Ɛsra 7 - mzwDBL

Ɛsra Jerusalam bala

¹ Anɔ bwa habɔɔ, ɡɛ saŋ Koojen Atasɛksɛs aa di kora Pɛɛsea harɛ ta la, dɛ baa bɛl lole baa yerɔ Ɛsra. O mɛɛ sɔne Seraya, Seraya ɡe mɛɛ Asaria, asɛ Asaria ɡe mɛɛ sɔne Hilkia.

² Salum lolɛ Hilkia, Sadɔk lole Salum, Ahitub lolɛ Sadɔk,

³ Amaria lolɛ Ahitub, Asaria lolɛ Amaria, asɛ Merayɔt lolɛ Asaria.

⁴ Serahia lolɛ Merayɔt, Usi lolɛ Serahia, asɛ Buki lolɛ Usi.

⁵ Abisua lolɛ Buki, Fenehas lolɛ Abisua, Eliasa lolɛ Fenehas, asɛ Arɔn waa ɛ Sɔfonomoa la lolɛ Eliasa.

⁶ A ɡɛ Ɛsra nɔ ɛ sɔfo dɛ le Babelɔn ba. Dɛ o ɛ chicha ɡe, dɛ jemɛ mmarare Korowii Israel tena aa dɛ tomɔ aa kpɔa tɛ Mosis la kɛrɛdɛ, dɛɛ baɡla. Komɛlbwa waa bɔɔ le koojen be la, o dɛ tɛo, dɛkalkɛ Korowii waa dɛ tomɔ la nɔn dawɛ o nɛ.

⁷ Israel tena la bane ne sɔfore ne Lewi dea tena ne yelɡoola, ne nɛra baa dɛ daah Korowii Dea doonyoo, dɛ bonɔɔna baa dɛ ɛ toma Korowii Dea ɡe ba Jerusalam, ɡɛ saŋ Kooro Atasɛksɛs aa di kora bene anuanɛ ta.

⁸ Koojen la aa di kora bene anuanɛ, korobie anue taa sɔfo Ɛsra ba Jerusalam.

⁹ Korobiloɡle tɔpere waa tɔ sie taa ba pa mun le Babelɔn harɛ ta, asɛ korobie anue tɔpeloɡle ne tela dɛ Korowii chao o ba tel Jerusalam.

¹⁰ Sɔfo Ɛsra le o te cheɡ dɛ tɛ Korowii Mmarare la hwela ne a bini nyiŋa, asɛ dɛɛ chaɡle Korowii waa ne mmarare aa lɔ Israel harɛ ta.

Tɔn Koojen Atasɛksɛs aa chwera ka tɛ Ɛsra

¹¹ Koojen Atasɛksɛs chwerɛ waa aa teŋa nɔ tɛ sɔfo Ɛsra waa bera ɛ chicha dɛ jemɛ Korowii Mmarare ne waa waa do Israel tena a ta la bini kɛrɛdɛ.

¹² “Tɔn nɔ le men Atasɛksɛs maa ɛ koranar bwa koojen be. N chwerɔ dɛɛ tɛ sɔfo Ɛsra haa ɛ chicha, dɛɛ baɡle Korowii Waa Dɛ Di Kora Nyundua la Mmarare. N dɛ nae.

¹³ Taraken nɔ, n dɛ doe kɛŋɔ Israel te bɛlbwa waa lɔ n harɛ ta, sɔfore ne Lewi dea tena, ba bini bɛlbwa waa dɛ nyin kɛŋɔ o pui kaa Jerusalam la won kaala.

¹⁴ Men Koojen, ne n nomonome banuanɛ baa dɛ ja mɛ, dɛ tomɛ ŋɔ he ka bɔɔ dɛ na kɛ nɛra dɛ teŋɛ Korowii haa dɛ tomɔ la mmarare waa kpɔa do he nɔn ta la ta kɛɛ.

¹⁵ A chɛ kɛŋɔ hé kpɔ suuɡapoŋa ne suuɡaswɛm koojen ne nɛra baa dɛ jao aa le ba bambile bini, dɛ kpɔ tɛ Korowii Israel tena aa dɛ tomɔ, o Dea do Jerusalam la.

¹⁶ Berɛ kpɔ suuɡapoŋa ne suuɡaswɛm haa dɔa le Babelɔn harɛ ta, ne deŋnesɔɔhna sarahare Israel tena ne ba sɔfore aa kpɔa tɛ Korowii Israel tena aa dɛ tomɔ Dea waa lɔ Jerusalam la bwa.

¹⁷ Nyiŋi kɛrɛdɛ dɛ́ kpɔ a ɡɛ suuɡa nɔ yawɛ nabala ne pebala ne pebiiri, dɛ mea sarahare ne sen sarahare, dɛ́ kpɔ ɛ saraha Korowii haa dɛ tomɔ la Dea, kon baa dɛ ɛ saraha o ta Jerusalam la ta.

¹⁸ Suuɡapoŋa ne suuɡaswɛm bɛlbwa aa ka la, he ne he bala Juu tena ɛɛ won kpɔ ɛ wobɛlbwa aa wera tɛ heya, ɡɛ Korowii aa dɛ nyin.

¹⁹ Kpɔ suuɡapoŋa ne suuɡaswɛm loɡa baa kpɔa do he nɔn ta, ba kpɔ dɛɛ tomɛ Korowii haa dɛ tomɔ Dea la bwa ka tɛo Jerusalam.

²⁰ Komɛlbwa haa dɛ nyin dɛ ja Korowii Dea bini la, hé lɛa le suuɡa aa le kooro kara mun ka yawɛ.

²¹ Taraken, men Koojen Atasɛksɛs dɛ do Yufretis Moo wee cholibɔr harɛ nɛra baa dɛ cheɡ n harɛ suuɡare la ŋɔ, bá do sie tɛ sɔfo Ɛsra waa ɛ Korowii Waa Dɛ Di Kora Nyundua chicha dɛɛ baɡle o Mmarare bini la komɛlbwa waa dɛ nyin,

²² he tɛo waa, he bɛ ɡel a ɡwaa suuɡapoŋa a tɔɡre aa ɛ kilore kaɡboŋa atoro lafraanaarɛ, ne jaaɡe a tɔɡre aa ɛ kilore kaɡboŋa fi, ne sen aa ɛ ɡalɔŋre lafraanue, ne ɔleve no aa ɛ ɡalɔŋre lafraanue. Kɛ yar te, he tɛo ɡɛ del bwa waa dɛ nyin.

²³ Komɛlbwa Korowii Waa Dɛ Di Kora Nyundua aa baɡla la, hé nyiŋi kɛrɛdɛ dɛ́ ɡel á ɛ ɡɛ aa chɛa tɛo o Dea bela. Ásɛ o baah bɛ n nɛɛ kɛɛ kooro bɛlbwa waa ba di kora n habɔɔ nɛɛ di.

²⁴ A chɛ kɛ hé jemɛ ja kɛŋɔ he ta kpeɡri dɔe kɛ he lɛ toɔ bɛlbwa soo siwi le sɔfore ne Lewi dea tena, ne yelɡoola dɛ nɛra baa dɛ daah Korowii Dea doonyoo, ne bonɔɔna baa dɛ ɛ toma Korowii Dea, kɛɛ tom-ɛɛ bɛlbwa waa kaa dɛɛ ɛ toma Korowii Dea be.

²⁵ Hen sɔfo Ɛsra, che wejema Korowii haa dɛ tomɔ aa tɛɛ ta, dɛ le nomonome ne banɔ la baa jemɛ waa bola dɛɛ pa bole, ásɛ baa nyiŋi nɛra baa lɔ Yufretis Moo wee cholibɔr harɛ ta nɛ, dɛɛ teŋɛ Korowii haa dɛ tomɔ Mmarare ta. Takapɔ chaɡle banɔ la ɡe baa wola mmarare la jemɛ la.

²⁶ Nomɛlbwa waa ɛ deŋnekpeɡ Korowii haa dɛ tomɔ mmarare kɛɛ koojen mmarare ta la, a chɛ kɛ bá kpoo buɡ la ta, kɛɛ dɛ́ doŋu le o harɛ ta, kɛɛ dɛ́ kpɔ nɔn dawɛ o komɛlbwa waa dɔa ta, kɛɛ dɛ́ lawɔ ka do dea, ásɛ a ɛ deŋnetɛra tɛo.”

Sɔfo Ɛsra Korowii kpɛɛra

²⁷ Ate, sɔfo Ɛsra ŋɔ, “Korowii ya naawa aa tomɔ laanee dɔ jam. Onee ɡela Koojen Atasɛksɛs dɔ liire, dɛ ɡel ba berɛ kwaa ma Korowii Dea waa do ken, dɛ dɔ jirima cheɡ Jerusalam.

²⁸ O berɔ sune n nɛɛ kɛrɛdɛ n dɔ jirima koojen ne o nɛra baa dɛ jao, dɛ o nomonjena baa kpeɡa bwa sie. Korowii maa dɛ tomɔ aa ja n nɛɛ nomanta, n dɔ ɡbemba dɛ won boa Israel deene nomonnyuune nyoa, asɛ n ne ba berɛ ba Jerusalam.”