Ɛsra 10 - mzwDBL

Juu tena wechɔɡa bola

¹ Sɔfo Ɛsra taa ɡuŋa dɛɛ soŋe Korowii o Dea la sie, dɛ wi dɛɛ soŋe Israel tena wechɔɡa la, Israel tena baa wara, baala ne haahna, dɛ bechale baa baro cheme la ɡe wio kɛrɛdɛ.

² Belaa Jehiel bibaa Sɛkania waa ɛ Elam naa la bini bɛl ŋɔ Ɛsra be ŋɔ, “Ya waa ta kasinteŋ dɔe tɛ Korowii yaa dɛ tomɔ, kɛŋɔ yaa dɛ mo harɛre nɛra baa soɡa bar yaa nɔ haahna nɔ. Kɛ ane a bwa, ya Israel tena ta dɔ hwɛɡa.

³ Hé ɡel ya ne Korowii yaa dɛ tomɔ fɔwɛ fɔo, ásɛ ya doŋi haahna nɔ ne ba bii bwa kaa. Yaa teŋɛ waa he ne nɛra baa dɛ teŋɛ Korowii waa ta aa bola ŋɔ yá ɛ laanee. Yaa ɛa ɡɛ Korowii Mmara aa dɛ baɡle la.

⁴ Anomanta, sɔfo Ɛsra, ir nyu ne, dɛkalkɛ he nɔn taa ɡɛ waa nɔ do. Yaa che he habɔɔ, dɔ bambile dɛ́ ɛa.”

⁵ Ate, Ɛsra ir che dɛ ɡel sɔfo nomonome ne Lewi dea tena dɛ Israel tena bwa ŋwɛɛ kɛŋɔ baa ɛ ɡɛ Sɛkania aa bola laanee.

⁶ Asɛ Ɛsra le Korowii Dea la sie bela dɛ kaa Eliasib bibaa Jehohanan dea. Waa lɔ bela la, o ta kondikwaa dii dɛ vɛh nee ɡe nyɔe, dɛkalkɛŋɔ dɛ o tea bini chɔɡɔ, nɛra baa kaa bane bojaŋ harɛfale ta, ba berɛ ba ba kasinteŋ bɛ dɔe la wa.

⁷ Anomanta, ba kpɔ kala tɛ ba bola Juda harɛ ne Jerusalam bwa ŋɔ, nɛra baa kaa bane bojaŋ harɛ ta ba berɛ ba la bwa cheme Jerusalam.

⁸ Nomɛlbwa waa vɛh a ɡɛ chema nɔ mun bala ka tel tɔpera atoro la, wɛɛ paŋɛ kwaa waa dɔa bwaa, ɡɛ nomonome aa bola la, ásɛ ba berɛ doŋu le o harɛ waa soɡe o ta la ta.

⁹ Tɔpera atoro la ne tela la, dɛ baala baa soɡe Juda harɛ ne Bɛnjamen dea harɛ bwa cheme Jerusalam. Asɛ korobie anuanaarɛ tɔpera fifraanɛ ta la, ba ka so Korowii Dea dembaah bela. Dɛ bwaala dɛ nɛ kohona, asɛ ba so o bini dɛɛ chel, dɛkalkɛŋɔ dɛ ba chema la waa hiaoh kohona.

¹⁰ Belaa sɔfo Ɛsra ir che, dɛ ŋɔ ba be ŋɔ, “Hé waa ta kasinteŋ dɔe. Harɛfale ta haahnaa he mo, dɛ kpɔ wechɔɡa ba ja bolchɔɡe Israel tena aa dia ta.

¹¹ Taraken, hé bol he wechɔɡa baɡle Korowii he naawa aa tomɔ, dɛ́ɛ ɛ o bambile bini wa. Hé laa he te kpɔ harɛfala aa bar heyaa cheme nɔ nɛra, ne haahna baa wola he harɛ ta tena ɛɛ he mo ba la nɛ.”

¹² Ate, nɛra baa cheme bela la bwa sɛh takpeɡ ne ŋɔ, “He waa la wer dɛ toɡre, yaa ɛ ɡɛ haa bola nɔɔ.”

¹³ Kɛ ba berɔ bol ja ŋɔ, “Ya warɛ bonɔ asɛ bwaala ɡe ɛɛ nɛ, anomanta, yaa won che o bini wɛɛ kpo yaa ɡɛ. A ɡɛ waa nɔ ta tɔpebeŋkpoŋ kɛɛ tɔpera anɛ ɡbo waa ɛɛ, dɛkalkɛ ya nɛra yaa di bolchɔɡe ɡɛ waa nɔ ta warɔ.

¹⁴ Hé ɡel ya nomonome so dɛ́ nyiŋi a ta tɛ ya bwɛɛla bwa, ásɛ nomɛlbwa waa mo a ɡɛ haahna nɔ bɛl la, bá yerɔ ó ba tɔpere baa doo ta, dɛ́ kpɔ nomonome ne nɛra baa bol waa dɛɛ pa bole harɛ waa soɡe o ta ja ba. Kenii dɛ́ ɡel waa nɔ Korowii baah aa di ya nɛɛ a waa nɔ le ya nɛ.”

¹⁵ Nɛra la bwa no waa la mun, atane Asahɛl bibaa Jonatan ne Tikva bibaa Jaseya ɡbo. Mɛsolam ne Sabetai baa ɛ Lewi dea tena la ɡe ja ba nɛ.

¹⁶ Anomanta, nɛra baa laɡ ba kaa bojaŋ harɛfale ta ba berɛ ba la sɛh ɡɛ baa bola la ta. Asɛ sɔfo Ɛsra le baala baa ɛ deene nomonnyuune, asɛ ba chwerɛ bɛlbwa sɔn denaa ta. Korobie fi tɔpeloɡle ta la, ba soɡe harɛ dɛ nyiŋi waa la ta,

¹⁷ korobie atoro ne tela, dɛ ba bol baala baa mo haahna baa wola ba harɛ ta tena ɛɛ la waa tonɛ.

Baala baa mo harɛfala ta haahna

¹⁸ Sɔfore naanar bini, nɛra baa mo harɛfala ta haahna laanee teŋa nɔ. Josadak bibaa Jesua naanar ne o nimanar bini, Maaseya ne Eliesa ne Jarib dɛ Gedalia.

¹⁹ Ba bwa baɡɛ Korowii nyoa ŋɔ baa vɛh ba haahna laanee, asɛ bɛlbwa lawɛ pebal ba ɛ wechɔɡa kpɔe dɛ́ kɛ saraha, bolchɔɡe baa dia la wa.

²⁰ Le Ima naanar ɡe bini, Hanani ne Sebadia.

²¹ Le Harim naanar bini, Maaseya ne Elaeja ne Sɛmaya ne Jehiel dɛ Usia.

²² Le Pasur naanar bini, Elionai ne Maaseya ne Ismael ne Nɛtanɛl ne Josabad dɛ Elasa.

²³ Le Lewi dea tena ɡe bini, Josabad ne Simee ne Kelaya, ba berɔ dɛɛ yerɔ Kelita, ne Pɛtahea ne Juda dɛ Eliesa.

²⁴ Le yelɡoola ɡe bini, Eliasib. Le nɛra baa dɛ daah Korowii Dea doonyoo bini, Salum ne Telem dɛ Uri.

²⁵ Le Israel tena bane ɡe baa kaa bini, Parɔs naanaree nɔ, Ramia ne Isia ne Malkija ne Mijamin ne Eliasa ne Malkija dɛ Bɛnaya.

²⁶ Le Elam naanar bini, Matania ne Sekaria ne Jehiel ne Abdi ne Jɛremɔt dɛ Elaeja.

²⁷ Le Satu ɡe naanar bini, Elionai ne Eliasib ne Matania ne Jɛremɔt ne Sabad dɛ Asisa.

²⁸ Bebai naanar bini, Jehohanan ne Hanania ne Sabai dɛ Atlai.

²⁹ Le Bani ɡe naanar bini, Mɛsolam ne Maluk ne Adaya ne Jasub ne Seal dɛ Jɛremɔt.

³⁰ Le Pahat Moab naanar bini, Adna ne Kelal ne Bɛnaya ne Maaseya ne Matania ne Besalɛl ne Binui dɛ Manasɛ.

³¹ Le Harim ɡe naanar bini, Eliesa ne Isihija ne Malkija ne Sɛmaya dɛ Simion,

³² ne Bɛnjamen ne Maluk dɛ Sɛmaria.

³³ Dɛ le Hasum ɡe naanar bini, Matinai ne Mataata ne Sabad ne Ɛlefɛlɛt ne Jɛremai ne Manasɛ dɛ Simee.

³⁴ Bani naanar bini, Maadai ne Amram dɛ Uwɛl,

³⁵ ne Bɛnaya ne Bɛdeya dɛ Keluhi,

³⁶ ne Vania ne Mɛremɔt dɛ Eliasib,

³⁷ ne Matania ne Matinai dɛ Jaasu.

³⁸ Binui naanar bini, Simee,

³⁹ ne Sɛlɛmia ne Netan dɛ Adaya,

⁴⁰ ne Maknadibai ne Sasai dɛ Saarai,

⁴¹ ne Aasarɛl ne Sɛlɛmia dɛ Sɛmaria,

⁴² ne Salum ne Amaria dɛ Josef.

⁴³ Nɛbo ɡe naanar bini, Jeyɛl ne Matitia ne Sabad ne Sebina ne Jadai ne Joel dɛ Bɛnaya.

⁴⁴ Dɛ a ɡɛ nɛra nɔ bwa mo haahna baa wola ba harɛ ta nɛra ɛɛ, hale ba bini bane ne ba haahna loɡle. Asɛ ba doŋi haahna la ne ba bii bwa kaa.