Ɛsra 8 - mzwDBL

Nɛra baa le bojaŋ harɛ ta ba wa

¹ Gɛ saŋ Israel deene nomonnyuune baa laɡ ba kaa bojaŋ harɛfale ta Babelɔn la, nɛra baa teŋɛ sɔfo Ɛsra nɛɛ ba Jerusalam ɡɛ saŋ Koojen Atasɛksɛs aa di kora laanee nɔ.

² Fenehas naanar bini, Gɛɛsɔm. Itama naanar bini, Daneɛl, Devid naanar bini, Hatus

³ ne Sɛkania naanar. Parɔs naanar bini, Sekaria. Baala baa ja o nɛɛ ba chwerɛ ba sɔna lɔ lafa fifraanue.

⁴ Pahat Moab naanar bini, Serahia bibaa Eliehonai, asɛ baala lafraanɛ ja o nɛ.

⁵ Satu naanar bini, Jahaseɛl bibaa Sɛkania, asɛ baala lafraatoro ja o nɛ.

⁶ Adin naanar bini, Jonatan bibaa Ɛbɛd, asɛ baala fifraanue ja o nɛ.

⁷ Elam naanar bini, Atalia bibaa Jesaya asɛ baala fifraanuanɛ ja o nɛ.

⁸ Sɛfatea naanar bini, Maekel bibaa Sebadia, asɛ baala fifraanuatoro ja o nɛ.

⁹ Joab naanar bini, Jehiel bibaa Obadia, asɛ baala lafraanɛ dɛ fi dɛ banuatoro ja o nɛ.

¹⁰ Bani naanar bini, Josifia bibaa Sɛlomet, asɛ baala lafa fifraanumɛl ja o nɛ.

¹¹ Bebai naanar bini, Bebai bibaa Sekaria, asɛ baala fifraanɛ dɛ banuatoro ja o nɛ.

¹² Asɡad naanar bini, Hakatan bibaa Johanan, asɛ baala lafa dɛ fi ja o nɛ.

¹³ Adonikam naanar bini, banɔ la baa ka mun ba laanee, Ɛlefɛlɛt ne Jeyuwel dɛ Sɛmaya, asɛ baala fifraanumɛl ja ba nɛ.

¹⁴ Biɡvai naanar bini, Utai ne Sakur, asɛ baala fifraanuanɛ ja ba nɛ.

Sɔfo Ɛsra berɔ ba Jerusalam

¹⁵ Ate, men sɔfo Ɛsra boa nɛra baa le harɛfale ta ba la nyoa, bɔɔ bɛl baa kwiu asɛ nee palɛ kpɔ o bini dɛɛ kaa Ahava ta, asɛ ya so bela tɔpera atoro. Maa nyiŋi nɛra la ne sɔfore la bini la, n ta Lewi dea te bɛlbwa nae.

¹⁶ Anomanta, n yerɛ Eliesa ne Areɛl ne Sɛmaya, ne Ɛl Netan ne Jarib ne Ɛl Netan, ne Netan ne Sekaria dɛ Mɛsolam ba fa aa ɛ nomonome, dɛ yerɛ Joiarib ne Ɛl Netan baa dɔ wejema kohona,

¹⁷ dɛ tom ba bwɛɛ nomoa bɛl waa lɔ Kasifia baa yerɔ Ido be. N bol waa baa ka bol Ido ne o bala baa ja o nɛɛ dɛɛ ɛ toma Korowii Dea be ŋɔ, bá tɛ yaa nɛra bá baa tomɛ Korowii yaa dɛ tomɔ o Dea.

¹⁸ Korowii yaa dɛ tomɔ aa sune ya nɛ, dɛ ja ya nɛɛ nomanta, ba tɛ yaa Sɛrebea waa dɔ kwaa ɛɛ wejema kohona. O ɛ Lewi dea te, dɛ le Maali dea, asɛ o bibaala ne o nimanar baala fi dɛ banuatoro ja o nɛɛ dɛ ba.

¹⁹ Ba ɡelɔ Hasabia dɛ Jesaya baa le Merari dea ɡe ba, ba lolanar fifraanɛ ja ba nɛ.

²⁰ Ba berɔ ba bonɔɔna baa dɛɛ ɛ Korowii Dea bini toma nɛra lafraanɛ fifraanɛ ne, ba ɛ nɛra Kooro Devid aa le ba ne ba nomonome cheɡ ŋɔ baa cha Lewi dea tena la. Ba chwerɛ ba bwa sɔna teŋɛ dɔŋa nɛɛ do tɔn bini.

²¹ Ahava bela baa kwi bɔɔ nee ɛɛ palɛ o bini belaa n do ba ŋɔ ya vɔwɛ nyoa, ɡɛ aa ɛ yá won pwɛr ya te do Korowii yaa dɛ tomɔ lɔɡa. Ya soŋo o ja ya nɛɛ ya kpɔ ya bii dɛ kwaa yaa dɔa bwa kaa Jerusalam sɔnɔnɔɔ.

²² Dɛ sihiih dɛ kpo mɛ kɛ n soŋe laa tena ne nɛra baa soɡe jaɡre ta le koojen be ŋɔ, bá tɔ yaa ɡbemɡbe le ya dɔma baa lɔ ŋwɛnɛ ta la be, dɛkalkɛŋɔ ya ŋɔ koojen la be ŋɔ Korowii dɛ sune nomɛlbwa waa kpɔ o te dɛɛ tɛo nɛ, kɛ nɛra baa vɛoh la te, o baah ɛɛ diu kohona ó tɛr ba deŋne.

²³ Anomanta, ya vɔwɛ nyoa dɛ soŋe Korowii ŋɔ o lɛ yaa le ɡɛ waa nɔ ta. Asɛ o no ya wesoŋa, dɛ lɛ yaa.

Koŋkɛɛla baa kpɔa ba Korowii Dea

²⁴ Ate, n le sɔfo nomonome fi dɛ banɛ, ne Sɛrebea ne Hasabia dɛ ba bala fi ja.

²⁵ Asɛ n maɡɛ suuɡapoŋa ne suuɡaswɛm, dɛ loɡa Koojen Atasɛksɛs ne o nɛra baa dɛ jao ne o nomonome, dɛ anɔ la Israel tena aa ba a ne bá kpɔ ɛ toma Korowii yaa dɛ tomɔ Dea.

²⁶ Kwaa maa maɡa tɛɛ ba laanee, suuɡapoŋa a tɔɡre aa ɛ kilore kaɡboŋa fifraanɛ dɛ anɛ dɛ lafa, suuɡapoŋa koŋkwaa a tɔɡre aa ɛ kilore kaɡboŋa atoro lafraanaarɛ, dɛ suuɡaswɛm koŋkwaa a tɔɡre aa ɛ kilore kaɡboŋa atoro lafraanaarɛ,

²⁷ ne suuɡaswɛm loɡa a tɔɡre aa ɛ kilore anuatoro ne tama, dɛ ayaawa loɡa anɛ ne suuɡaswɛm loɡa a bwa tɔɡre aa ɛ beŋkpoŋ.

²⁸ N ŋɔ ba be ŋɔ, “He fa le he ne laala nɔ bwa cheɡ tɛ Korowii dɛ do ɡoroŋ wubwa. Suuɡapoŋa ne suuɡaswɛm la ɛ saraha kwaa aa le nɛra bambile bini ba kpɔ ba tɛ Korowii he naawa aa tomɔ la.

²⁹ Hé daahna kɛrɛdɛ ka tel kɛŋɔ haa jo Korowii Dea bini Jerusalam, ásɛ dɛ kari a tɔɡre sɔfo nomonome ne Lewi dea tena dɛ Israel nomonnyuune la sie.”

³⁰ Ate, sɔfore ne Lewi dea tena lɛ suuɡapoŋa ne suuɡaswɛm, dɛ koŋkwaa aa do ɡoroŋ ba kari a tɔɡre la dɛ ŋɔ, bá kpɔ kaa Korowii yaa dɛ tomɔ Dea Jerusalam.

³¹ Korobiloɡle, tɔpera fi dɛ anɛ taa ya le bela baa kwi bɔɔ nee ɛɛ palɛ o bini dɛ do Ahava dɛ kaa Jerusalam. Korowii yaa dɛ tomɔ la ja ya nɛ, dɛ tɔ yaa ɡbemɡbe le ya dɔma ne ŋwɛɛra baa sɔh ŋwɛnɛ ta nɔn ta.

³² Yaa jo Jerusalam la, ya soɡo dɛ onɛ tɔpera atoro.

³³ Asɛ tɔpenaarɛ wee la, ya la Korowii Dea, dɛ ka maɡɛ suuɡapoŋa ne suuɡaswɛm dɛ koŋkwaa aa do ɡoroŋ la do sɔfo Uria bibaa Mɛremɔt waa ɛ sɔfo la nɔn ta, Korowii yaa dɛ tomɔ Dea la bini. Dɛ Fenehas bibaa Eliasa ja o nɛ, ne Lewi dea tena baa ɛ Jesua bibaa Josabad dɛ Binui bibaa Noadia.

³⁴ Ba kure kwaa la bwa dɛ jemɛ a nyoa ne ɡɛ a tɔɡre aa doa. Dɛ chwerɛ a bwa do tɔn ta bil ɡɛ saŋ.

³⁵ Nɛra baa laɡ ba kaa bojaŋ harɛ ta aa le bela ba la, ba kpɔ saraha kwaa ba ba fuh tɛ Korowii Israel tena aa dɛ tomɔ. Ba kpɔ nabala fi dɛ anɛ tɛ Israel harɛ tena bwa, pebala fifraanuanaarɛ dɛ anumɛl ne pebali fifraanuanɛ dɛ anuanɛ, asɛ dɛ kpɔ bombala fi dɛ anɛ ɡe ɛ wechɔɡa kpɔe dɛ kɛ saraha soŋe ba wechɔɡa. Ba fuh ɡɛ kwaa nɔ bwa ɛ saraha tɛ Korowii.

³⁶ Ba berɔ kpɔ tɔn koojen la fa aa kpɔa tɛɛ ba la tɛ nomonome baa dɛ nyiŋi harɛre aa lɔ Yufretis Moo wee cholibɔr harɛ, ne o nomonome bwa, asɛ ba cha nɛra la ne Korowii Dea toma la.