Galaasia 5 - mzwDBL

Yeesu Kristo foo yaa dɛ ɡel ya di ya nyu

¹ Ya di ya nyu. Yeesu Kristo foo yaa, anomanta, ya ta nɛndɔɔla ɛɛ kpa. Waa foo heyaa nɔ, hé che kiŋkiŋ. He bɛ ɡel ba kpɔ waa dɛɛ ha heyaa kpa.

² Hé ɡel n ŋɔ he be, dɛ he teŋɛ Mosis Mmara nɔ ta dɛ ɡel ba teŋe he pena aa, dɛ waa Yeesu Kristo aa ɛa tɛ heyaa la ta tɔnɔ dɔe tɛ heyaa kwaraa. Men Pɔɔl, men ŋɔa.

³ Hé ɡel n kwaa ŋɔ he be he no kɛrɛdɛ, nomɛlbwa waa ɡela ba teŋe o pen ásɛ o waa su Korowii siwi la, a chɛ kɛ ó teŋɛ Mosis Mmara la bwa ta.

⁴ He banɔ la haa dɛ nyin he che Mosis Mmara ta teŋa ta ásɛ dɛ ɛ nɛndɛɛɡa he waa su Korowii siwi la, he pere he te le Yeesu Kristo be. He ta nɛra Korowii aa sune ba nɛɛ la nɛɛ jae.

⁵ Ya te ken nɔ, ya cheɡɛ yarada yaa dɛ yarada Yeesu Kristo la ta dɛɛ hwɛɡɛ kɛŋɔ Korowii Domadɛɛɡe ɛɛ ɡeloo ya ɛ nɛndɛɛɡa ya waa su Korowii siwi.

⁶ Yeesu Kristo ŋwɛnɛ ta teŋa nɔ ta te, ba teŋe nɛn pen oo, ba ta o pen teŋoo, a laa ɛ wehiah. Waa aa hiah laanee kɛŋɔ nɛn aa dɛ yarada Yeesu Kristo, asɛ ɡɛ yarada nɔ won ɡel wɛɛ nyin o dɔŋa.

⁷ He fa dɛ teŋɛ ŋwɛnɛdɛɛɡe la ta kɛrɛdɛ. Bɔkwaa bala haa wola berɛ dɛɛ teŋɛ kasinteŋ ŋwɛnɛ la ta kpaɔ? Bɔkwaa tɔ heyaa ŋwɛnɛ ɔ?

⁸ Korowii waa le heyaa he ba o be la, o be laa ɡɛ liire nɔ le.

⁹ Ba ŋɔ, “Iisi tama ken won paanoo damanta hoeh,” anomanta, hɛ́ɛ nyiŋi liire aa do ken nɔ dɔŋa kɛrɛdɛ.

¹⁰ N te ta dɛ yarada heya. Ya Dɔɔ la ya bwa aa dɛ tomɛ la nomanta, n dɛ yarada heyaa kɛŋɔ haa liifalee dɔ. Naate waa dɛ wili heyaa nɔ, ɡɛ bwa waa doa, Korowii ɛɛ bɔɔ kemee.

¹¹ Yabala, dɛ n fe ta dɛ bol ŋɔ penteŋa hiaoh waa, nɛra fe cheɡɛ n nɛɛ ken aa? Dɛ n fe kpɔ penteŋa waa dɛ ja Yeesu Kristo daɡaɡre ta sewa la waa ta dɛɛ bol aa, nɛra fe dɛ vɛh n wobol nɔ naa?

¹² A ka n te wa aa, nɛra baa dɛ wili heyaa ŋɔ hé teŋe he pena la, ba dɛ nyin aa, bá fɔɡɛ ba lure ɡe.

¹³ Yabala, Korowiirii le heyaa tɛ o te, dɛ lɛ heyaa asɛ Mmara la bɛ heyaa vɔrɔwe kpa. Kɛ haa dɔ he te nɔ, he bɛ ɡel a do he som kohona, asɛ hɛɛ ɛ wechɔɡa la bwa he bwadabii aa dɛ nyin kɛŋɔ hɛɛ ɛ. Hé kpɔ dɔŋa nyina dɛɛ tomɛ dɔŋa.

¹⁴ Maa dɛ ŋɔ nɔ, webeŋkpoŋ bɛl lole dɛ he dɛ ɛ aa, dɛ he tonɛ Mosis Mmara la bwa. Onee kɛŋɔ, “Nyin he dɔŋ kɛ he ɡbaɡba.”

¹⁵ Dɛ haa dɔŋa nyin, dɛɛ yo aa, amɔ te hɛ́ɛ nyiŋi kɛrɛdɛ. A waa laa aa, he dɛ ba dɔŋa baah chɔɡa kwaraa.

Korowii Domadɛɛɡe ne ya nɛwɛnyini mar nɔ wa

¹⁶ Waa maa dɛ nyin n bol laanee kɛŋɔ hé kpɔ he te tɛ Korowii Domadɛɛɡe la, ásɛ wɛɛ baɡle heyaa ŋwɛnɛ. Dɛ o dɛ baɡle heyaa ŋwɛnɛ aa, haa wechɔɡa he nɛwɛnyini mar aa dɛ nyin la ɛɛ ba,

¹⁷ dɛkalkɛŋɔ waa he nɛwɛnyini mar wechɔɡa aa suu la aa dɛ nyin la, Korowii Domadɛɛɡe la aa an nyin. Nɛwɛnyini mar wenyina ne Korowii Domadɛɛɡe wenyina aa jo. Anomanta, waa haa dɛ nyin ɛɛ la, haa wona ba dɛ ɛ.

¹⁸ Dɛ he kpɔ he te tɛ Korowii Domadɛɛɡe la wɛɛ baɡle heyaa ŋwɛnɛ te naa, Mosis Mmara la aa won di kpeɡri he nɛ.

¹⁹ Nomɛlbwa jemɛ nɛwɛnyini mar wechɔɡa aa suu nɔ tetoowa. Anee kɛŋɔ jwamane, ne wedoŋa, ne pɛlchɔɡa we-ɛɛla te bwa soo siwi,

²⁰ ne voɡa toma, dɛ sɔm wa. A bini anee kɛŋɔ nɛra ne ba dɔŋa aa dɛ di dɔm dɛɛ yo, ne bɔweela kohona, ne bandisale ne sibeɡra, ne nɛra ne ba bala baah peɡra, dɛ nyopɛo bɛ dɔe,

²¹ ne bɔweela, ne dɛɛra dɛ́ dɛɛ do ɡbɔɡa kohona, dɛ wesale aa do ken nɔ. N fa ŋɔ he be wubwa ŋɔ hé nyiŋi kɛrɛdɛ, dɛ ŋɔ nɛra baa dɛ ɛ ɡɛ waa nɔ la, baa Korowii Kora la ta jae ba. N berɔ kwaa dɛɛ lii heyaa ja.

²² Korowii Domadɛɛɡe la te, kwaa waa dɛ tɛ laanee dɔŋa nyina, ne silɛɛ, ne nyopɛo, ne bambile dɔe, ne tesom, ne wedɛɛɡa ɛɛ, dɛ kasinteŋ dɔe,

²³ ne pwɛre doe, dɛ ɡel nɛn won o te lawa. Harɛ bɛlbwa toole dɛ ki a ɡɛ waa nɔ.

²⁴ Nɛra baa ɛ Yeesu Kristo nɛra la, ba kpaa ba nɛwɛnyini mar wechɔɡa aa suu nɔ wenyina ne ba liichɔɡa bwa pɛl Yeesu daɡaɡre la ta dɛ kpoa.

²⁵ Taraken nɔ, ya jemɔ kɛŋɔ Korowii Domadɛɛɡe laanee tɛ yaa mkpa, anomanta, a chɛ kɛ ya kpɔ ya te tɛo, dɛ́ ɡel wɛɛ baɡle yaa ŋwɛnɛ ya soɡa bini.

²⁶ A ta chɛ kɛ yaa ɛ jenu. A ta chɛ kɛ yaa ir dɔŋa bwaawee. A ta chɛ kɛ ya dɔ bɔweela dɔŋa nɛ.