Hibru 11 - mzwDBL

Yarada wa

¹ Bɔkwaa yarada ɔ? Yaradaa kɛŋɔ yaa jema kaih kɛŋɔ yaa wonoo dɔ kwaa yaa dɛ tamane a wa, dɛ jemɛ kɛŋɔ kwaa yaa wola an na siwi ne la bwa lole kpela.

² Yarada taa a che Korowii pena a saŋ la tena.

³ Yarada taa a che ya no a mun kɛŋɔ nyoa wobol nee Korowii ta nyundua ne harɛ. Anomanta, nyundua ne harɛ yaa dɛ na nɔ, kwaa baa wola an na nee ba taa.

⁴ Yaradaa Ebel dɔ, asɛ o kwaa waa kpɔa ɛ saraha tɛ Korowii won su siwi, dɛ ɡwaa o dɔɔ Keen kwa, asɛ Korowii lɛa dɛ penao kɛŋɔ o ɛ nɛndɛɛɡe o waa su o siwi. O fe sewɔ, kɛ o yaradae waa yarada Korowii nomanta, waa waa ɛa la chɔɔ ba le fini ba ta ɛɛ bola.

⁵ Yaradaa Enɔk yarada Korowii, asɛ Korowii kpɔɔ kaa o be nyundua, dɛ o ta sewɛ. Ba nyin o bɔr kahonɛ, dɛkalkɛŋɔ dɛ Korowii kpɔɔ kaa nyundua. Ba chwerɛ o waa kɛŋɔ Korowii aa wola on kpɔe kaa o be mɔɔ la, dɛ Korowii sie lɛ o nɛ.

⁶ Nɛn ta yarada dɔe yaa, o waa aa won lɛ Korowii sie. Nomɛlbwa waa ba Korowii be la, a chɛ kɛ o dɔ yarada kɛŋɔ Korowii lole, dɛ́ yarada kɛŋɔ nomɛlbwa waa dɛ nyin o jemɛ Korowii la, Korowii dɛ chao.

⁷ Yarada taa a che Korowii aa kah Nowa waa a ta aa lɔ sie dɛɛ ba bala la, o no, dɛ o ta an nae mɔɔ. O noɔ dɛ kwaa daka o ne o haah ne bii jo o bini, ba ta serewɛ. Nowa te aa yaradaa, asɛ nɛwɛnyina baa kaa la aa wola yaradae la, a ɡelɔ nɛwɛnyina bwa di bolchɔɡe, asɛ dɛ ɡel o ɛ nɛra aa cheɡɛ ba yarada ta, asɛ ba waa su Korowii siwi la bɛl.

⁸ Yarada taa a che Korowii aa le Abraham ŋɔ ó kaa harɛ waa baɡɔ nyoa la ta la, o le dɛ kaa. Waa dɛ kaa la, dɛ waa bela waa dɛ kaa jemɛ.

⁹ Yarada nee o ka so harɛfale Korowii aa baɡɔ nyoa la ta kɛŋɔ hɔɔh ken. Tɛnte deene binii o so kɛŋɔ o bie Aesek ne o ɡe bie Jekɔb Korowii aa baɡɛ ba ɡe a ɡɛ nyoa nɔ tenten la.

¹⁰ Dɛ Abraham dɔ bwɛjen bɛl hwɛɡa. A ɡɛ bwɛɛ la, Korowii ɡbaɡbaa vɔrɔwo, o che kiŋkiŋ. Waa paɡre bwa.

¹¹ Abraham yaradae waa dɛ yarada Korowii la taa a che o won lolɛ dɛ o hwɛɛhrɔ, asɛ o haah Saara ɡe ɛ hambara. Dɛ o jemɔ kɛŋɔ nyoa Korowii aa baɡɔ la, wɛɛ ɛo.

¹² Abraham aa hwɛɛhra waa wola kpeɡe kpa la, o wono lolɛ, asɛ o naanar ɡe ya, dɛ warɛ kɛŋɔ weweela kɛɛ mpo nyoa hɛŋle ken.

¹³ Korowii yaradae taa a ɡɛ nɛra nɔ bwa do dɛ ba serewe, dɛ ba ta waa Korowii aa baɡɛ nyoa la nae siwi ne. Kɛ ba yarada nomanta, ba naa bojaŋ ba sie lɛ kɛŋɔ haa na hɔɔhra bojaŋ baa ba he sie lɛ la. Ba sɛoh kɛŋɔ ba ɛ hɔɔhra harɛ nɔ ta.

¹⁴ Nɛra dɛ bol ken aa, dɛ ba dɛ nyin ba chaɡle kɛŋɔ ba dɛ nyin ba ɡbaɡba harɛ dɛ so.

¹⁵ Dɛ harɛ baa le o ta ba la waa ba fee lii raa, ba fe ɛɛ wonoo berɛ kaa o ta.

¹⁶ Kɛ ɡɛ laa a do. Harɛdɛɛɡe waa wera ɡwaa bela baa lea la waa baa lii. Harɛ waa lɔ nyundua waa baa lii. Anomanta, a ta Korowii sihiih ɛɛ kɛŋɔ baa dɛ yerɔ ba Korowii, dɛkalkɛŋɔ o kwaa bwɛɛ bɛl cheɡ ba.

¹⁷ Yaradaa Abraham yarada Korowii waa o won lawɛ o bie Aesek ŋɔ o dɛ kpɔɔ ɛ saraha dɛ́ tɛ Korowii a ɡɛ saŋ Korowii aa daahno na la. Kɛ Korowii aa ŋɔa ó kpɔ o bibeŋkpoŋ Aesek la ɛ saraha tɛo la, o ta vɛɛh.

¹⁸ Korowii baɡɔ nyoa ŋɔ, “Aesek nɛɛ aa ba cheɡa ásɛ n tɛɛ he naanar la maa baɡɛ nyoa ŋɔ mɛɛ tɛɛ la.”

¹⁹ Dɛ Abraham jemɔ kɛŋɔ hale dɛ Aesek sewɔ kwaraa naa, Korowii dɔ kpeɡri kɛŋɔ ó won iru seo ta. Yaa wonoo ŋɔ sewaa Aesek sewɛ dɛ berɛ ba Abraham nɔn ta ja.

²⁰ Yaradaa Aesek yarada Korowii waa o won swee Jekɔb ne Esɔ andɛɛɡa ba kerekere soɡa bini.

²¹ Jekɔb aa dɛ ba sewa la, o swee andɛɛɡa tɛ Josef bii banɛ la bwa. Dɛ o kpoŋe daŋɡbala dɛ pi o ta dɛɛ duu Korowii. Jekɔb aa dɛ yarada Korowii waa o won ɛ anɔ bwa.

²² Josef aa dɛ ba sewa la, o ŋɔ Israel tena be ŋɔ baa le Ijipt harɛ taa, dɛ baɡle ɡɛ baa kaa o hoɡa ne ka huɡe bwa. Waa dɛ yarada Korowii la waa o won ɛ ɡɛ.

²³ Mosis nya ne o mɛɛ aa lolɔ la, ba kpɔɔ sɔh korobie atoro, dɛkalkɛŋɔ ba nao kɛŋɔ o wer bonɔɔ o bwara do kpeɡri. Ba ta Ijipt kooro mmara waa doa la ɔmɛ. Baa dɛ yarada Korowii waa ba won ɛ ɡɛ.

²⁴ Mosis aa kpeɡa la, o ta sɛɛh ba yerɔ Ijipt kooro bihaah bie. Waa dɛ yarada Korowii waa o won ɛ ɡɛ.

²⁵ O ta sɛɛh ɛ Ijipt tena bodia waa baa lɔ a ta la, dɛkalkɛŋɔ a ɛ wechɔɡa, harɛ bonɔ ɡbo ɡee aa jaɡɛ. O sie lɛ Korowii nɛra la pui dɛ́ na wahala dɛ́ ɡwaa Ijipt tena bodia la.

²⁶ O nyiŋi sihiih waa koh Kristo waa dɛ di la kɛŋɔ a wer o be dɛ ɡwaa kondɔɔhkwaa a fa aa lɔ Ijipt harɛ la, dɛkalkɛŋɔ dɛ o dɛ nyiŋi tɔpere la Korowii aa ba bɔ nɛra bwa kem la ŋwɛnɛ.

²⁷ Waa dɛ yarada Korowii la waa waa wola Ijipt kooro bandia ɔmɛ dɛ le bela, a do kɛŋɔ waa dɛ na Korowii baa wola on na la ken, o ta habɔɔ berɛ.

²⁸ Mosis aa dɛ yarada Korowii waa o pa Galekaa Tɔpejen la dii mun, dɛ ɡel Israel tena ɛ chal lɔ ba ɡbeni, ásɛ Korowii nyundua torome waa dɛ kpoo Ijipt tena bibanloɡla la na dɛ bɛ ba te bibanloɡla kpoo.

²⁹ Korowiirii Israel tena yarada waa Mposwɛm la teŋe anɛ, ásɛ o nenabɔɔ sie hol kɛŋɔ harɛpɛɛ, ba won jo le. Ijipt tena aa ŋɔa ba ɡe le la, mpo la kaa ba ne.

³⁰ Korowiirii Israel tena yarada waa ba bɔ nsara bar Jeriko tɔpera anuanɛ, asɛ danjwɛɛ waa bar bwɛɛ la bwa cheme la kuuɡi.

³¹ Korowiirii hanjwamane Rahab yarada waa o lɛ Israel tena baa baa nyiŋi ba bwɛɛ la sɔh kɛrɛdɛ, Israel tena aa wola on kpoe ja nɛra baa wola Korowii waa noɛ la nɛ.

³² Too, ń baɡle ane ja aa? Maa bɔree dɔ baɡle Gedeɔn, ne Barak, ne Samsen, ne Jɛfta, ne Devid, ne Samoɛl, dɛ Korowii keamere la bwa wa.

³³ A ɡɛ nɛra nɔ bwa yarada Korowii kohona, dɛ che ba yarada ta yo koranar dɛ pɔ ba nɛ, dɛ ɡel nɛra ɛɛ ɛ waa aa toɡra Korowii ŋwɛnɛ ta, asɛ Korowii ɛ waa waa baɡɛ nyoa la ane ba bere saŋ. Ba wono tɔ nyujentena nyoo, a ta wone laɡ ba.

³⁴ Ba wono che nijena baah ta dɛ sɔɔh a nyoa, a ta wone fuuh ba, dɛ won lɛ ba te nɛra baa kpoŋe tokobie dɛɛ nyin ba kpoora nɔn ta. Ba wono dɔ bokpeɡa ɡɛ saŋ baa ɡwɛɡra, dɛ won yo laa kɛrɛdɛ, dɛ won pɔ harɛre ane tena nɛɛ laa ta ba chwaaɡe.

³⁵ Korowii yaradae nomanta, ba wono chum haahna bane nɛra baa serewa. Nɛra bane ɛ ba bini bane ɡe hɔhɔrɔwa kɛŋɔ bá fe vɛh Korowii nɛɛ teŋa, kɛ ba ta ba nyu dɔe waa koɛh dɛ vɛh, ɡɛ aa ɛ ásɛ ba won ba ir seo ta dɛ́ dɔ bodɛɛɡe do.

³⁶ Ba ɛ bane ɡe bahmuɡliwaa dɛ lɔɔ ba chweremi ne, dɛ do kpɛɛ bane ɡe nɔɔra, dɛ do ba dea.

³⁷ Ba foɡre bane bwea dɛ kpoo ba, dɛ kpɔ seradaa teŋni bane bini anɛnɛ, dɛ kpoo bane ɡe tokobie ne. Dɛ booh tɔne ne pee tɔnee bane kpɔ berɛ laala dɛɛ do. Dɛ ba nyao kɛrɛdɛ, asɛ nɛra che ba nɛ, asɛ bane ɡe ɛɛ ba hɔhɔrɔwa aa wola were.

³⁸ Dɛ nɛra baa dɔ harɛ nɔ ta ɡbo liire ta chɛɛ kɛ ba ne a ɡɛ Korowii nɛra baa ɛ nɛnjena nɔ pɛ so. Ba ta soŋnibɔr dɔe, dɛ do pua hɛŋle ɡbo harɛ ne bwea dor dɛɛ ɡaaɡe, dɛɛ so bwebɔɔne ne bɔpɛɛne bini.

³⁹ Nɛra dɛ pena a ɡɛ nɛra nɔ bwa yaradae baa yarada Korowii wa, kɛ ba bɛlbwa ta kon Korowii aa baɡɛ Israel tena nyoa la dɔe.

⁴⁰ Korowii lii waa aa wera cheɡ ya fini nɔ tena, dɛ ŋɔ a ɡɛ nɛra la ɡbo aa won do kaih ka tonɛ, nemenɛ kɛŋɔ ya ne ba bwa aa pɛa dɛ do kaih.