Ɛsekeɛl 8 - mzwDBL

Voɡa toma Korowii Dea

¹ Baa lawɛ yaa kaa harɛfale ta bene anumɛl korobinumɛl tɔpenue ta la, dɛ men Ɛsekeɛl soɡe n dem, asɛ Juda tena nomonome la cheme n sie, asɛ Nemenɛ Korowii Doma den ba so n nɛ.

² N nyiŋo dɛ na komɛl wepila ta kɛŋɔ nɛn ken. Le o chara ta kaa o nakpale ta do kɛŋɔ ninlao ken, dɛ berɛ le o chara ta kaa o nyundua ɡe do kɛŋɔ ayaawa baa looru wɛɛ nyɛɡle.

³ O tɛr komɛl kɛŋɔ nɛn nɔn dɛ lawɛ n nyumpona, asɛ Korowii Doma ɡɔɔ mɛ n do harɛ ne nyundua baah ta. A ɡɛ wepila nɔ ta la, Korowii kpɔ mɛ kaa Jerusalam o Dea la dembaah doonyoa waa lɔ weekaŋle nyundua pera, dɛ voɡ Korowii aa kiu kɔkɔkɔkɔ lɔ bela.

⁴ Belaa n na Korowii Israel tena aa dɛ tomɔ jirima, ɡɛ n fa aa nao Keba Moo la bɔr la.

⁵ Asɛ Korowii ŋɔ n be ŋɔ, “Nɛwɛnyini bie, nyiŋi weekaŋle nyundua pera.” Asɛ n nyiŋi doonyoa waa lɔ weekaŋle nyunduabɔr, dɛ voɡ Korowii aa kiu kɔkɔkɔkɔ la cheɡɛ kon baa dɛ ɛ saraha o ta jwɛh.

⁶ Korowii ŋɔ n be ŋɔ, “Nɛwɛnyini bie, he na waa maa kia Israel tena ɛa bonɔ kenɛ? Waa aa doŋ mɛ le n Dea kaa bojaŋee ba ɛ la. Hɛɛ na anɔ la maa kia kohonaa á ɡwaa anɔ kwara.”

⁷ Asɛ o laɡ mɛ ba dembaah la doonyoa bela. N nyiŋo dɛ na bɔɔ bɛl danjwɛɛ la ta.

⁸ O ŋɔ n be ŋɔ, “Nɛwɛnyini bie, paɡri bɔɔ nɔ.” Maa paɡru la, n nao kɛŋɔ doonyoa bɛlee.

⁹ Korowii berɔ ŋɔ, “Jo dɛ́ ka na wedoŋa ne kwaa maa kia baa ɛa bela.”

¹⁰ Ate, n jo dɛ ka na kwaa aa dɛ tuuɡi tea ta, ne anɔ la aa dɛ huuh, ne ola maa kia bwa, Israel tena voɡa baa ɛa dɛɛ toma bwa dawɛ danjwɛɛre la bwa ta.

¹¹ Dɛ Israel nomonome fifraanuanɛ lɔ bela, asɛ Safan bibaa Jaasania ja ba nɛ. Ba bɛlbwa kpoŋe kon baa dɛ fuh daawiile a ta, chuu la sɔɔh do som dɛɛ kaa nyundua.

¹² Korowii ŋɔ n be ŋɔ, “Nɛwɛnyini bie, he na waa Israel nomonome aa baa sɔh dɛɛ ɛ kenɛ? Ba lɔ dea ba voɡa aa suu bini dɛɛ toma. Waa baa dɛ bol laanee kɛŋɔ, ‘Korowii aa yaa na, o vɛh harɛ nɔ.’ ”

¹³ Korowii berɔ ŋɔ, “Hɛɛ na anɔ la maa kia kohona á ɡwaa anɔ.”

¹⁴ Korowii berɔ laɡ mɛ ba o Dea la weekaŋle nyunduabɔr doonyoa la ta, asɛ n na haahna bane baa soɡa dɛɛ wi ba voɡ bɛl baa dɛ yerɔ Taamus la seo.

¹⁵ O berɔ ŋɔ, “Nɛwɛnyini bie, he na anɔ ɡe kenɛ? Hɛɛ na anɔ la maa kia kohona á ɡwaa anɔ kwara.”

¹⁶ O berɔ kpɔ mɛ ba o Dea la dembaah bela, doonyoa bela pato la ne kon baa dɛ ɛ saraha o ta la baah ta, dɛ baala fifraanɛ dɛ banue lɔ bela. Ba habɔɔ chaɡɛ Korowii Dea la, asɛ ba sie chaɡɛ wee leebɔr pera baa tomɛ wee.

¹⁷ Korowii berɔ ŋɔ n be ŋɔ, “Nɛwɛnyini bie, he na anɔ kenɛ? Juda tena dɛ ɛ waa maa kia la, a ɡbo ta ba ne maɡrɛ, ba berɔ kpɔ naɡrenyin we-ɛɛla perɛ bwɛɛre la bwa, dɛɛ muɡli n baah, dɛɛ chɛɡ mɛ kohona.

¹⁸ Mɛɛ tɛr ba deŋnee bandia ne, maa ba nɛɛ sune, maa ba bwaraa kpɔ kɛ ba. Ba wio noo mɛ kohona noo, maa ba bee no.”