Ɛsra 4 - mzwDBL

Korowii Dea kwaara dɛ́ do webeɡra

¹ Juda ne Bɛnjamen tena dɔma noɔ kɛŋɔ Israel tena baa laɡ ba kaa bojaŋ harɛfale ta la berɔ ba, dɛ berɛ baa do Korowii Israel tena aa dɛ tomɔ la Korowii Dea.

² Anomanta, ba ba Sɛrobabɛl ne deene nomonnyuune la be ŋɔ, “Hé ɡel ya ba cha heya Korowii Dea nɔ toma ta, dɛkalkɛŋɔ Korowii beŋkpoŋ nɔɔ ya bwa ɛɛ tomɛ, dɛ ɛ saraha dɛɛ tɛo dɛ le saŋ Asiiria koojen Esaahadon aa ba ya ne bonɔ ba so bwa.”

³ Kɛ Sɛrobabɛl ne Jesua, dɛ Israel deene nomonnyuune la chaŋɔ ŋɔ, “Ya ta he chae hiaeh Korowii yaa dɛ tomɔ Dea toma nɔ ta. Ya ɡbo ɛɛ doo, ɡɛ Pɛɛsea Koojen Saeros aa do yaa la.”

⁴ Belaa nɛra baa soɡa bar ba la pa mun dɛɛ chɔɡ Juu tena la liire, a ɡel baa ɔmɛ Korowii Dea la toma ɛɛ.

⁵ Ba yawɛ Pɛɛsea harɛ nomonome sen ŋɔ bá chɔɡ vɔrɔwa bɛlbwa baa dɛ vɔrɔwe Dea la toma wa, dɛ le Pɛɛsea Koojena Saeros ne Dareɔs kora dii saŋ bwa.

Jerusalam kwaara dɛ́ ma webeɡra waa ja

⁶ Koojen Sɛksɛs kora dii mumpar la, ba dɔma la chwerɛ waa yaɡɛ Juda ne Jerusalam tena.

⁷ A habɔɔ, Koojen Atasɛksɛs aa baa di kora Pɛɛsea harɛ ta la, baala bane baa dɛ yer ba Bislam ne Mitredat, ne Tabeel dɛ nɛra baa ja ba nɛ chwerɛ tɔn ka tɛ Koojen Atasɛksɛs. Aram tena wobol taa ba chwera, asɛ nɛn waa kure la, ó baɡle a mun.

⁸ Rehum waa ɛ nomoa dɛɛ nyiŋi harɛ la bampera bobɛl, ne karake Simsai waa chwerɛ waa dɛɛ bil, chwerɛ Jerusalam waa aa teŋa nɔ ba tɛ Koojen Atasɛksɛs.

⁹ “Tɔn nɔ le Rehum waa ɛ nomoa dɛɛ nyiŋi harɛ la bampera, ne karake Simsai waa chwerɛ waa dɛɛ bil be. Bane ba bala baa jaa bwa, nɛra baa bol waa dɛɛ pa bole, dɛ nomonome baa dɛ nyiŋi nɛra baa le Tripolis, ne Pɛɛsea ne Ɛrɛk ne Babelɔn, dɛ Elam tena baa lɔ Susa,

¹⁰ dɛ nɛra bane Koojen Asubanipal waa dɛ di kpeɡri dɛ dɔ jirima kohona, aa doŋ ba le ba deremi ba so bwɛjen Samaria, dɛ Yufretis Moo wee cholibɔr harɛre ta la be.”

¹¹ Waa aa teŋa nɔɔ ba chwera do tɔn bini. “Tɔn nɔ dɛ ba Koojen Atasɛksɛs be, dɛ le he bonɔɔna baa soɡe Yufretis Moo wee cholibɔr la be. Ya dɛ nae kohona.

¹² N naa kooro, ya dɛ nyin he jemɛ kɛŋɔ Juu tena baa le he harɛre ta dɛ ba la kaa Jerusalam, dɛ berɛ ka kwaa dɛɛ ma deŋnekpeɡ ne nyubinikpeɡ tena bwɛjen la ja. Ba kwaarɔ dɛɛ ma o danjwɛɛre, dɛɛ kwaa a mune la ɡe.

¹³ N naa kooro, berɛ jemɛ kɛŋɔ dɛ ba wono kwaa do bwɛjen nɔ tonaa, baa toɔ bɛlbwaa bɔ tɛɛ kpa, ásɛ komɛlbwa aa he kara munii do kpa.

¹⁴ Yaa lɔ he lɔɡa nɔ, yaa nyin kɛŋɔ sihiih ba kpoe haa wola duuree dɔ, anomanta, ya kpɔ kala nɔ dɛɛ tɛɛ,

¹⁵ ásɛ he nyiŋi koranar baa tɔ he sie di kara la tɔne bini, hɛɛ nao kɛŋɔ Jerusalam ɛ deŋnekpeɡ tena bwɛ, dɛɛ ha ba koranar ne harɛ nomonome. Deŋnekpeɡ tena lɔ o ta le saŋ la bwa. A waa o fa chɔɡ la.

¹⁶ Ya ɡelɔ hɛɛ jemɛ kɛŋɔ, dɛ ba wono ma bwɛjen nɔ ne o danjwɛɛre tonaa, haa won di kpeɡri bɛlbwa harɛre aa chɔ Yufretis Moo wee cholibɔr harɛre nɛra nɛɛ kpa.”

¹⁷ Ate, koojen la chaŋe ŋɔ, “Tɔn nɔ dɛ ba Rehum waa ɛ nomoa dɛɛ nyiŋi harɛ la bampera, ne Simsai waa ɛ karake dɛ chwerɛ waa dɛɛ bil, dɛ nɛra baa ja ba nɛ, dɛ so bwɛjen Samaria ne Yufretis Moo wee cholibɔr baŋ pera bobɛlbwa kɛŋɔ, n dɛ na ba.

¹⁸ Ba kure tɔn haa chwera la n sie, dɛ baɡle o bini waa n no.

¹⁹ N le nɛra ŋɔ bá nyiŋi tɔne bini, asɛ ba na kɛŋɔ, le saŋ la bwaa Jerusalam tena le dɛ le ba koranar habɔɔ, a che a ta deŋnekpeɡ ne wesaɡasaɡare su o ta.

²⁰ Koranar baa kpeɡa Jerusalam di kora dɛ nyiŋi harɛ waa chɔ Yufretis Moo wee cholibɔr baŋ le bwa ta, dɛ ɡel ba bɔ toɔre dɛ lɛ harɛ la kwaa baa tɛɛ ba.

²¹ Anomanta, ɡel ba ŋɔ baala baa dɛ ɛ toma la be ŋɔ bá ɡel ka tel kɛŋɔ, n ɡbabir aa tɛ ŋwɛnɛ.

²² Nyiŋi kɛrɛdɛ dɛ bɛ waa nɔ vɛh, ásɛ a ba chɔɡ n liire maa dɔa Jerusalam tena nɛɛ la ta.”

²³ Baa kure Kooro Atasɛksɛs tɔn la waa baɡle Rehum ne Simsai dɛ nɛra baa ja o nɛɛ la, ba ɛ warane la Jerusalam dɛ ka ŋɔ Juu tena la be ŋɔ bá ɡel Dea la toma ɛɛ.

²⁴ Anomanta, ba ɡelɔ Korowii Dea la toma ka che, ka tel kɛŋɔ Koojen Dareɔs aa baa di kora Pɛɛsea harɛ bene anɛ ta.