Ɛsekeɛl 48 - mzwDBL

Israel harɛ bɔna denaa ta

¹ Nemenɛ Korowii berɔ ŋɔ, “Kenii Israel deene sɔna ne harɛ la waa do. Harɛ la weekaŋle nyunduabɔr jwɛh la, Dan dea tena ɛɛ dɔ ba konee. Wɛɛ chɔɔ le bwɛjen Hɛtlɔn ŋwɛnɛ ta, dɛ́ kaa bela baa cheɡa dɛɛ kaa bwɛjen Hamat, dɛ́ le bwɛjen Enan ta kaa bwɛjen Damaskɔs weekaŋle nyundua, dɛ́ kaa Hamat la ɛɛ ɛ ba harɛ la jwɛh bɛlee, dɛ́ teŋe le wee leebɔr pera ba kaa wee cholibɔr.

² Aasa dea tena ɡe ɛɛ dɔ ba konee. Ba ne Dan dea tena do jwɛh, wɛɛ le wee leebɔree teŋe ba kaa wee cholibɔr.

³ Naftale dea tena ɡe ɛɛ dɔ ba konee. Ba ne Aasa dea tena do jwɛh, wɛɛ le wee leebɔree teŋe ba kaa wee cholibɔr.

⁴ Manasɛ dea tena ɡe ɛɛ dɔ ba konee. Ba ne Naftale dea tena do jwɛh, wɛɛ le wee leebɔree teŋe ba kaa wee cholibɔr.

⁵ Efrem dea tena ɡe ɛɛ dɔ ba konee. Ba ne Manasɛ dea tena do jwɛh, wɛɛ le wee leebɔree teŋe ba kaa wee cholibɔr.

⁶ Rubin dea tena ɡe ɛɛ dɔ ba konee. Ba ne Efrem dea tena do jwɛh, wɛɛ le wee leebɔree teŋe ba kaa wee cholibɔr.

⁷ Juda dea tena ɡe ɛɛ dɔ ba konee. Ba ne Rubin dea tena do jwɛh, wɛɛ le wee leebɔree teŋe ba kaa wee cholibɔr.

⁸ Harɛ o ne Juda dea tena kon aa do jwɛh, dɛ́ le wee leebɔr ba kaa wee cholibɔr la, bá le cheɡ mɛ o korɛ. O paɡri ɛ naɡale kaɡboŋa fifraatoro dɛ anuanɛ lafraanue, o jaŋne dɛ le o wee leebɔr teŋe ba kaa wee cholibɔr pera ɡe do kɛŋɔ deene la kwaa baa dɔa la dɔŋa, ásɛ n Dea la che o baah ta.

⁹ Harɛ la pera waa kora he le cheɡ mɛ la chɛ kɛ o jaŋne ɛ naɡale kaɡboŋa fifraatoro dɛ anuanɛ lafraanue, o paɡri ɡe ɛ naɡale kaɡboŋa fi dɛ anue.

¹⁰ Belaa dɛ́ ɛ bɔr waa do ɡoroŋ dɛ tɛ sɔfore. O weekaŋle nyunduabɔr jaŋne ɛ naɡale kaɡboŋa fifraatoro dɛ anuanɛ lafraanue, wee cholibɔr paɡri ɛ naɡale kaɡboŋa fi dɛ anue. O wee leebɔr paɡri ɡe ɛ naɡale kaɡboŋa fi dɛ anue, ásɛ o weekaŋle harɛbɔr pera jaŋne ɛ naɡale kaɡboŋa fifraatoro dɛ anuanɛ lafraanue. O baah taa chɛ kɛ n Dea la che.

¹¹ Wɛɛ ɛ sɔfore la konee, Sadɔk naanar baa tom mɛ kasinteŋ ne, ba ta n ŋwɛnɛ ta leɛ, kɛŋɔ Lewi dea tena la bane aa ɛa ɡɛ saŋ Israel tena aa berɛ habɔɔ kpo mɛ la.

¹² A ɡɛ harɛ laanee dɛ́ ɛ ba dibɔr maa kpɔa tɛɛ ba ó korɛ le harɛ la ta. O ɛ harɛ waa do ɡoroŋ kohona dɛ do ba ne Lewi dea tena jwɛh ta.

¹³ Sɔfore harɛ jwɛh ta bela la, Lewi dea tena la ɛɛ dɔ harɛ o jaŋne aa ɛ naɡale kaɡboŋa fifraatoro dɛ anuanɛ lafraanuee, o paɡri ɛ naɡale kaɡboŋa fi dɛ anue.

¹⁴ A ta chɛ kɛ bá yoɡ harɛ la kɛɛ bá kpɔ charɛ komɛl. Harɛ la pera waa dena do ɡoroŋ dɛ do wer ɡwaa a bwa laanee. A ta chɛ kɛ ó kaa nɛnfala be, dɛkalkɛ o do ɡoroŋ dɛ tɛ men Korowii.

¹⁵ Harɛ la kabora o paɡri aa ɛ naɡale kaɡboŋa anuanɛ lafraanue, o jaŋne ɡe ɛ naɡale kaɡboŋa fifraatoro dɛ anuanɛ lafraanue la ɛ nomɛlbwa bɔr harɛ la ta tena aa do deene, ne bela ba kondɛɛra aa dɛɛ di, ásɛ bwɛjen la do baah ta.

¹⁶ Gɛ bwɛjen la aa dɛ ba doe laanee nɔ. O baŋne anaarɛ la bɛlbwa lɔ naɡale kaɡboŋa anumɛl lafraanuanɛ fifraanue.

¹⁷ Harɛ bwɛjen la kondɛɛra aa di o ta la baŋne anaarɛ la bɛlbwa chɛ kɛ ó ɛ naɡale lafraatoro fifraanuanɛ dɛ anue.

¹⁸ Harɛ waa ka o ne n Dea la jwɛh ta jaŋne chɛ kɛ ó ɛ naɡale kaɡboŋa fi dɛ anue wee leebɔr pera, ásɛ wee cholibɔr ɡe ɛ naɡale kaɡboŋa fi dɛ anue. O taa kondikwa ɛɛ ba lee dɛ́ tɛ nɛra baa lɔ bwɛjen la ta bwa.

¹⁹ Israel dea bɛlbwa ta nɛra baa lɔ bwɛjen la taa dɛɛ ba kooni harɛ la ta para.

²⁰ Harɛ la bwa ɛ fɔɔskwɛɛ. Naɡale kaɡboŋa fifraatoro dɛ anuanɛ lafraanue baŋ bɛlbwa ta. A chɛ kɛ bá le n Dea la harɛ ó korɛ ja bwɛjen la kon ta.

²¹ Komɛlbwa waa ka baŋ bɛlbwa ta n Dea la ne bwɛjen la bɔr la ta bwa ɛ kooro la kwa. Le bela dɛ́ kaa wee leebɔr ɛ naɡale kaɡboŋa fifraatoro dɛ anuanɛ lafraanue, dɛ́ teŋe ba kaa wee cholibɔr jwɛh ta, naɡale kaɡboŋa fifraatoro dɛ anuanɛ lafraanue dɛ́ kaa wee cholibɔr jwɛh la ta. Gɛ bɔra anɛ nɔ bwa ɛ́ kooro la kwa, ásɛ n Dea la che baah ta.

²² Gɛɛ Lewi dea tena harɛ ne bwɛjen la harɛ la ɛɛ ba baah ta chɔe, dɛ́ do kooro la kon la baah ta. Bɔr waa ɛ kooro la kon la ɛɛ chɔ jwɛh waa lɔ Juda ne Bɛnjamen deene jwɛh la baah taa.

²³ Deene aa kaa la te, bɔrbeŋkpoŋii Bɛnjamen dea tena ɛɛ ba dɔe. Wɛɛ le wee leebɔree teŋe ba kaa wee cholibɔr.

²⁴ Simeon dea tena ɡe ɛɛ dɔ bɔrbeŋkpoŋii. Ba jwɛh le Bɛnjamen dea tena jwɛh ta, wɛɛ le wee leebɔree teŋe ba kaa wee cholibɔr.

²⁵ Isaaka dea tena ɛɛ dɔ bɔrbeŋkpoŋii. Ba jwɛh le Simeon dea tena jwɛh ta, wɛɛ le wee leebɔree teŋe ba kaa wee cholibɔr.

²⁶ Sebulon dea tena ɛɛ dɔ bɔrbeŋkpoŋii. Ba jwɛh le Isaaka dea tena jwɛh ta, wɛɛ le wee leebɔree teŋe ba kaa wee cholibɔr.

²⁷ Gad dea tena ɛɛ dɔ bɔrbeŋkpoŋii. Ba jwɛh le Sebulon dea tena jwɛh ta, wɛɛ le wee leebɔree teŋe ba kaa wee cholibɔr.

²⁸ Gad dea tena harɛ ɛɛ le weekaŋle harɛbɔr jwɛh taa dɛ́ le Taama, dɛ́ ba neerare aa lɔ Mɛreba Kades, dɛ́ kpoŋe kaa nenabɔɔ waa lɔ Ijipt harɛ jwɛh ta, dɛ́ kaa Mɛdetereenea Mpo ta.

²⁹ Gɛɛ harɛ baa dɛ ba bɔna tɛ Israel deene á ɛ ba kapɛrɛ kwaa la waa do, ásɛ bɛlbwa dɔ o kon. Men Nemenɛ Korowiirii bola.”

Bwɛjen la doonyoo

³⁰ Men Korowii berɛ ŋɔ, “Kenii doonyoo baa che a ta dɛɛ le bwɛjen la ta waa do. Le weekaŋle nyunduabɔr la, o jaŋne lɔ naɡale kaɡboŋa anumɛl lafraanuanɛ fifraanue.

³¹ Baa kpɔ Israel deene sɔnaa pa doonyoo aa lɔ bwɛjen la ta. Doonyoo atoroo lɔ weekaŋle nyunduabɔr ba kpɔ Rubin ne Juda dɛ Lewi deene sɔna paa.

³² O wee leebɔr pera jaŋne lɔ naɡale kaɡboŋa anumɛl lafraanuanɛ fifraanue. Doonyoo atoroo lɔ bela, ba kpɔ Josef ne Bɛnjamen dɛ Dan deene sɔna paa.

³³ Weekaŋle harɛbɔr ɡe jaŋne lɔ naɡale kaɡboŋa anumɛl lafraanuanɛ fifraanue. Doonyoo atoroo lɔ bela, ba kpɔ Simeon ne Isaaka dɛ Sebulon deene sɔna paa.

³⁴ O wee cholibɔr pera la jaŋne lɔ naɡale kaɡboŋa anumɛl lafraanuanɛ fifraanue. Doonyoo atoroo lɔ bela, ba kpɔ Gad ne Aasa dɛ Naftale deene sɔna paa.

³⁵ Harɛ la bwa jaŋne dɛ bar la ɛɛ ɛ naɡale kaɡboŋa fifraanɛ dɛ anuanɛɛ. Dɛ le awola dɛ kaa la, baa yerɛ bwɛjen la, ‘korowii lɔ bela.’ ”