Ɛsra 3 - mzwDBL

Ba berɔ kwaa ma kon baa ɛ saraha o ta tɛ Korowii

¹ Korobie anuanɛ ta la, Israel tena bwa kaa so ba bwɛɛre ta. Asɛ ba bwa pɛ ka cheme Jerusalam,

² asɛ Josadak bibaa Jesua ne o bala sɔfore, ne Sealteɛl bibaa Sɛrobabɛl ne o bala baa ja o nɛ, pa mun dɛ berɛ kwaa ma saraha kon tɛ Korowii Israel tena aa dɛ tomɔ, dɛɛ fuh saraha kwaa o ta, ɡɛ baa chwera do Korowii bonɔɔ Mosis Mmara tɔn bini la.

³ A lole kɛŋɔ dɛ ba dɛ ɔmɛ nɛra baa bar ba cheme la te, kɛ ba berɔ kwaa ma saraha kon la cheɡ o buɡ bene la ta, dɛ fuh kwaa chɔɔ ne jɔmɔra ɛ sarahare dɛɛ tɛ Korowii o ta.

⁴ Ba di Kukure Tɔpejen ɡɛ baa chwerɛ o waa bil la, dɛ fuh kwaa ɛ sarahare ɡɛ aa chɛa tɔpere bɛlbwa ta.

⁵ A habɔɔ la, ba kpɔ kwaa baa fuah dɛɛ ɛ sarahare tɔpere bɛlbwa kɛŋɔ Korobifale ne saraha kwaa baa lea cheɡ tɔpejena aa do ɡoroŋ tɛ Korowii la ne, dɛ anɔ la aa le nɛra bambile ta, ba kpɔ ba ɛ sarahare tɛ Korowii la.

⁶ Korobie anuanɛ tɔpeloɡle ta la, ba pa mun fuh kwaa ɛ sarahare tɛ Korowii, a lole kɛŋɔ dɛ ba ta Korowii Dea la mun pae mɔɔ.

Korowii Dea kwaara dɛ́ ma mumpar

⁷ Ate, nɛra la tɛ suuɡa baa kpɔ bɔ tom-ɛɛra baa dɛ peɡri bwea ne kapenta tena, dɛ berɛ kpɔ kondikwaa ne sen dɛ ɔleve noo ŋɔ, bá kpɔ ka tɛ bwɛjena Sidon ne Taaya tena, ásɛ ba kpɔ ka charɛ peleme daa le Lɛbanɔn, ásɛ dɛ taɡa kpɔ mpo sie ba Jopa, ɡɛ Pɛɛsea Koojen Saeros aa bola la.

⁸ Anomanta, bennɛɛte korobinɛɛte ta nɛra la aa le bojaŋ harɛfale ta ba la, dɛ daa la tel bela baa dɛ ba Korowii Dea la doe Jerusalam, asɛ ba pa o mun. Ate, Sealteɛl bibaa Sɛrobabɛl ne Josadak bibaa Jesua, dɛ bwɛɛla la kar ne sɔfore ne Lewi dea tena la bwa kaa ja dɛɛ ɛ toma la. Ba le Lewi dea tena baa di bene fifraanɛ, kɛɛ dɛ ɡwaa la ba ɛ nomonome dɛɛ nyiŋi tom-ɛɛra baa dɛ ma Korowii Dea la nɛ.

⁹ Jesua ne o bibaala dɛ o nimanar, ne Kadmiel ne o bibaala baa ɛ Hodavia naanar, ne Henadad bibaala, ne ba ɡe bibaala ne ba dɔɔranar ne nimanar, ba bwa aa ɛ Lewi dea tena la bwa pɛo dɛ ba ja, dɛɛ nyiŋi tom-ɛɛra baa dɛ ɛ Korowii Dea toma la nɛ.

¹⁰ Mamaala la aa pa Korowii Dea la mun la, sɔfore do ba laala dɛ ka che ba chebɔra dɛ kpoŋe bɛle, asɛ Lewi dea tena baa ɛ Asaf bibaala kpoŋe kwaa anɛ ane baa kpɔ ayaawa ɛa dɛɛ hɛlɛ, dɛ ka che ba chebɔra, dɛ lɔ dɛɛ kpɛɛ Korowii, ɡɛ Israel Kooro Devid fa aa do Israel tena la.

¹¹ Ba ɡo yela kpɛɛ Korowii dɛ jaamo ŋɔ, “Korowii wer, o nyina waa dɛ nyin Israel tena lole saŋ bɛlbwa dɛɛ la.” Asɛ nɛra la bwa moo kohona dɛ jam Korowii, dɛkalkɛ ba pa Korowii Dea la mun.

¹² Kɛ sɔfore baa ɛ nomonome ne Lewi dea tena, dɛ nomonnyuune baa tɔ sie na loɡle Dea la aa cheɡa dɛɛ nyiŋi baa pa Dea la mun la, ba wio dɛɛ dooɡe lɔŋɔre kɛrɛdɛ, asɛ bane ɡe ɛɛ do silɛɛ lɔŋɔre.

¹³ Nomɛlbwa aa won jemɛ banɔ la baa dɛ wi, ne banɔ la baa sie aa lɛa kpa, dɛkalkɛŋɔ dɛ ɡbɔɡa aa lɔ bela kan kohona dɛɛ la bojaŋ.