwa! Aamen.

²² Yabala, n dɛ soŋe heyaa kɛŋɔ he lawɛ bambile, dɛ́ no waa nɔ maa chwera dɛ kpɔ dɛɛ ja heyaa nɔ. He nyiŋo na naa, tɔn nɔ maa chwerɛ heyaa nɔ aa jaŋɛ bɛlbwa.

²³ N dɛ nyin he jemɛ kɛŋɔ ba le ya dɔŋ Timoti dea. O balɔ warane asɛ mɛɛ ba he be naa, n ne wɛɛ bao.

²⁴ Ya dɛ na he nomonome la bwa, ne Korowii nɛra la bwa. Yabala Itali harɛ tena la ɡe dɛ na heya.

²⁵ N Naa Kórowii sune he nɛ, dɛ́ cha he bwa sekwaraa.