Ɛsekeɛl 45 - mzwDBL

Israel harɛ la bɔna

¹ Korowii ŋɔ, “He dɛ ba harɛ la bɔna tɛ Israel dea bɛlbwa ó ɛ o kapɛrɛ kon aa, a chɛ kɛ he le o pera cheɡ tɛ men Korowii, ó ɛ bɔr waa do ɡoroŋ. O jaŋne ɛ naɡale kaɡboŋa fifraatoro dɛ anuanɛ lafraanue, asɛ o paɡri ɡe ɛ naɡale kaɡboŋa fifraatoro. Bela bɔr la bwa ɛɛ do ɡoroŋee.

² A ɡɛ bɔr la jaŋne ne o paɡri ɛ naɡale kaɡboŋa lafraanuanɛ lafraanue, ásɛ n Dea la che o baah ta, ásɛ harɛ chɔ dɛ́ ɛ naɡale fifraanuanɛ dɛ anue dɛ́ baro.

³ Bɔne harɛ la bini, dɛ maɡɛ bɔr o jaŋne aa ɛ naɡale kaɡboŋa fifraatoro dɛ anuanɛ lafraanue, ásɛ o paɡri ɡe ɛ naɡale kaɡboŋa fi dɛ anue. Belaa n Dea waa ɛ Boɡoroŋ Tenten la ɛɛ ba cheɡa.

⁴ Belaa dɛ́ ɛ bɔr tɛ sɔfore baa ba n sie dɛ́ baa tom mɛ. Belaa ba deene ne n Dea waa ɛ boɡoroŋ la ɛɛ ba cheɡa.

⁵ Harɛ la pera naɡale kaɡboŋa fifraanuanɛ dɛ anuanɛ lafraanue waa ɛ o jaŋne, ne naɡale kaɡboŋa fi dɛ anue waa ɛ o paɡri la chɛ kɛ o ɛ Lewi dea tena baa dɛ ɛ toma n Dea la kon. Ásɛ ba vɔrɔwe bwɛɛre o kar la ta.

⁶ Harɛ la pera bwɛjen la aa che o ta la paɡri ɛ naɡale kaɡboŋa anuanɛ lafraanue, o jaŋne ɡe ɛ naɡale kaɡboŋa fifraatoro dɛ anuanɛ lafraanue, dɛ́ teŋɛ bɔr waa do ɡoroŋ la ta. Ó ɛ Israel tena bwa kon.

⁷ Kooro o taa soɡe le chɛ kɛ ó dɔ harɛ la pera ka jaɡɛ baŋ bɛlbwa jwɛh ta, dɛ́ le harɛ waa do ɡoroŋ ne bwɛjen kon la ta. Wɛɛ le wee cholibɔree kaa, dɛ́ le wee leebɔr ɡe kaa. Wɛɛ do jaŋnee le wee leebɔr teŋe ba kaa wee cholibɔr, dɛ́ do ɡɛ Israel dea bɛlbwa kon aa doa.

⁸ Gɛ harɛ nɔɔ dɛ́ ɛ kooro la kon Israel harɛ ta, ásɛ n koranar aa n nɛraa dɛɛ fiiɡi kpa, dɛ́ tɛ Israel dea bɛlbwa ŋwɛnɛ ó dɔ o harɛ ɡɛ aa chɛa.”

⁹ Nemenɛ Korowii ŋɔ, “Israel koranar, he wechɔɡa la ɡwaalɔ to. Hé ɡel naɡrenyin, ne fiiɡa haa dɛ fiiɡi nɛra la, dɛɛ ɛ anɔ la aa wera dɛ toɡre. He bɛ n nɛra doŋi le ba harɛ ta dɛ́ kpɔ ɛ he kon. Men Korowiirii bola.

¹⁰ Hé kpɔ kwaa aa chɛa dɛɛ maɡɛ kwaa tɔɡre ne a wara.

¹¹ Kuruware ne loŋa haa kpɔa dɛɛ maɡɛ kwaa bwa chɛ kɛ a ɛ kɛrɛdɛ.

¹² Suuɡapoŋ beŋkpoŋ tɔɡre lɔ suuɡa bwejeɡre fifraanɛ. Suuɡapoŋa fifraanumɛl tɔɡre lɔ mina beŋkpoŋ.”

Sarahare ne Tɔpejena Dii

¹³ Korowii berɔ ŋɔ, “Koŋkɛɛla aa wera hé kpɔ ba ɛ saraha tɛ mɛ laanee, mea kuruware anumɛl dɛ le kuruware lafa bɛlbwa ta, ásɛ mea ane soo siwi ta ɡe, he ɛ ɡɛ tenten.

¹⁴ Hé bɔne noo ɡalɔŋre anue bini bɔre fi aa, n bɔr lɔ o ta bɔrbeŋkpoŋ. Gɛɛ a do noo ɡalɔŋre fifraanue bɛlbwa ta.

¹⁵ Pee beŋkpoŋii chɛ kɛ hé lawɛ le kondɛɛre lafraanɛ bɛlbwa aa dɔ dibɔrdɛɛɡe Israel harɛ ta dɛɛ di ba tɛ mɛ. A ɡɛ peera laanee baa ba kpɔe ja mea sarahare ne saraha kwaa baa fuah, dɛ deŋnesɔɔhna sarahare ta, dɛ́ kpɔ soŋe nɛra la wechɔɡa n be n kpɔ kɛ ba. Men Nemenɛ Korowiirii bola.

¹⁶ Harɛ la ta nɛra bwa kpɔ koŋkɛɛla ba tɛ kooro waa lɔ Israel harɛ ta ó ɛ saraha.

¹⁷ A ɛ kooro la toma kɛŋɔ ó kpɔ saraha kwaa baa fuah, ne mea sarahare, dɛ sen sarahare tɛ tɔpejena ne Korobifala dɛ Ona Tɔpera dii ta. Wɛɛ kpɔ wechɔɡa kpɔe dɛ kɛ sarahare, ne mea sarahare, ne sarahare baa dɛ fuah, dɛ deŋnesɔɔhna saraharee ba soŋe Israel tena wechɔɡa n be, ń kpɔ kɛ ba.

¹⁸ Waa Nemenɛ Korowii aa dɛ bol laanee nɔ. Korobiloɡle la tɔpere waa tɔ sie ta, a chɛ kɛ he lawɛ nabale waa wola kirihiah bɛlbwa dii dɛ́ kpo, dɛ́ ba laa doŋa kpɔ n Dea la ta.

¹⁹ Sɔfo la kpɔ nabale baa kpɔa ba ɛ wechɔɡa kpɔe dɛ kɛ saraha la chal la ane ba ɛ n Dea doonyoa daa la ta, ne saraha kon la loŋkoni anaarɛ ta, dɛ doonyoo daa aa lɔ bini dembaah la ta.

²⁰ A chɛ kɛ he berɛ ɛ ɡɛ tenten korobie la tɔpenuanɛ wee ta tɛ nomɛlbwa waa wola saahnɛ, kɛɛ waa wola jemɛ dɛ ɛ wechɔɡa. Gɛɛ hɛɛ ba soŋa le n be dɛ́ laa doŋa bɛlbwa kpɔ n Dea la ta ó do ɡoroŋ.

²¹ Korobiloɡle la tɔpera fi dɛ anaarɛ ta, a chɛ kɛ he di Galekaa Tɔpejen tɔpera anuanɛ. Hɛ́ɛ di paanoo iisi aa wola toole a ta.

²² Tɔpeloɡle ta la, kooro la lawɛ nabale ba ɛ wechɔɡa kpɔe dɛ kɛ saraha tɛ o te, ne harɛ la ta nɛra bwa.

²³ Tɔpejen la dii tɔpera anuanɛ ta la, tɔpere bɛlbwa a chɛ kɛ o lawɛ nabali anuanɛ, ne pebala anuanɛ bɛlbwa aa wola kirihiah dii, dɛ́ ba ɛ saraha baa fuah tɛ mɛ. Tɔpere bɛlbwa, ó berɛ lawɛ bombal ba ɛ wechɔɡa kpɔe dɛ kɛ saraha.

²⁴ Nabali la bɛlbwa ta la, ó kpɔ men kuruware fi dɛ́ ba ɛ mea saraha, dɛ́ kpɔ men kuruware fi ja pebala la bɛlbwa ɡe ta, dɛ́ kpɔ noo pɛrɛntoa dela anumɛl ja men kuruware fi bɛlbwa ta.

²⁵ Kukure Tɔpejen dii, tɔpenuanɛ wee waa dɛ pa mun korobie anuanɛ, tɔpera fi dɛ anue ta la, a chɛ kɛ kooro la ɛ ɡɛ tenten tɔpera anuanɛ ja wechɔɡa kpɔe dɛ kɛ sarahare, ne saraha baa dɛ fuah, ne mea sarahare, dɛ noo waa kpɔ ba la ta.”