Ɛsekeɛl 46 - mzwDBL

Kooro la ne Tɔpejena Dii

¹ Nemenɛ Korowii ŋɔ, “Doonyoa waa lɔ bini dembaah o sie chaɡɛ wee leebɔr la chɛ kɛŋɔ ó tɔ tɔpera anumɛl baa dɛ ɛ toma la, kɛ Ona Tɔpere ne Korobifale Tɔpejena dii ta te, a chɛ kɛŋɔ hé pilu.

² Kooro la chɛ kɛ ó che habɔɔ dembaah bela jo, dɛ kpɔ ŋwɛnɛ baa kpɔ o ta dɛɛ jo, dɛ́ ba che doonyoa ɡbera la jwɛh. Ásɛ sɔfore la kpɔ o saraha kwaa baa fuah, ne deŋnesɔɔhna saraha kwaa ba ɛ saraha tɛ mɛ. Ó tomɛ men Korowii doonyoa bela, dɛ́ berɛ le kaa. A ta chɛ kɛ ba tɔ ɡbera la nemenɛ jɔmɔra.

³ Ona Tɔpera ne Korobifala Tɔpejena dii ta, harɛ la ta nɛra bwa chɛ kɛŋɔ bá ba doonyoa la ta bela, dɛ́ ba tom mɛ.

⁴ Ona Tɔpere ta la, kooro la chɛ kɛ ó kpɔ pebali anumɛl ne pebal a bɛlbwa aa wola kirihiah dii ba fuah ɛ saraha tɛ men Korowii.

⁵ Mea saraha waa kpɔ ja pebal la ta la chɛ kɛ á ɛ mea kuruware fi, mea saraha waa kpɔ ja pebali la ta la te, ó kpɔ ɡɛ waa dɛ nyin, dɛ́ kpɔ noo pɛrɛntoa dela anumɛl koo men kuruwa bɛlbwa ta.

⁶ Korobifale Tɔpejen dii ta, kooro la lawɛ nabale ne pebiiri anumɛl, dɛ pebal a bɛlbwa aa wola kirihiah dii, dɛ́ kpɔ ba ɛ saraha.

⁷ A chɛ kɛ ó kpɔ mea kuruware fi ja nabale la ta ɛ mea saraha, men kuruware fi ja pebal la ta, ásɛ dɛ kpɔ mea la ɡɛ bɛlbwa waa dɛ nyin ja pebiiri la ta, dɛ́ kpɔ noo pɛrɛntoa dela anumɛl ja men kuruware fi bɛlbwa ta.

⁸ Kooro la kpɔ doonyoa la ta jo aa, ó berɛ che bela le.

⁹ Harɛ la ta nɛra dɛ ba n sie dɛ ba tomɛ tɔpejena baa lea cheɡ la ta naa, nomɛlbwa waa cheɡɛ weekaŋle nyunduabɔr doonyoa la ta jo dɛ ba tom mɛ la, ó ka che o weekaŋle harɛbɔr doonyoa la ta le. Bɛlbwa ɡe waa che weekaŋle harɛbɔr doonyoa ta dɛ́ jo la, ó che o weekaŋle nyundua doonyoa la ta le. Bela bɛlbwa aa che dɛ́ jo la, ó che baŋ bɛl le.

¹⁰ Kooro la chɛ kɛ ó ja ba nɛɛ jo, ba dɛ le ɡe aa, bá bwa pɛ le.

¹¹ Tɔpejena dii, ne tɔpera baa lea cheɡ dɛ́ di kwaa dɛɛ lɛ sie ta, mea saraha la chɛ kɛ a ɛ mea kuruware fi dɛ ja nabale ta, men kuruware fi ja pebal ta, ásɛ pebiiri la ɡe ó kpɔ ɡɛ bɛlbwa waa dɛ nyin, dɛ́ kpɔ noo pɛrɛntoa dela anumɛl ja mea kuruware fi bɛlbwa ta.

¹² Kooro la dɛ ba ba ɛ saraha aa le o bambile ta, dɛ saraha kwaa baa fuah kɛɛ dɛ deŋnesɔɔhna sarahare dɛ kpoa tɛ mɛ naa, bá pili doonyoa o sie aa chaɡɛ wee leebɔr la tɛo ó jo. A chɛ kɛ ó ɛ saraha kwaa baa fuah kɛɛ deŋnesɔɔhna saraha kwaa la ɡɛ waa dɛ ɛ Ona Tɔpere ta la. Ásɛ dɛ o baa le kaa laa, ba laa ɡbera la tɔ.

Tɔpere bɛlbwa saraha

¹³ Tɔpere te bɛlbwa chɔɔbɔr, a chɛ kɛ he lawɛ pebie waa wola kirihiah bɛlbwa dii dɛ di benanyoa ba ɛ saraha dɛ́ kpoo, dɛ́ fuuh tɛ men Korowii.

¹⁴ Hé kpɔ mea kuruwa beŋkpoŋ ne tama ja a ta chɔɔbɔr bɛlbwa, ásɛ a ɛ mea saraha dɛ́ kpɔ noo pɛrɛntoa dela anɛ koo a ta a pweh. Mea saraha kpɔe ba tɛ mɛ chɛ kɛ á chɔ le saŋ bɛlbwa dɛɛ la.

¹⁵ Gɛɛ hɛɛ ba pebie la ne mea saraha, dɛ noo la kpɔe dɛ́ baa ɛ saraha baa fuah chɔɔbɔr bɛlbwa dɛɛ tɛ men Korowii.”

¹⁶ Nemenɛ Korowii ŋɔ, “Dɛ kooro la pere o harɛ pera tɛ o bibaa bɛl aa, dɛ harɛ la berɛ o bie la ɡe ne o naanar kon. Ó ɛ ba kapɛrɛ kon dɛ́ do ba luɡe ta.

¹⁷ Kɛ dɛ o kpɔ o harɛ la pera tɛ o bonɔɔ bɛl aa, bonɔɔ la kpɔ ka tel benanyoa baa berɛ kwaa dɛɛ tɛ a tena, ásɛ o berɛ kon la tɛ kooro la ó berɛ ɛ o kon, o ne o bii ɡboo dɛ won dɔɔ pi.

¹⁸ Kooro la ta chɛ kɛ ó lɛ nɛra la kapɛrɛ kon bɛlbwa le ba be. A chɛ kɛ ó tɛ o bii la ba ɡe harɛ ó ɛ ba ɡe kapɛrɛ kon, ɡɛ aa ɛ ásɛ n nɛra nɔ bini bɛlbwa komɛlbwa bɛ o nɔn ta le.”

Korowii Dea bela baa dɛ daa kwa

¹⁹ Baa la berɔ kpɔ men Ɛsekeɛl jo deene aa sie chaɡɛ weekaŋle nyunduabɔr dɛ bɛne weekaŋle harɛbɔr doonyoa, bini dembaah la bɔr. A ɛ deene aa do ɡoroŋ dɛ tɛ sɔfore la. O baɡ mɛ bobɛl waa lɔ deene aa lɔ wee cholibɔr pera.

²⁰ Baa la ŋɔ n be ŋɔ, “Bonɔɔ sɔfore la ɛɛ ba bolchɔɡe dii sarahare ne wechɔɡa kpɔe dɛ kɛ saraha kwaa dɛɛ daala, dɛ wɔɔ mea saraha kwa, ɡɛ aa ɛ ba bɛ kwaa aa do ɡoroŋ kpɔ le kaa habɔɔ dembaah la bini, dɛ́ kpɔ waa ka ta nɛra la nɛ.”

²¹ Belaa o kpɔ mɛ ba jo habɔɔ dembaah la ta, dɛ tɔ n sie ya ka kpɔ o loŋkoni anaarɛ la bwa ta. Loŋkora bɛlbwa ta, n na dembaah bela.

²² Loŋkoni anaarɛ aa lɔ habɔɔ dembaah la bini la, dembaahna lɔ o bini bela bwa. Bɛlbwa jaŋne lɔ naɡale fifraanumɛl, asɛ a paɡri ɡe ɛ naɡale fifraanaarɛ dɛ anue, a bwa kɛrɛdɛ.

²³ Dembaahna la bini bɛlbwa, ba kpɔ bwea ma danjwɛɛre bar. Ba berɔ ma bɔra baa mar nii a ta bar a lɔɡa.

²⁴ Baa la ŋɔ n be ŋɔ, “Bonɔɔ Korowii Dea tom-ɛɛra la ɛɛ ba saraha kwaa nɛra aa kpɔa dɛɛ ba la daala.”