Ɛsra 6 - mzwDBL

Koojen Dareɔs mmara

¹ Koojen Dareɔs do mmara ŋɔ, bá nyiŋi koranar tɔne baa kpɔa cheɡ Babelɔn la bini.

² Baa ka dɛ nyiŋi la, ba na tɔn bɛl bwɛjen baa dɛ yerɔ Ɛkbatana waa lɔ Midia harɛ ta, asɛ ba chwerɛ waa aa teŋa nɔ o bini ŋɔ,

³ Koojen Saeros aa di kora Pɛɛsea harɛ benanyoa beŋkpoŋ ta la, o do mmara Korowii Dea waa lɔ Jerusalam la waa ŋɔ, “Hé berɛ kwaa ma Korowii Dea la ó ɛ bɔr nɛra aa dɛɛ ɛ sarahare bela. Gel ba ma chɔŋɛ Dea la buɡ bene la ta. A chɛ kɛ o jaŋne dɛ́ kaa nyundua ɛ naɡale fifraanuanaarɛ, ásɛ o paɡri ɡe naɡale fifraanuanaarɛ.

⁴ Ba kpɔ bwea atoro ma chɔŋɛ ɛ o danjwɛɛre ta bar aa, dɛ ba kpɔ dola dawɛ a ta. Koodem bela suuɡaa bá kpɔ bɔ a kem.

⁵ Anɔ la aa jaa ɡee kɛŋɔ suuɡaswɛm ne suuɡapoŋa loɡa aa lɔ Korowii Dea, Koojen Nebukadnesa aa paa le Jerusalam ba Babelɔn la, a chɛ kɛ bá berɛ kaa ane a buɡ ta bela tenten a fa aa cheɡa, Korowii Dea Jerusalam.”

Koojen Dareɔs do nɛra bá berɛ ɛ toma

⁶ Ate, Koojen Dareɔs chaŋe dɛ ŋɔ, “Name Tatenai waa ɛ nomonjen dɛɛ nyiŋi Yufretis Moo wee cholibɔr harɛ ta, ne Sɛta Bosenai ne he bala nomonome haa lɔ harɛ la ta la, hé le bela kaa.

⁷ He bɛ wobɛlbwa ɛ dɛ́ tɔ Korowii Dea mae toma la ŋwɛnɛ. Hé ɡel Juu tena harɛ nomoa, ne o nomonome ɡel ba berɛ kwaa ma Korowii Dea la cheɡ o buɡ bene ta bela.

⁸ N dɛ do heyaa kɛŋɔ hé cha ba, ásɛ ba won mao. Hé kpɔ suuɡa aa le Yufretis Moo wee cholibɔr harɛ baa bɔa dɛɛ do kara mun la, dɛɛ bɔ Dea la toma bɛlbwa kem, ɡɛ aa ɛ toma la bɛ ba ka che.

⁹ Tɔpere bɛlbwa a chɛ kɛ hé nyiŋi dɛɛ tɛ sɔfore baa lɔ Jerusalam kwaa baa dɛ nyin, dɛ́ kpɔ tɛɛ ba. Nabali ne peera, dɛ pebiiri baa fuh ɛ sarahare tɛ Korowii Waa Dɛ Di Kora Nyundua, ne jaaɡe ne yar ne sen dɛ ɔleve no. He bɛ ban dɛɛ vɔmɛ,

¹⁰ ɡɛ aa ɛ ásɛ ba won dɛɛ ɛ sarahare aa dɛɛ su Korowii Waa Dɛ Di Kora Nyundua siwi, dɛ́ soŋe tɛ kooro ne o bibaala ɡe.

¹¹ N berɔ dɛɛ do heyaa kɛŋɔ nomɛlbwa waa ɛ deŋnekpeɡ waa nɔ ta la, bá tɛr dola le o dea ta dɛ́ seɡre o nyoa dɛ́ kpɔ tooh ó saɡɛ. O wechɔɡa waa ɛa nomanta, o dem paɡre dɛ́ berɛ puldoa.

¹² Korowii waa le Jerusalam cheɡ ŋɔ nɛra ba bela dɛ́ baa tomɔ la, ó ir kooro kɛɛ harɛ bɛlbwa nɛra baa vɛh waa nɔ ta teŋa, kɛɛ dɛ́ ka chɔɡ Korowii Dea nɔ la. Men Koojen Dareɔs, menee do ɡɛ mmara nɔ. Bɛlbwa nyiŋi dɛɛ teŋɛ o ta kɛrɛdɛ.”

Korowii Dea kpɔe dɛ́ do o nɔn ta

¹³ Belaa Tatenai waa ɛ nomoa harɛ la ta, ne Sɛta Bosenai dɛ ba bala baa ja ba nɛɛ la, bwa ɛ waa koojen la aa do ba a ta la bwa kɛrɛdɛ ken.

¹⁴ Korowii keamere Haɡae ne Sekaria ɡbemba baa do Juu tena nomonome la nomanta, Korowii Dea toma la kaa sie ɡɛ aa chɛa. Ba tonɛ Dea la toma ɡɛ Korowii Israel tena aa dɛ tomɔ, ne Pɛɛsea harɛ Koojena Saeros, ne Dareɔs dɛ Atasɛksɛs aa do ba la.

¹⁵ Koojen Dareɔs aa di kora bene anumɛl, Adar korobie tɔpetooro wee taa ba ma Korowii Dea la tonɛ.

¹⁶ Belaa Israel tena bwa, sɔfore ne Lewi dea tena, dɛ nɛra baa kaa dɛ le bojaŋ harɛ, dɛ berɛ ba la bwa kpɔ silɛɛ kohona, dɛ kpɔ Dea la do Korowii nɔn ta.

¹⁷ Dea la kpɔe dɛ do Korowii nɔn ta la, ba kpɔ nabala lafa ne pebala lafraanɛ, dɛ pebali lafraanaarɛ ɛ sarahare, dɛ berɛ kpɔ bombala fi dɛ anɛ, bɛlbwa che tɛ Israel deene fi dɛ anɛ la, dɛ kpɔ ɛ wechɔɡa kpɔe dɛ kɛ saraha tɛ Israel tena bwa.

¹⁸ Ba bɔne sɔfore ne Lewi dea tena la bini ɡɛ bɛlbwa toma aa doa Korowii Dea waa lɔ Jerusalam la bini, ɡɛ baa chwera do Mosis Tɔn bini la.

Galekaa Tɔpejen dii

¹⁹ Korobie waa tɔ sie la tɔpera fi dɛ anaarɛ ta la, nɛra baa le bojaŋ harɛ ta dɛ ba la, di Galekaa Tɔpejen la.

²⁰ Sɔfore ne Lewi dea tena la tɔ sie laa doŋa bɛlbwa kpɔ ba nɛ, dɛ do ɡoroŋ. Asɛ Lewi dea tena la kpo Galekaa pebie la tɛ nɛra baa le bojaŋ harɛ ta dɛ ba la bwa, ne ba bala sɔfore dɛ ba ɡbabir.

²¹ Anomanta, Israel tena baa le bojaŋ harɛ ta dɛ ba la, ne nɛra baa pere ba te le waa nɛra baa wola Korowii tomɛ aa dɛ ɛa nɛɛ, dɛ so harɛ la ta bwa pɛo, dɛ ba tomɛ Korowii Israel tena aa dɛ tomɔ, dɛ di Galekaa Tɔpejen kondikwaa la.

²² Ba di Paanoo Iisi Aa Wola Toole A Ta Tɔpejen tɔpera anuanɛ silɛɛ ne, dɛkalkɛŋɔ Korowii charɛ Asiiria koojen liire, o won cha ba ba ma Korowii Israel tena aa dɛ tomɔ Dea la.