Ɛsra 1 - mzwDBL

Koojen Saeros berɔ ɡel Juu tena ba Jerusalam

¹ Koojen Saeros baa di kora Pɛɛsea harɛ ta. O kora dii benanyoa beŋkpoŋ ta la, Korowii ɡelɔ waa waa cheɡɛ o keame Jeremia nɛɛ bol la ɛ kpela. O ɡelɔ Koojen Saeros chwerɛ tɔne kaa o harɛ bwa ta.

² O ŋɔ, “Waa men Pɛɛsea Koojen aa dɛ bol laanee kɛŋɔ, ‘Korowii Waa Dɛ Di Kora Nyundua laanee cheɡ mɛ kora harɛre nɛra bwa nɛ, dɛ berɛ lee mɛ ŋɔ ń ma o Dea tɛo Jerusalam waa lɔ Juda harɛ ta.

³ Taraken, hé nɛra haa dɛ tomɛ Korowii bwa ir kaa bela, dɛ́ ka berɛ kwaa ma Korowii Israel tena aa dɛ tomɔ Dea waa lɔ Jerusalam. Onee dɛ́ ja he nɛ.

⁴ Hé bala bane baa kaa dɛ ta so bojaŋ harɛre ta la, hé tɛɛ ba suuɡapoŋa ne suuɡaswɛm, ne laala baa kpɔ ɛ toma ne kondɛɛra, dɛ saraha kwaa aa le ba bambile ta, bá kpɔ ba Korowii Dea waa lɔ Jerusalam la bini.’ ”

⁵ Asɛ Juda ne Bɛnjamen deene nomonnyuune, ne sɔfore ne Lewi dea tena, dɛ nomɛlbwa Korowii aa ɡela o bambile aa lawa ir, dɛ́ ka berɛ kwaa ma Korowii Dea waa lɔ Jerusalam la.

⁶ Ba bala la bwa cha ba, dɛ tɛɛ ba suuɡaswɛm ne suuɡapoŋa koŋkwaa, ne laala baa kpɔ ɛ toma ne kondɛɛra, ne koŋkɛɛla a yoɡ aa kpeɡa, dɛ kpɔ ja saraha kwaa bwa aa le ba bambile ta.

⁷ A bwa habɔɔ la, Koojen Saeros berɔ kpɔ laala aa lɔ Korowii Dea Jerusalam Kooro Nebukadnesa fa aa paa, dɛ kpɔ ba cheɡ o voɡ dea bini la ba tɛɛ ba.

⁸ Koojen Saeros kpɔɔ do nomoa bɛl baa dɛ yerɔ Mitredat waa dɛ nyiŋi koodem laala a yoɡ aa kpeɡa nɔn ta, o kura, dɛ kpɔ do Sɛsbasa waa dɛ nyiŋi Juda harɛ ta nɔn ta.

⁹ Gɛ waa kure laala laanee teŋa nɔ. Suuɡaswɛm loɡa baa kpɔ dɛɛ ɛ sarahare fifraatoro, ne suuɡapoŋa loɡa baa kpɔ dɛɛ ɛ sarahare kaɡboŋ, ne suuɡapoŋa loɡbaala fifraanɛ dɛ anuanaarɛ,

¹⁰ ne suuɡaswɛm loɡjeɡre fifraatoro, ne suuɡapoŋa loɡjeɡre lafraanaarɛ dɛ fi, dɛ loɡa ane ɡe aa jaa kaɡboŋ.

¹¹ Suuɡaswɛm ne suuɡapoŋa koŋkwaa ne anɔ la aa jaa bwa lɔ kaɡboŋa anue lafraanaarɛ. Asɛ Sɛsbasa kpɔ a bwa, ɡɛ saŋ o ne nɛra baa laɡ ba kaa bojaŋ harɛfale ta Babelɔn dɛɛ ba Jerusalam la ba.