Habakuk 3 - mzwDBL

Habakuk wesoŋa

¹ Korowii keame Habakuk waa waa soŋe Korowii nɔ.

² N Naa Korowii, n no he waa haa ɛa la. He we-ɛɛla nomanta, n cheɡɔ n bwara ɛɛ chel. Berɛ ɛ a ɡɛ wejena la ya saŋ nɔ ta, ásɛ dɛ ɡel ya jemɛ a wa, ásɛ wechɔɡa bɛlbwa yaa ɛ he baah di la, hé sune ya nɛ.

³ N Naa Korowii, he le Teman harɛ ta ba. He ɛ Korowii Haa Do Goroŋ dɛ le Paran Bwejen ta. He jirima tɔ nyundua, asɛ nɛra bwa ɛɛ kpɛɛre harɛ nɔ ta.

⁴ He wer do kɛŋɔ wee aa dɛ le chɔɔbɔr la. He nɔmpaa bini dɛ nyɛɡle al-al ken, belaa he kpeɡri sɔh.

⁵ Weechɔɡa tɔ he sie, asɛ he ŋɔ seo be ŋɔ ó teŋɛ he nɛ.

⁶ He iro che asɛ harɛ jiɡri, he ta sie nyiŋi harɛre nɛra aa, dɛ ba dɛ chel. Bwejena aa lole le saŋ la bwa kuuɡo, asɛ deŋɡarere a ɡe aa lole le saŋ la bwa ɡe bur. He te ŋwɛnɛre ta jaɡa dɔe.

⁷ N na Kusan tena tɛnte deene bini baa ɔmɛ taeh, ɡɛɛ Midian tena ɡe bwara ɛɛ sa ba tɛnte deene bini.

⁸ N Naa Korowii, he baah di neerare nɛɛ kɛɛ? He bandia lɔ nenabɔɔne nɛɛ kɛɛ? Mpo nɛɛ he baah di, ɡɛ saŋ haa soɡe he jaɡre, ne torɔɡore baa vɔrɔwa pɛl a nɛɛ dɛɛ la ka yo nɛra dɛ́ pɔ ba nɛɛ kɛɛ?

⁹ He harɛ he to kpa, dɛɛ nyin he ta he hɛma. He kpɔ bwaala nyɛɡla pere harɛ bini.

¹⁰ Bwejena nae dɛɛ chel, asɛ bwaala nɛ, nee su dɛ palɛ baa kaa dɛɛ do ɡbɔɡa, dɛɛ ta nehɛma kohona.

¹¹ Wee ne korobie cheɡɛ bobeŋkpoŋ nyundua, dɛkalkɛ he dɛ ta he hɛma ne he lampea, aa nyɛɡle al-al ken dɛ baa kaa.

¹² He kpɔ bandia valɛ kpɔ harɛ nɔ ta bwa, dɛ kpɔ bwaawee tɛr harɛ nɔ ta nɛra deŋne kɛŋɔ baa dɛ lɔ mea.

¹³ He leɔ ba kɛŋɔ he ba lɛ he nɛra, ne nɛn haa leo o ɛ kooro. He chɔɡ harɛ baa dɛ ɛ wechɔɡa o ta nomoa, dɛ lɛ o kpeɡri bwa.

¹⁴ He hɛma yaɡɛ o laa sitɔɔ, ɡɛ saŋ o laa tena aa wura ba tɔ ya nɛɛ dɛ lɔ yaa peɡre la. Ba sie lɛɔ kɛŋɔ nɛra baa sɔah dɛɛ fiiɡi nɛŋɡwɛɡra.

¹⁵ He kpɔ he jaɡre ka do mpo ta aa valɛ, dɛɛ vuuɡi nehɛma aa dɛ ta kohona la.

¹⁶ N noɔ asɛ n bambile teŋe, n nyoa kpo a ɡɛ ɡbɔɡa la wa, n bwara yɔrɔ, n nakpale bwa ɛɛ sa. Kɛ n sɔɔh bwara dɛɛ kpa tɔpechɔɡe wee Korowii aa ba tɛr nɛra baa dɛ yo yaa deŋne.

¹⁷ Hale dɛ fiɡ daa ta feɛ, ɡrepo daa ɡe ta nɔnɛ, ɔleve daa ɡe vɛh nɔna, kondikwaa ta ɛɛ, peera toole leɡ bini, asɛ nae ɡe toole a leɡ ta naa,

¹⁸ Korowii nomanta, mɛɛ hɛɡroo, n sie lɛ Korowii waa ɛ n Lɛɛ la nɛ.

¹⁹ Nemenɛ Korowiirii n kpeɡri, o ɡelɔ n nakpale do kɛŋɔ chwae kwaa ken, n won bwejena dor vala. N chwerɛ waa nɔ ka tɛ yela nomoa ó kpɔ o janjela ne kwaa aa do ɡɛ la lɔa.