Felepae 3 - mzwDBL

Nɛndɛɛɡe o wa aa dɔ kasinteŋ

¹ Yabala, waa aa kaa laanee kɛŋɔ, hé ɡel he sie lɛ he ne ya Dɔɔ pɛɛ la ta. Wesiwi beŋkpoŋii n berɛ chwerɛ dɛɛ tɛ heyaa la, kɛ aa men ha. A dɛ ba ɡela he won che kiŋkiŋ.

² Hɛ́ɛ do nɛnchɔɡa baa ɛ ba te manyare la dɛɛɡɔ. Nɛra baa dɛ maŋkura penteŋ dɛ ŋɔ nómɛlbwa mɔn o bɔtɔn mɔɔ dɛ́ tomɛ Korowii la waa mɛɛ bol la.

³ Ya banɔ la yaa dɛ tomɛ Korowii o Domadɛɛɡe kpeɡri ta dɛɛ tɛ Yeesu Kristo sɔn, yaa wola bɔtɔn mɔna waa maŋkura la, yanee jemɛ penteŋ tenten la.

⁴ Dɛ bɔtɔn wa ɛɛ wonoo lɛ yaa aa, menee fe dɔ hwɛɡa kɛrɛdɛ. Dɛ nomɛlbwa ŋɔ a cheɡɛ o waa waa ɛa ta o dɔ hwɛɡa aa, menee dɔ hwɛɡa dɛ ɡwaa naate.

⁵ Israel tee men. Baa lol mɛ n dɔ yawanyoa la taa ba teŋe n pen. Bɛnjamen deaa n le. Israel te kaiih men, dɛkalkɛ n mɛɛ ne n nya bwa ɛ Hibru tena. Dɛ ba dɛ bol Mmara ta teŋa wa aa, nɛra baa dɛ teŋɛ Mmara ta kohona baa yer ba Farisii tena la bɛlee men.

⁶ Ba dɛ nyin nɛn o siwi fa aa swɛɛ a ta naa, menee, dɛkalkɛŋɔ n fa cheɡɛ Yeesu habɔteŋra la nɛɛ taeh. Dɛ ba berɔ dɛɛ nyin nɛndɛɛɡe Mmara la be pera ɡe aa, n waa bwa toɡrɔ.

⁷ Kɛ waa la bwa n fa aa lɔ a ta a ɛ tɔnɔ tɛ mɛ la, Yeesu Kristo nomanta, n dɛ liira wepuu.

⁸ Kasinteŋ, komɛlbwa ne wobɛlbwaa n vɛh dɛɛ yera wepuu dɛ́ won jemɛ n Dɔɔ Yeesu Kristo. O jemaa hiaah ɡwaa komɛlbwa. N koh o waa dɛ ɡel wobɛlbwa ta, dɛɛ liira puldoa haahra, dɛɛ nyin ń won dɔ Yeesu Kristo kɛrɛdɛ,

⁹ ásɛ ya bwa won pɛ, ásɛ n ɛ nɛndɛɛɡe, n waa su Korowii siwi. N ta ŋɔe ŋɔ ń che Mmara ta teŋa ta dɛ́ ɛ nɛndɛɛɡe n waa su o siwi. Kɛ n dɛ nyin ń che yarada maa dɛ yarada Yeesu Kristo la ta, dɛ́ ɛ nɛndɛɛɡe n waa su o siwi. Nɛndɛɛɡe ɛɛ le Korowii be o kpɔ dɛɛ tɛ nɛra la bwa baa yarada Yeesu.

¹⁰ N waa bwaa kɛ ń won jemɛ Yeesu Kristo, dɛ́ won jemɛ kpeɡri la soo waa ira seo ta dɛ dɔ, dɛ́ na wahala waa naa la dɔŋa, dɛ́ kpɔ n te ɛ kɛ n sewɔ ɡɛ waa sewa la,

¹¹ ɡɛ aa ɛ ń won ir seo ta ɡɛ waa ira la.

Siwi swɛɛra dɛ won tel waa jaɡa

¹² N ta ŋɔe ŋɔ n denɔ won do kaih dɛ ɛ nɛndɛɛɡe dɛ ka tonɛ. Akai! N ta swɛɛ siwi dɛɛ nyin ń won do ɡɛ bwa Yeesu Kristo aa lee mɛ ŋɔ ń do la.

¹³ Yabala, maa lii kɛŋɔ n tonɛ wobɛlbwa. Webeŋkpoŋii hiah mɛ. N ɡel waa aa lɔ habɔɔ, dɛ takapɔ dɛɛ la sie, dɛ́ won ka dɔ anɔ la aa lɔ sie la,

¹⁴ dɛ́ swɛɛ siwi dɛ́ won tel a jaɡa dɛ́ won dɔ kembɔr. Korowiirii yer mɛ ŋɔ ń ba dɛ́ ba do o be, Yeesu Kristo nomanta. A waa n swɛɛ siwi dɛɛ nyin ń won dɔ kembɔr la.

¹⁵ A wer kɛŋɔ ya banɔ la bwa yaa kpeɡa Korowii waa la ta la dɔ ɡɛ liire. Dɛ he bane ɡe liire korɔ waa nɔ ane ta naa, Korowii ɛɛ ɡeloo a bini chaah tɛ heya.

¹⁶ Kɛ ɡɛ bwa yaa wona dɛ jemɛ la, yá kpoŋe a bini dɛɛ la.

¹⁷ Yabala, hé kpɔ n da, dɛ́ɛ nyiŋi nɛra ɡe baa dɛ teŋɛ ɡɛ yaa dɛ teŋɛ la,

¹⁸ dɛkalkɛŋɔ nɛra warɔ baa wola ɡɛ ŋwɛnɛ la ta teŋɛ. N fa baɡle ba waa he be kera aŋwɛnɛ bwa, dɛ berɛ dɛɛ baɡle heyaa taraken sinii ne ŋɔ ba ɛ Yeesu Kristo seo waa sewa daɡaɡre la ta la waa dɔm.

¹⁹ Ŋwɛnɛ ɡɛ nɛra nɔ aa kpɔ o ta la dɛ kaa ba ne seo ta. Ba kpɔ tea ne bwadabii waa ɡwaa Korowii. Waa aa ɛ sihihwaa la, a nee baa ta nyoa. Ba liire bwa lɔ harɛ nɔ ta kwaa ta.

²⁰ Kɛ harɛ nɔ ta ya bwɛɛ ɛɛ. Ya bwɛɛ lɔ nyundua. Yaa lɔ bonɔ nɔ, ya siwi swɛɛrɔ yaa kpa ya Dɔɔ Yeesu Kristo waa ɛ ya Lɛɛ la ó le bela ba.

²¹ Dɛ o balaa, wɛɛ beɡre ya bwadabisale aa won pɔeh nɔɔ á do wer kɛŋɔ o ɡbaɡba bwadabii aa do wer kohona ɡɛ la. O kpeɡri taa wɛɛ ba ɡɛ ɛɛ. O dɔ kpeɡri kɛŋɔ o won ɡel komɛlbwa no o be.