Galaasia 1 - mzwDBL

¹ Men Pɔɔl maa ɛ Yeesu torome la, men chwerɛ tɔn nɔ. Nɛwɛnyini laa lee mɛ dɛ tɛ mɛ toma nɔ. Yeesu Kristo ne o Mɛɛ Korowii waa iru seo ta laanee lee mɛ.

² N ne yabala baa lɔ n be bonɔ nɔ bwaa chwera dɛɛ tɛ asɔre tena haa lɔ Galaasia harɛ ta bwa.

³ Ń Naa Korowii ne ya Dɔɔ Yeesu Kristo cha heya, dɛ́ tɛ heyaa bosɔɔhna.

⁴ Ya Dɔɔ ɛ N Naa Korowii tetoowa kɛŋɔ, waa koh ya wechɔɡa waa dɛ sewɛ, dɛ lɛ yaa le taraken nɛra baa dɔ liichɔɡa bini nɔ.

⁵ Korowii chɛ kɛ yá kpɔ jirima tɛo saŋ te bɛlbwa. Aamen.

Yeesu Kristo amanesoma bwa lɔ beŋkpoŋ

⁶ He waa ɛɛ mɛ anebɛlbwa. Korowiirii le heya. Yeesu Kristo aa sune he nɛɛ dɛ lɛ heyaa la waa Korowii le heya. Kɛ he deno dɛɛ vɛh Yeesu Kristo Amanesoma la dɛɛ teŋɛ wefale ta.

⁷ Yeesu Kristo Amanesoma bɛlbwa toole, dɛ ɛ kasinteŋ, dɛ ja anɔ la yaa dɛ baɡle heyaa la ta. Nɛra bane dɛ wili heya, dɛɛ nyin dɛ́ berɛ Yeesu Kristo Amanesoma la, a waa n ŋɔ ɡɛ la.

⁸ Dɛ ya bini bɛl kɛɛ Korowii nyundua torome le nyundua dɛ ba bol Yeesu Kristo bwara wobɛlbwa a berɛ korɛ anɔ la yaa dɛ baɡle heyaa la ta naa, Kórowii fuuh!

⁹ Gɛ ya fa aa bola la, ɡɛɛ mɛɛ bol he be ja la. Dɛ nomɛlbwa bol Yeesu Kristo Amanesoma bɛlbwa a korɛ anɔ la he fa aa noa dɛ yarada la ta naa, Kórowii fuuh!

¹⁰ Maa ŋɔ ken nɔ, dɛ nɛwɛnyini bee mɛɛ nyin sɔn kɛɛ Korowii be nɔ? Maa sɔn nyin nɛwɛnyini be, Korowii bee mɛɛ nyin sɔn. Dɛ nɛwɛnyini bee mɛɛ nyin sɔn te naa, n fe ta Yeesu Kristo bonɔɔ ɛɛ.

Gɛ Pɔɔl aa baa ɛ Yeesu torome

¹¹ Yabala, hé ɡel n ŋɔ he be ŋɔ Yeesu Kristo Amanesoma nɔ maa dɛ bol he be nɔ, nɛwɛnyini be laa a le.

¹² Nɛwɛnyini laa tɛ mɛ ɡɛ wejema nɔ. Nɛwɛnyini laa baɡ mɛ. Yeesu Kristo ɡbaɡbaa pili a bini baɡ mɛ dɛ ɡel n jemɛ a wa.

¹³ Gɛ saŋ n fa aa dɛ tomɛ Korowii ɡɛ Juu tena aa dɛ tomɔ la, he noɔ ɡɛ n fa aa dɛ teŋɛ ɡɛ ŋwɛnɛ la ta dɛ che asɔre tena baa dɛ tomɔ nɛ, dɛɛ ɛɛ ba hɔhɔrɔwa tenten, dɛɛ nyin dɛ́ chɔɡ ba toma bwa.

¹⁴ Dɛ n dɛ teŋɛ ya Juu tena Korowii toma ŋwɛnɛ la ta ɡwaa n nyudɔŋa baa ɛ Juu tena kɛrɛdɛ, dɛɛ teŋɛ ya Juu tena nawee waa ɡe ta ɡwaa nomɛlbwa.

¹⁵ Kɛ Korowii te lee mɛ kwaraa mɔɔ ba lol mɛ, asɛ dɛ sune n nɛɛ dɛ cha mɛ, dɛ kpɔ mɛ do toma nɔ ta.

¹⁶ A ɛo silɛɛ kɛŋɔ ó ɡel n jemɛ o Bie la, dɛ́ won baɡle o Amanesoma nɛŋhɔɔhra baa wola Juu tena ɛɛ la be. Waa lee mɛ ɡɛ la, n ta taarɛ baɡle nomɛlbwa ŋɔ ó baɡ mɛ ɡɛ maa ɛ mɔɔ dɛ́ jo o toma la ta.

¹⁷ N ta Jerusalam laŋɛ dɛ ka na nɛra baa tɔ sie ɛ Yeesu toroma n nɛɛ la mɔɔ. Pae n den pa sie kaa Arab harɛ. Maa le bela la, n baa kaa Damaskɔs.

¹⁸ A habɔɔ bene atoroo mɔɔ n la Pita be Jerusalam dɛ ka chɔɔro dɛ jemɔ. Maa la Pita chɔɔra la, n kaa so o be tɔpera fi dɛ anue.

¹⁹ N ta Yeesu toroma la bɛlbwa nae bela ka ja Pita nɛ. Jems waa ɛ ya Dɔɔ la nime la ɡee n berɛ na ja Pita nɛ.

²⁰ Kasinteŋii mɛɛ chwerɛ la. Korowii ɡba jemɔ kɛ nyosone laa.

²¹ A habɔɔ la, n la Siiria harɛ ne Silisia harɛ bwɛɛre ane ta.

²² A ɡɛ saŋ la, dɛ Juda harɛ asɔre tena la ta men nae siwi ne mɔɔ.

²³ Dɛ n waa nɛra aa dɛ bol la ɡboo baa no. N waa baa dɛ bol laanee kɛŋɔ, nɛn o fa aa dɛ ɛɛ ba hɔhɔrɔwa laanee bera lɛ Yeesu Amanesoma ba fa aa yaradaa o koh a waa hah ba dɛɛ nyin ba kpoe la dɛɛ bol la.

²⁴ Ba cheɡɛ a ta dɛ jam Korowii a wa.