Habakuk 1 - mzwDBL

¹ Waa Korowii aa pila baɡle o keame Habakuk chaahna ta laanee nɔ.

Habakuk wenaɡra

² “N Naa Korowii, kera aŋwɛnɛɛ ń yerɛ ŋɔ hé cha mɛ mɔɔ he no, kɛɛ dɛ lɛɛ mɛ le naɡrenyine we-ɛɛla ta nɔ?

³ Ɛrɛɛ he ɡel mɛɛ na we-ɛɛla aa wola toɡrɛ ɡbo nɔɔ? Ɛrɛɛ he laa sie kpɔ nɛra nɛɛ baa ɛ wechɔɡa nɔɔ? Kwaa chɔɡa ne naɡrenyin we-ɛɛlaa chɔ n sie. Yoi ne nyopɛo bɛ dɔe bar mɛ cheme.

⁴ Mmara bɛlbwa toole dɛɛ di nɛn, anomanta, kasinteŋ toole kpa. Nɛnchɔɡa dɛ tɔ nɛndɛɛɡa ŋwɛnɛ, dɛɛ berɛ waa aa ɛ kasinteŋ sie.”

Waa Korowii aa chaŋa

⁵ Ate, Korowii bol o nɛra be ŋɔ, “Hɛ́ɛ nyiŋi harɛre nɛra baa bar heya cheme dɛ́ɛ pese ba. Hɛ́ɛ na waane ba binii a ɛ heyaa nyokpoa kohona. N dɛ ba waane ɛɛ he saŋ nɔ ta, háa wola lii kɛŋɔ aa bao. Dɛ ba bol he be ka kwaraa naa, haa yarada.

⁶ N dɛ ba Babelɔn tena baa do ɔma, ba sie ɡe do kpeɡri, kpeɡri tɛɛ, ásɛ ba laa tena wur kaa harɛ nɔ ta bobɛlbwa, dɛ́ ka yo nɛra dɛ́ lɛ ba sobɔra aa wola ba kwaa ɛɛ bwa dɔɔh.

⁷ Ba waa dɔ ɔmee ne hundam, ba ɡbaɡba mmara taa baa teŋɛ, baa nomɛlbwa waa no.

⁸ Ba jaɡre ɡbaŋre ɡwaa nonietena, dɛ do ɔma ɡwaa ɡboli lɔr aa dɛ kpoa jɔmɔra. Ba nɛra baa soɡe jaɡre ta ɡe le bojaŋa, dɛ chwa kohona dɛɛ ba, kɛŋɔ kokosakire yon ir le nyundua ba harɛ baa di ol la.

⁹ Ba dɛ ba naa, naɡrenyin we-ɛɛla ɡboo lɔ ba sie ta. Nomɛlbwa waa no ba bala waa la, dɛ ɔmee lawɔ. Nɛra baa laɡ ba laa ta la warɔ, kɛŋɔ mpo nyoa hɛŋle ken.

¹⁰ Ba siwi aa koranar tɔɡɛ, dɛɛ ɛ nomonome sisawa. Bwɛjena baa ma danjwɛɛre bara ɛ wesoma waa ba be. Ba cheɡɛ teera do danjwɛɛre baa maa bar bwɛjena mune, dɛ che a ta teeh ka yoo ba dɛ́ pɔ ba nɛ.

¹¹ Asɛ dɛ wur kaa kɛŋɔ peu yon ta dɛ kpɔ haahra kaa la. A ɡɛ nɛra nɔ, ba kpɔ ba te dawɛ ba bokpeɡa ta kɛŋɔ nɛn aa kpɔ sie dawɛ o voɡ ta la.”

Habakuk wenaɡra nɛɛtena

¹² N Naa Korowii, saŋ la bwa laa he le ɛ Korowii aa? Henee Korowii maa dɛ tomɛ, Korowii haa do ɡoroŋ la. N Naa Korowii, he le Babelɔn tena, dɛ tɛɛ ba kpeɡri ŋɔ bá ba tɛr ya deŋne, kɛ he do kɛ Bwetal dɛ kpɔ nɔn dɛɛ tɔ ya nɛ.

¹³ He do ɡoroŋ kohona, haa soɡee dɛɛ nyiŋi waa aa ɛ wechɔɡa. Haa wechɔɡa nyin. Ɛrɛɛ hɛɛ ba nyoa tɔe, dɛ́ nyiŋi nɛnchɔɡa bá chɔɡ nɛra ba wechɔɡa aa wola doe kɛ ban ɔ?

¹⁴ He ɡelɔ nɛwɛnyina do kɛŋɔ mpo bini pɛŋa, ne mpo bini koŋkwaa aa wola nomoa dɔe wɛɛ nyiŋi a nɛ.

¹⁵ Ba dɔma Babelɔn tena kpɔ ɡoŋri dɛɛ laɡ ba kɛŋɔ pɛŋa ken, dɛ kpɔ dɔɔne tɛɡ ba dɛɛ le baŋ, asɛ ba sie lɛ baa hɛɡre a ta.

¹⁶ Anomanta, ba kpoo kwaa dɛɛ tɛ ba dɔɔne, dɛ fuh daawiile a sɔɔh aa soma dɛɛ tɛa dɛɛ toma, dɛkalkɛ a ɡɛ kwaa laanee dɛɛ tɛɛ ba ba kondɛɛɡa, ne kondikondɛɛɡa tenten bwa.

¹⁷ Baa ɡeloo ba teŋɛ dɛ́ kpoo harɛre nɛra kɛŋɔ pɛŋa baa wola ba sumii na naa?