Ɛsra 9 - mzwDBL

Ɛsra soŋe Korowii hɔɔhra hahmor ne yal wa

¹ Baa ɛ anɔ bwa tonɛ la, nomonome la ba men sɔfo Ɛsra be ŋɔ, “Israel tena ne sɔfore, dɛ Lewi dea tena la ta ba te pere le Keenan ne Hiti ne Pɛrɛs, ne Jebus ne Amɔn ne Moab ne Ijipt, dɛ Amɔre tena we-ɛɛla Korowii aa kia aa wola were la ta.

² Israel baala la kpɔ harɛre aa bar ba cheme la haahna mo, a che a ta ba ne Korowii nɛra ba wa aa do ɡoroŋ la, ne ba we-ɛɛla aa wola were la koo dɔŋa. Nomonome ne sitɔɔla laanee tɔ ba sie ba ɛ ɡɛ waa nɔ.”

³ Maa no ɡɛ waa nɔ la, n kɛɛ n batakaare, dɛ tɛr n nyumpona ne n tampona, asɛ dɛ so harɛ n bwara yɔr, n tea bini aa chɔɡa wa.

⁴ Nomɛlbwa waa no waa Korowii Israel tena aa dɛ tomɔ aa bola la baa bar mɛ cheme dɛɛ chel, dɛkalkɛ nɛra baa le bojaŋ harɛfale ta dɛ ba la waa ta kasinteŋ dɔe. Asɛ n so bela dɛɛ di suna ka tel kɛŋɔ jɔmɔr saraha ɛɛ aa tela.

⁵ Jɔmɔr saraha ɛɛ aa tela la, n iro le bela maa soɡa dɛɛ di suna la, n batakaare maa kɛɛra ta do mɛ, asɛ n ɡuŋi harɛ dɛ ɡɔɔ n nɔɔra Korowii maa dɛ tomɔ la be nyundua,

⁶ dɛ soŋo ŋɔ, “N Naa Korowii maa dɛ tomɛ, sihiih dɛ kpo mɛ n di ncho ɡe kohona, kɛ maa ɡɔɔ nyu dɛɛ nyiŋi he siwi ta nɔ, dɛkalkɛ ya wechɔɡa ɡwaa ya nɛ, hale dɛɛ tel he be nyundua.

⁷ Le ya naawa bere saŋ ba le fini, ya wechɔɡa kan kohona. Anomanta, ya ne ya koranar ne sɔfore bwaa harɛre ane koranar lawɛ laa ta dɛ kpoo yaa, dɛ pa ya laala kaa. A ɡel sihiih kpo yaa, asɛ ya do ba lɔɡa ba le fini nɔ.

⁸ Kɛ taraken nɔ, n Naa Korowii yaa dɛ tomɛ, he sune ya nɛɛ tama bɛl, dɛ ɡel ya bini bane won chwa le yoma yawa ta, dɛ ba so deŋnesɔɔhna ta he Dea ta. He ɡelɔ ya dɔ ya te, dɛ tɛ yaa mkpafale.

⁹ Dɛ ya ɛ yoma, kɛ hen Korowii yaa dɛ tomɛ ta yaa ɡelɛ ya wenaale ta. He baɡle he nyina ya nɛɛ Pɛɛsea harɛ koojena sie. He tɛ yaa mkpafale ya berɛ won kwaa ma hen Korowii yaa dɛ tomɛ Dea waa kuuɡa la, asɛ dɛ tɔ yaa ɡbemɡbe, dɛ ɡel ya dɔ deŋnesɔɔhna Juda harɛ ne Jerusalam bwɛdaa ta.

¹⁰ N Naa Korowii yaa dɛ tomɛ, anɔ bwa habɔɔ, ɛrɛɛ yaa ba wona bol ɔ? Dɛkalkɛ ya ta waa haa do yaa a ta teŋɛ,

¹¹ he cheɡɛ he bonɔɔna baa ɛ he keamere la nɛɛ dɛ ŋɔ, ‘Harɛ haa dɛ kaa o ta ka so la, wechɔɡa ɡelɔ nɛra baa soɡe o ta chɔɡo. Ba kpɔ we-ɛɛla men Korowii aa kia ne wedoŋa su harɛ la bwa.

¹² Anomanta, he bɛ he bihaahna kpɔ tɛ ba bibaala bá mo, ɡɛɛ aa wola chɛɛ kɛ he ɡe bibaala mo ba bihaahna. Hé ne ba bɛ nyopɛo fɔo bɛlbwa fɔwɛ, ɡɛ aa ɛ he won so dɛ́ biɡri, dɛ́ dɔ bokpeɡa dɛ́ di harɛ la ta kondɛɛɡa, ásɛ a chɔ le tɛ he bii saŋ bɛlbwa dɛɛ la.’

¹³ Waa aa pu yaa nɔ bwa le ya wechɔɡa aa ɡela ya di bolchɔɡe la. Kɛ ane a bwa, N Naa Korowii yaa dɛ tomɛ, tamaa kenii he tɛr ya deŋne. He ta ɡelɛ a ɡwaa ya nɛ, dɛ ɡel ya bini bane dɔ ya nyuune dɛ ta so le.

¹⁴ Yaa wono teŋɛ dɛɛ koni waa haa dɛ do yaa a ta, ya ne nɛra baa dɛ ɛ waa baa kia nɔ kaa mo dɔŋa bihaahna, kɛɛ bihaahna kaa yalɛ ba bibaala aa? He baah aa ya nɛɛ di kohona he chɔɡ yaa, ya bini bɛlbwa aa wola ka dɛ́ so le kpa aa?

¹⁵ N Naa Korowii Israel tena aa dɛ tomɛ, he waa toɡrɔ kohona! He ɡelɔ ya bini bane ta so le. Ya di bolchɔɡe dɛ kpɔ ya wechɔɡa dɛɛ bil he sie, anomanta, ya bini bɛlbwa toole dɛ́ won ba che he sie.”