Ɛsekeɛl 7 - mzwDBL

Israel tena chɔɡa telo

¹ Nemenɛ Korowii bol men Ɛsekeɛl be ja ŋɔ,

² “Nɛwɛnyini bie, Israel tena harɛ la dɛ ba chɔɡa. O bwa ɛɛ chɔɡo kwaraa.

³ ‘Israel tena he chɔɡa telo, n dɛ ba n bandia ne he nɛ, dɛ́ ba bol he waa dɛ́ tɛr he deŋne he wechɔɡa ne waa maa kia he ɛa la wa.

⁴ Maa he nɛɛ sune, maa kpɔ kɛ heya, mɛɛ tɛr he deŋnee he wechɔɡa ne waa maa kia he ɛa la wa. Ásɛ he jemɛ kɛŋɔ menee Korowii.’ ”

⁵ Waa Nemenɛ Korowii aa dɛ bol laanee nɔ, “Harɛchɔɡ bɛl dɛ ba, haa wola o dɔŋ waa noɛ bwa.

⁶ Waa bwa jaɡa saŋ la telo, o pu heyaa tonɛ. O joɔ.

⁷ Nɛra haa soɡe harɛ la ta, he chɔɡa telo. Saŋ la telo, tɔpere la joɔ tonɛ. Silɛɛ bɛlbwa toole voɡa aa lɔ bwea dor ta kpa, sibeɡra ɡboo.

⁸ Maa biɡri dɛ́ kpɔ n bandia ba he nɛ, mɛɛ bol he waa haa ɛa la waa dɛ́ tɛr he deŋne waa maa kia he ɛa la wa.

⁹ Maa he nɛɛ sune, maa kpɔ kɛ heya. Mɛɛ tɛr he deŋnee waa haa ɛa la ne waa maa kia he ɛ la waa, ásɛ he jemɛ kɛŋɔ men Korowiirii ba a ne.

¹⁰ Tɔpere la telo, o pu heyaa tonɛ. He dachɔɡe do kɛŋɔ kwaa haa dua, a dɛ le, daŋɡbala la dɛ moɡɛ. He lwɛmkpeɡ la feɔ.

¹¹ He naɡrenyin we-ɛɛla la ɛɛ berɛ daŋɡbalaa, dɛ́ tɛr wechɔɡ-ɛɛra deŋne, ba komɛlbwa aa kae ba, ba kondɔɔh ne kwaa aa dɛ tɛɛ ba jirima la bɛlbwa aa kae ba.

¹² Tɔpere la telo, o pu heyaa tonɛ. Kon-yoɡra ne yarawa sie aa lɛ, n bandia la dɛ ba nɛnlaa la bwa nɛ.

¹³ Nomɛlbwa waa yoɡ harɛ tɛ o dɔŋ la, dɛ ba bwa ta soɡe le naa, waa berɛ dɔɔ kpa. Wepila aa dɛ baɡle nɛnlaa la bwa waa la aa beɡre. Ba wechɔɡa nomanta, beŋkpoŋ kwara aa o nyuu dɔ.

¹⁴ Ba hoh laa bɛla nomɛlbwa kpɔ o te, kɛ nɛn waa la laa toole, dɛkalkɛ n baah di nɛnlaa la bwa nɛ.

¹⁵ He leɔ kɛrɛ aa, he lɔ laa ta, he berɔ so dem ɡe aa, he ne weechɔɡa ne lɔree. Laa taa banɔ la baa lɔ kpɔɡ bini ɛɛ ba serewa. Banɔ la ɡe baa lɔ bwɛjen la ta la, weechɔɡa ne lɔree dɛɛ ba ba kpoora.

¹⁶ Banɔ la baa dɔ ba nyu dɛ chwa la ɛɛ ka so bwejena doree, dɛɛ wi kɛŋɔ fɛlembɔjena bini kwehre ken, bɛlbwa wechɔɡa waa ɛa wa.

¹⁷ Nomɛlbwa bwara ɛɛ yɔroo, ásɛ ba bwara ɛɛ sa.

¹⁸ Baa kpɔ lweyalee tɔ ɔmee laɡ ba kohona. Sihiih ɛɛ kpo baa ba fonɛ ba nyuune bwa ta, á baɡle kɛ ba dɛ di suna.

¹⁹ Baa kpɔ ba suuɡapoŋa ne suuɡaswɛmee ta fɔɡbaahna kɛŋɔ chaa. Ba suuɡapoŋa ne suuɡaswɛm la aa won lɛɛ ba le men Korowii bandia tɔpere la ta. Baa won kpɔa yawɛ kwaa di, baa won dia ɡe dɛ́ vaɡɛ, dɛkalkɛ a taa ba lɔ naa dɛ ɛ wechɔɡa.

²⁰ Ba maŋkura ba te ba suuɡaswɛm nɔnloɡa ne baŋa kwaa ne noniseɡa aa wera la, dɛ kpɔ ɛ voɡa maa kia ne kondoŋa. A waa mɛɛ ba ɡela ba kondɔɔh ɛ kondoŋa tɛɛ ba.

²¹ Mɛɛ kpɔ a bwaa tɛ nɛŋhɔɔhra, ásɛ ba kaah kɛŋɔ laa ta kwa, kɛɛ nɛnchɔɡa aa dɛ kah kwaa la, bá kpɔ doŋa kaah.

²² Mɛɛ laa sie kpɔ ba be, ásɛ ŋwɛɛra ba jo n Dea bela laala a yoɡ aa kpeɡa aa lole la, dɛ́ kpɔ doŋa kaoh.

²³ Hé nyin jɔɡrɔre cheɡ, nɛŋkpoa ɡboo harɛ la bwa, yoi ɡboo bwɛjen la bwa.

²⁴ Mɛɛ ɡeloo nɛnchɔɡa tenten le harɛre ta ba, dɛ́ ba lɛ he deene dɛ́ kpɔ. Mɛɛ ɡeloo he kpeɡnɛra haa dɛ hwɛɡɛ ba nɛɛ la nyoa sɔɔh, dɛ́ ɡel bela haa dɛ tomɛ voɡa la ɛ pɛɛpɛɛ.

²⁵ Chɔɡa la dɛ ba, hɛɛ dɛɛ nyin deŋnesɔɔhnaa, kɛ haa dɔ.

²⁶ Harɛchɔɡ ɛɛ teŋɛ dɔŋa nɛɛ dɛɛ ba, waa aa wola kasinteŋ ɛɛ la ɡe ɛɛ warɔɔ saŋ bɛlbwa. Hɛɛ dɛɛ nyinuu kɛ he no wepila waa le n keamere be. N waa la nyoɡre sɔfore liire ta, baa won bola kpa. Nomonome ɡe aa won jemɛ ja nɛra kpa.

²⁷ Kooro ɛɛ wiu, sitɔɔ bwara yɔr, ásɛ harɛ la ta nɛra bwara ɛɛ sa. He we-ɛɛla taa mɛɛ ba cheɡa dɛ́ tɛr he deŋne, he wechɔɡa haa ɛa mɛɛ ba kpɔe pa heyaa bolchɔɡe, ɡɛ haa ɛ he bala la. Ásɛ he jemɛ kɛŋɔ menee Korowii.”