Ɛsra 5 - mzwDBL

Tatenai tɔn waa chwera ka tɛ Kooro Dareɔs

¹ A ɡɛ saŋ la, Korowii keamere Haɡae ne Sekaria waa ɛ Ido naa, pa mun dɛɛ bol Korowii waa Juu tena ne banɔ la baa lɔ Jerusalam be, Korowii Israel tena aa dɛ tomɔ sɔn ta.

² Ate, Sealteɛl bibaa Sɛrobabɛl ne Josadak bibaa Jesua aa no ba waa la, ba berɛ pa mun dɛɛ do Korowii Dea la Jerusalam ja, asɛ Korowii keamere banɛ la cha ba.

³ Gɛ saŋ la, Tatenai waa ɛ nomoa dɛɛ nyiŋi Yufretis Moo harɛ baŋ ne Sɛta Bosenai, dɛ nɛra baa ja ba nɛɛ la ba ba be, dɛ ka bɔɔ ba ŋɔ, “Umee tɛ heyaa kpeɡri ŋɔ he berɛ kwaa do Korowii Dea nɔ cheɡ o buɡ bene ta nɔ?”

⁴ Ba berɔ bɔɔ ŋɔ “Nɛra baa dɛ ma Dea nɔ sɔne ɛrɔɔ?”

⁵ Kɛ dɛ Korowii baa dɛ tomɔ la sie lɔ Juu tena nomonome la nɛ, a ɡel Pɛɛsea nomonome la ta wone ɛ wobɛlbwa, ka tel kɛŋɔ baa chwerɛ tɔn ka tɛ Koojen Dareɔs, asɛ o chaŋ ba mɔɔ.

⁶ Tatenai ne Sɛta Bosenai dɛ nɛra baa ja ba nɛɛ bwa chwerɛ tɔn ka tɛ Kooro Dareɔs.

⁷ Kenii tɔn la bini wa ɛɛ baɡle. “Tɔn nɔ dɛ ba Koojen Dareɔs be, Korowii ɡel he nyiŋi he nɛra nɛɛ deŋnesɔɔhna ne.

⁸ N naa kooro, ya dɛ nyin he jemɛ kɛŋɔ ya la Juu tena harɛ ta, bela Korowii waa kana la Dea aa lole ba berɛ kwaa dɛɛ mao la. Bwejena nee baa mao, dɛ kpɔ dadɛɛɡa dawɛ o danjwɛɛre ta. Ba toma ɛɛ wer, dɛɛ kaa wɔrɔbe nɛ, ɡɛ baa chaɡ ba la.

⁹ Ya bɔɔ ba nomonome ŋɔ, ‘Umee tɛ heyaa ŋwɛnɛ ŋɔ he berɛ kwaa ma Korowii Dea nɔɔ?’

¹⁰ Ya berɔ bɔɔ ba ba nomonome sɔna, ɡɛ aa ɛ ya won ɡel he jemɛ nɛra baa chɔ ba nyoa.

¹¹ Waa baa chaŋe yaa teŋa nɔ. ‘Ya ɛ Korowii Waa Dɛ Di Kora Nyundua ne harɛ bonɔɔna, asɛ ya berɛ kwaa dɛɛ ma Korowii Dea ba fa aa mao saŋ la bwa la. Israel kooro bɛl o fa aa dɛ di kpeɡri kohona laanee pa o mun dɛ tonɔ.

¹² Kɛ ya naanar aa ir Korowii Waa Dɛ Di Kora Nyundua bandia nomanta, o kpɔ ba do Kooro Nebukadnesa waa ɛ Babelɔn kooro nɔn ta. Kooro Nebukadnesa chɔɡ o Dea la, dɛ lawɛ nɛra la kaa bojaŋ harɛ Babelɔn.

¹³ Kɛ a bwa habɔɔ, Babelɔn koojen Saeros aa di kora benanyoa waa tɔ sie ta la, o do mmara kɛŋɔ bá berɛ kwaa ma Korowii Dea nɔ.

¹⁴ O berɔ kpɔ suuɡaswɛm ne suuɡapoŋa loɡa Kooro Nebukadnesa aa paa le Korowii Dea Jerusalam ba bil o voɡ dea bini Babelɔn la ba. Ate, Koojen Saeros kpɔ ɡɛ loɡa la tɛ Sɛsbasa waa leo harɛ la nomoa, wɛɛ nyiŋi Juda harɛ ta.

¹⁵ Dɛ ŋɔ o be ŋɔ, “Berɛ kpɔ loɡa nɔ ka cheɡ Korowii Dea Jerusalam, dɛ́ berɛ kwaa ma Dea la cheɡ o buɡ bene la ta.”

¹⁶ Anomanta, Sɛsbasa balɔ dɛ ba pa Korowii Dea la mun Jerusalam. Nɛra ta lɔ o ta dɛɛ ɛ toma baa wola tonɛ mɔɔ.’

¹⁷ N naa kooro, dɛ he sie lɛo waa, ɡel ba nyiŋi koranar tɔne bini bwɛjen Babelɔn, dɛ́ na kɛŋɔ Koojen Saeros tɛ ŋwɛnɛ ŋɔ bá kwaa ma Korowii Dea nɔ Jerusalam kɛɛ o ta ŋɔe, ásɛ dɛ ɡel ya jemɛ he liire aa lɔ waa nɔ ta.”