Felepae 2 - mzwDBL

Yeesu pwɛre waa doa hwela

¹ Haa dɔ ɡbemba pɛɛ he ne Yeesu Kristo aa pɛa la ta, o nyina ɡee larawe heyaa bwara, he dɔ Korowii Domadɛɛɡe ɡe wɛɛ cha heya, dɛ dɔ nɛnnyin he chal do dɔŋa nɛɛ nɔ,

² amɔ hé ɛ waane dɛɛ ja, ásɛ n sie lɛ kohona ka tonɛ. N dɛ nyin kɛŋɔ he bwa dɔ nyopɛo, ásɛ he liire ne he dɔŋa nyina ne wobɛlbwa haa lii la bwa won ɛ beŋkpoŋ.

³ He bɛlbwa bɛ o ɡbo sɔn nyina kɛɛ jenu waa koh dɛɛ ɛ wa, kɛ hé pwɛr he te dɛ́ɛ tɛ dɔŋa, dɛ́ kpɔ ba ɡwaa he ɡbaɡba.

⁴ He bɛ ɡel he ɡbo waa hiah heya. Hé ɡel he dɔŋa ɡe waa hiah heya.

⁵ Gɛ Yeesu Kristo aa doa la, ɡɛɛ a chɛ kɛ he do.

⁶ O do ɡɛ Korowii aa doa, kɛ o ta ɡelɛ ɡɛ su o siwi kɛŋɔ o ne Korowii ɛ kɛrɛdɛ.

⁷ O kpɔ o Korowii dor la bil, dɛ kpɔ o te kɛ somanji, dɛ do ɡɛ nɛwɛnyini aa doa.

⁸ Waa baa ɛ nɛwɛnyini la, o pwɛr o te dɛɛ no o Mɛɛ Korowii nyoa wobol, dɛ ɡel ba kpoo. Hale daɡaɡre ta kwaraa ba kpoo.

⁹ A waa Korowii tɛo nomonome kɛrɛdɛ ɡa, dɛ berɛ tɛo sɔn ɡwaa sɔna tena bwa.

¹⁰ Yeesu Kristo sɔnjen la nomanta, nomɛlbwa ɛɛ ɡuŋi o siee dɛ́ kpɔ duure dɛɛ tɛo. Banɔ la baa lɔ nyundua, ne banɔ la baa lɔ harɛ ta, ne banɔ la baa serewa bwa, ɛɛ kpɔ duuree dɛɛ tɛo,

¹¹ ásɛ nomɛlbwa sɛh kɛŋɔ Yeesu Kristoo nɛra bwa Dɔɔ, ásɛ o Mɛɛ Korowii dɔ jirima.

Nɛra ɡel ba we-ɛɛla chaah kɛŋɔ weweela

¹² Anomanta, n dandɛɛɡa, ɡɛ haa dɛ no n waa dɛɛ teŋɛ a ta ɡɛ saŋ n fa aa lɔ he be la, a hiaoh kohona kɛŋɔ maa wola toole he be nɔ, hé ta kpoŋe ɡɛ. Korowii aa lɛ heyaa nɔ, hé kpɔ duure ne ɔmee dɛ́ɛ teŋɛ toma haa dɛ tomɛ Korowii la ta,

¹³ dɛkalkɛŋɔ Korowii soɡe he bɛlbwa nɛɛ dɛɛ ɛ toma, dɛ ɡel he won sɛh dɛ won dɛɛ tomɔ kɛrɛdɛ ɡɛ aa su o siwi.

¹⁴ Wobɛlbwa haa dɛ ɛ la, he bɛ waa dɛɛ naɡre, dɛ bɛ waa dɛɛ tɔŋle,

¹⁵ dɛkalkɛŋɔ a wer kɛŋɔ he ɛ Korowii bii nomɛlbwa aa wola he wechɔɡa dɔe dɛ bol, he tea to, he do kaih. Fini nɛra baa ɛ wechɔɡ-ɛɛra kɛrɛdɛ baa wola ŋwɛnɛ la ta kpɔ baahnee he do. Gɛ weweela aa dɛ chaah jwaana biro ta la, ɡɛɛ chɛ kɛ he do ba baah dɛɛ chaah.

¹⁶ Hé ɡel Korowii wa aa dɔ mkpa la do he bambile bini kɛrɛdɛ dɛɛ la, ń won hɛɡre he waa Yeesu Kristo bala tɔpere la ta kɛŋɔ n ta koɛh ta pɛɛ.

¹⁷ Kɛ dɛ yarada haa dɛ yarada Korowii dɛɛ tomɔ la do kɛŋɔ saraha, asɛ a chɛ kɛ n chal fuɡe a ta naa, n dɛ nyin ɡɛ. A ba ɡɛ naa, n sie ɛɛ lɛo, ásɛ he puu mɛ lɛ sie.

¹⁸ Gɛ tentenee a chɛ kɛŋɔ hé ɡe sie lɛ, ásɛ n pu heyaa lɛ sie.

Timoti ne Epafrodaetɔs

¹⁹ Dɛ ya Dɔɔ Yeesu sɛoh waa, mɛɛ tomɛ Timoti he bee taraken ó ba na heya, dɛ́ ba bol he waa n be ásɛ n baah sɔɔh mɛ.

²⁰ N ne o ɡboo dɔ liire beŋkpoŋ he wa. Anomanta, n jemɔ kɛ onee he waa do o bambile bini wɛɛ nyin he ne andɛɛɡa.

²¹ Dɛ o laa aa, bɛlbwa sese dɛ dawɛ o ɡbaɡba wa, waa Yeesu Kristo waa dawɛ.

²² He ɡba jemɛ ɡɛ o waa aa dɔ kasinteŋ dɛ do wer. N ne o pɛo wɛɛ cha mɛ Amanesoma toma la ta kɛŋɔ bechala ne o mɛɛ.

²³ Anomanta, dɛ n baa na ɡɛ baa dɛ ba n cheɡa aa, mɛɛ tomɔ he bee.

²⁴ N dɔ hwɛɡa ya Dɔɔ nɛɛ kɛŋɔ aa biɡri bɛlbwa ásɛ n ɡbabir dɔ bɔr dɛ́ ba he be.

²⁵ N liiro kɛŋɔ a hiaoh kɛ ń tomɛ ya dɔŋ Epafrodaetɔs he be. N ne onee dɛɛ ɛ toma nɔ, dɛ yo dɛɛ tɛ Korowii. Onee he faa tomɛ n be o ba cha mɛ la. N ɡee berɔɔ tomɔ he be,

²⁶ dɛkalkɛŋɔ, he pɛla lawɔ wɛɛ lii he bwa waa taeh. A dɛ hao kohona kɛŋɔ haa no o weela wa.

²⁷ O fa we weela dɛ chɔ fɔɡɛ taeh, dɛ fe ɛɛ ba sewa. Kɛ Korowiirii na o sum dɛ sune n ne o bwa nɛ. Dɛ o fe sewaa, n tea bini fe chɔɡɔ dɛ́ ja n wahala ta.

²⁸ Ate waa n siwi swɛɛ mɛɛ nyin kɛŋɔ ń tomɔ he be ásɛ he nao he sie lɛ, ásɛ he waa bɛ men dɛɛ ha kohona.

²⁹ Hé kpɔ silɛɛ dɛ́ lɛo, teŋa he ne o bwa aa dɛ teŋɛ ya Dɔɔ nɛɛ la nomanta. Hɛ́ɛ duu nɛra baa do kɛŋɔ on.

³⁰ Yeesu Kristo toma waa o koh dɛ kpɔ o nyu charɛ seo. A ka jɛɛ ken o fee sewɛ. Waa haa wola won cha mɛ a ta, dɛ koh a waa tomɔ n be la taa o fe ɛɛ ba sewa.