Habakuk 2 - mzwDBL

¹ Mɛɛ iruu che n jɛŋla doa, dɛ́ nyiŋi dɛ́ no waa Korowii aa dɛ ba n be bola. Dɛ o chaŋ mɛ naa, ń na ɡɛ maa dɛ ba o be bola.

Waa Korowii aa chaŋa

² Ate, Korowii ŋɔ n be ŋɔ, “Chwerɛ waa maa pili a bini baɡle chaahna ta la dawɛ bwepɛle ta, ɡɛ baa dɛ ba wona naa dɛ́ kure.

³ Tɔpere bɛl ta dɛ ba ásɛ waa maa pili a bini baɡle la tel. A dɛ baɡle ɡɛ waa bwa jaɡa saŋ aa dɛ ba doe. A ɛ kasinteŋ. Hale a biɡro kwaraa naa, hé so kpaa. Kasinteŋ, aa bao. Aa biɡri bɛlbwa.

⁴ Wepila laanee nɔ, Babelɔn tena baa ɛ nyubinikpeɡ tena aa ba nyuu dɔ, kɛ naate o waa aa toɡra dɛɛ su Korowii siwi la, wɛɛ yaradao dɛ́ dɔ o nyu.

⁵ Kondɔɔh neɡre Babelɔn tena dɛ ɡel ba nyoɡre. Ba ɛ kafonyine, ba siwi aa kwaa su bwa. Ba jenu dɛɛ ɛ sikpeɡ kɛŋɔ seo waa wola vaɡɛ bwa la. A waa ba teŋɛ dɛɛ pɔ harɛre nɛra nɛ, dɛɛ laɡ ba laa ta.

⁶ Nɛra Babelɔn tena aa pɔ ba nɛɛ la ɛɛ mam baa dɛ́ ŋɔ, ‘Hé bwɛɛlɛ, kɛ haa cheɡ kwaa aa wola he kwaa ɛɛ, dɛ kpɔ nɛnfaah kwaa ɛ kondɔɔh nɔ. Saŋ besoo hɛɛ ba ɡɛ waa nɔ ɛɛ ka jaɡɔɔ?’

⁷ Nɛra baa di he kema la dɛ ba ira kerabeŋkpoŋ, dɛ́ do heyaa sibeɡra he bwara ɛɛ sa. A ba ɡɛ naa, baa pa he laala kpeɡri nee.

⁸ He pa harɛre nɛra kondɔɔh bwa, ɡɛɛ nɛra baa kaa la ɡe ɛɛ ba hé kondɔɔh pae. Nɛra haa kpoora dɛ fuɡe ba chale ta kohona, ne chɔɡa haa chɔɡ harɛre ne bwɛɛre ne nɛra baa soɡe a ta la nomanta, ɡɛɛ baa ba he ɡe ɛɛ.

⁹ Nomɛlbwa waa cheɡɛ ŋwɛnɛchɔɡe ta dɛɛ nyin kondɔɔh dɛ́ tɛ o nɛra, dɛɛ nyin bodɛɛɡe dɛ́ so, ásɛ nomɛlbwa bɛ won tel o be dɛ́ chɔɡo la, ó bwɛɛlɛ.

¹⁰ He vɔrɔwɔ dɛ chɔɡ harɛre nɛra kohona, dɛ ɡel sihiih kpo he ɡbaɡba dem tena, dɛ berɛ ba waane ba dawɛ he nɛ.

¹¹ Bwea haa kpɔa ma dea la ɛɛ do lɔŋɔree kɛŋɔ nɛra ken, ásɛ doli haa kpɔa tɔɔ la ɡe sɛh.

¹² Nomɛlbwa waa cheɡɛ nɛŋkpoa kɛɛ wechɔɡa ta dɛ vɔrɔwe bwɛjen la, ó bwɛɛlɛ.

¹³ Koranar Bwa Kooro ɛa kɛŋɔ harɛre nɛra toma baa ɛa dɛ koh la bwa dɛ ba fuih. A bwa ɛ koeh pɛɛpɛɛ.

¹⁴ Gɛ nee aa su mpo ta la, ɡɛɛ nɛra baa lɔ harɛ nɔ ta ɛɛ ba Korowii kpeɡri ne o jirima kohona jema.

¹⁵ Babelɔn tena, he bwɛɛlɛ! He tɛ he bala sen ba nyɔ dɛɛ, dɛ chɔ mumɡbal dɛ di sihiih.

¹⁶ Jirima he fe aa dɔ la ɛɛ berɛ sihiih. He saŋ telo name, hé nyɔ dɛ́ chɔ mumɡbal! Korowii ɛɛ ɡeloo he ɡbaɡba nyɔ o danana nee aa su numol, ásɛ ncho dii tɔ jirima he fe aa dɔ la ta.

¹⁷ Gɛ haa teŋe Lɛbanɔn harɛ ta daa la, ɡɛɛ Korowii ɛɛ ba he ɡe chɔɡa. Gɛ haa kpo kpɔɡ bini ola la, ɡɛɛ hɛɛ ba a waa nae. He kpoo nɛra dɛ fuɡe ba chal ta harɛ la ta, he chɔɡ harɛre ne bwɛjena ne a nɛra bwa.

¹⁸ Bɔkwa tɔnɔɔ voɡ nɛwɛnyini aa kpɔ nɔn sɛoh la dɔɔ? O waa bwa ɛ nyosone. Nɛn waa kwaaro la dɔ yarada o ta. O dɛ kwaa voɡa aa wola won waa bol.

¹⁹ Nɛn waa ŋɔ dakpul be ŋɔ ó dɔ mkpa, kɛɛ dɛ ŋɔ bwe waa wola hweera dɔe be ŋɔ ó ir la, ó bwɛɛlɛ! Wɛɛ won baɡle wa aa? Suuɡaswɛm ne suuɡapoŋee ba kpɔ fɔɡle o bwa, o ta hweera bɛlbwa dɔe.

²⁰ Korowii lɔ o Dea waa do ɡoroŋ bini. Nɛra haa lɔ harɛ nɔ ta, hé bwa hel o sie.”