Galaasia 2 - mzwDBL

Pɔɔl ne Yeesu toroma bane wa

¹ A habɔɔ bene fi dɛ anaarɛ la, n berɔ la Jerusalam ja. N kpɔ Taetos ja n nɛ, asɛ ya ne Banabas la.

² Korowiirii ɡela n jemɛ dɛ la ba be. N tɔ sie la asɔre tena nomonome be n ne ba ɡbo so, n baɡle Yeesu Amanesoma maa dɛ bol nɛra baa wola Juu tena ɛɛ be la bwa ásɛ ba jemɛ n wa, ásɛ n toma maa ɛa ne anɔ la n ta aa dɛ ba ɛɛ la bɛ pɛɛ ɛ.

³ Dɛ Grik tee Taetos, anomanta, o ta pen teŋe. Kɛ nomɛlbwa ta on hɛɛ ŋɔ bá teŋe o pen.

⁴ Dɛ nɛra la bane tea bini laa ɡɛ baa ɡel Taetos la. Dɛ a ɡɛ nɛra nɔ dɛ ɛ ba te kɛŋɔ asɔre tenaa ban ken dɛ sɔh jo ya bini, dɛ baa nyiŋi dɛ́ jemɛ ya asɔre tena dɔe yaa dɔ ya te Mosis Mmara aa wola yaa vɔrɔwe la bini, dɛkalkɛŋɔ Yeesu Kristo toma nomanta, ya ne o ɛ beŋkpoŋ. Dɛ ba dɛ nyin ba hɛ yaa yá berɛ dɛɛ ɛ waa yaa vɛah la.

⁵ Yaa wola nyin kɛ bá won berɛ Amanesoma la sie ásɛ kasinteŋ la do le tɛ heyaa la, ya ta ban sie tɛɛ kwaraa.

⁶ Nɛra la bini banɔ la baa dɛ lii ba nɛnjena la ta wone dɔ wobɛlbwa bol dɛ ja Amanesoma maa dɛ bol la ta. N te kwaraa waane laa ba nɛnjena ɛɛ wa, dɛkalkɛŋɔ Korowii aa nɛnjena kɛɛ nɛnjeɡre nyiŋi.

⁷ Ba ɡbabir nao kɛŋɔ Korowiirii kpɔ o waa la tɛ mɛ ŋɔ ń bol nɛra baa wola Juu tena ɛɛ la be, ɡɛ waa kpɔ o waa tɛ Pita ŋɔ ó bol Juu tena be la.

⁸ Dɛkalkɛŋɔ ɡɛ Korowii aa baɡle o kpeɡri Yeesu torome Pita nɛɛ wɛɛ tomɛ Juu tena bini la, ɡɛɛ o baɡle o kpeɡri men maa ɛ Yeesu torome nɔ nɛɛ mɛɛ tomɛ nɛra baa wola Juu tena ɛɛ bini.

⁹ Jems ne Pita dɛ Jɔn nomɛlbwa aa dɛ yer ba asɔre tena nomonome la, ba ɡbabir sɛoh kɛŋɔ Korowiirii kpɔ ɡɛ toma nɔ do n nɔn ta, dɛ cha mɛ a ta. Anomanta, ba do nɔɔra n nɔn ta, dɛ baɡle kɛŋɔ nɛmbeŋkpoŋii ya bwa Korowii toma nɔ bini. Ya nyoa pɛo, asɛ ba sɛh kɛŋɔ n ne Banabas ɛɛ bol Yeesu waa dɛɛ baɡle nɛra baa wola Juu tena ɛɛ, ásɛ ba ɡee baɡle Juu tena.

¹⁰ Waa baa bola ja bwaa kɛŋɔ yáa lii nyaara waa dɛ́ɛ cha ba. Dɛ ɡɛ waa nɔ ɛ waa n ɡe aa swɛɛ siwi dɛɛ ɛa wubwa.

Pɔɔl di Pita kasinteŋ

¹¹ Pita aa ba Anteɔk la, n diu kasinteŋ, dɛkalkɛŋɔ dɛ o dɛ ɛ waa aa wola aŋwɛnɛ ta ɛɛ.

¹² Jems fa tomɛ nɛra bane Anteɔk. Gɛ nɛra nɔ aa wola Anteɔk balɛ mɔɔ la, dɛ Pita ne asɔre tena la bini bane baa wola Juu tena ɛɛ la pɛo dɛɛ di kwa. Kɛ Jems toroma la aa baa jo Anteɔk la, Pita chwa a ɡɛ nɛra la be kwaa dii, dɛkalkɛŋɔ dɛ o dɛ ɔmɛ kɛŋɔ, hɔɔhra la bɛ ba ŋɔ waa Juu tena nawee wa aa dɛ baɡle kɛŋɔ ba ne nɛra baa wola pena teŋni aa kwaa di la ta teŋɛ.

¹³ Pita koh nɛra siebɔr ɔma waa dɛ nyoɡre ŋwɛnɛ. Yabala Juu tena baa ɛ asɔre tena la kar la ɡe koh nɛra siebɔr ɔma waa dɛ ɛ ɡɛ Pita aa ɛa la. Banabas ɡba nyoɡre ŋwɛnɛ, dɛ teŋɛ ba nɛ.

¹⁴ Maa naa kɛŋɔ ba nyoɡre Yeesu Kristo Amanesoma la ŋwɛnɛ la, n di Pita kasinteŋ yabala la bwa siwi ta ŋɔ, “Ŋwɛnɛ besoo taa a che he ɛ Juu te haa wola Juu tena nawee waa la ta teŋɛ, dɛ ŋɔ he hamɛ nɛra baa wola Juu tena ɛɛ ŋɔ báa teŋɛ a ta nɔ?

¹⁵ Ya te nɔ, Juu tena ɛ ya nyare ne ya mɛɛnanar ba lolɛ yaa, asɛ ya ɡe ɛ Juu tena. Nɛra baa wola Juu tena ɛɛ asɛ Juu tena ɛɛ yer ba ‘wechɔɡ-ɛɛra’ la laa yaa.

¹⁶ Kɛ, ya jemɔ kɛŋɔ Mosis Mmara ta teŋa laa ɡela nɛn ɛɛ ɛ nɛndɛɛɡe o wa ɛɛ su Korowii siwi, nemenɛ kɛŋɔ haa dɛ yarada Yeesu Kristo waa la, dɛ kpɔ he te tɛo. Yeesu Kristo nɛɛ ya ɡe kpɔ ya yarada do, asɛ Korowii koh o waa dɛ lɛ yaa kɛ nɛndɛɛɡa ya waa su o siwi. Mmara ta teŋa laa dɛɛ ba yaa nɛndɛɛɡa ɛɛ Korowii be, dɛkalkɛŋɔ Mmara ta teŋa aa won ɡel nomɛlbwa waa su Korowii siwi.

¹⁷ Yaa dɛ nyin ya che Yeesu Kristo nɛɛ dɛ́ ɛ nɛndɛɛɡa ya waa su Korowii siwi la, an ɡela ya vɛh Mmara ta teŋa dɛ berɛ wechɔɡ-ɛɛra la. Dɛ a do ɡɛ naa, dɛ Yeesu Kristoo dɛɛ cha dɛ ɡel wechɔɡa ɛɛ won dɛɛ kaa sie naa? Akai!

¹⁸ Mosis Mmara n ɡbaɡba fa aa ŋɔa o ta teŋa ta tɔnɔ dɔe la, dɛ n berɔ berɛ habɔɔ dɛ baa teŋɛ o ta naa, n ta wechɔɡa ɛɛ yaa?

¹⁹ A ɡɛ Mmara laanee pili n sie dɛ ɡel n jemɛ waa dɛ chwa o ta teŋa. Mosis Mmara la te be pera te naa, n do kɛŋɔ nɛn waa sewa. N ne Mmara la toole wobɛlbwa bini kpa, ásɛ n won do le tɛ Korowii.

²⁰ Baa kpaa Yeesu Kristo pɛl o daɡaɡre ta la, a kaa ɛ kɛ n ne onee sewa. Anomanta, n soɡa nɔ maa soɡa nɔ, n ɡbaɡba laa dɛɛ hwee nɔ. Korowii Bie Yeesu Kristoo soɡe n nɛɛ dɛɛ hwee la. N hweera nɔ maa dɛ hwee nɔ, yarada maa yaradao la, anee ɡela n do le la. Korowii Bie nɔ nyin mɛ kohona dɛ kpɔ o hweera charɛ n nyu.

²¹ Maa sɛh ɡel Korowii nɛra nɛɛ suna la ɛ pɛɛ. Dɛ Mosis Mmara ta teŋa taa a che nɛn ɛ nɛndɛɛɡe o waa su Korowii siwi aa, amɔ te dɛ pɛɛpɛɛ Yeesu Kristo sewɛ la.”