Ɛsekeɛl 44 - mzwDBL

Kooro ne Lewi dea tena dɛ sɔfore

¹ Belaa baa la lawɛ men Ɛsekeɛl ba Korowii Dea la wee leebɔr doonyoa la ta, dɛ o tɔɔ.

² Ate, Korowii ŋɔ n be ŋɔ, “Den ɡel doonyoa nɔ tɔ ɡɛ. Bɛ on pili, nomɛlbwa ɡe bɛ o ta kpɔ, dɛkalkɛ men Korowii Israel tena aa dɛ tom mɛ la, n kpɔ o ta.

³ Kooro ɡboo dɔ ŋwɛnɛ dɛ́ jo ka di kondikwaa aa do ɡoroŋ n sie bela. Bela baa cheɡa dɛɛ jo laanee chɛ kɛ o che jo, dɛ́ berɛ che o ta le.”

⁴ Baa la kpɔ mɛ kpɔ weekaŋle nyunduabɔr doonyoa ta, dɛ ba n ne Korowii Dea la sie. Asɛ n na kɛŋɔ Korowii jirima baa su o Dea la bini bwa, asɛ n ba harɛ dɛ kpɔ sie pi harɛ.

⁵ Korowii ŋɔ n be ŋɔ, “Nɛwɛnyini bie, cheɡ deŋne kɛrɛdɛ, dɛ́ no n mmarare ne waa bwa aa chɔ le tɛ n Dea la. Do sie dɛɛ nyiŋi doonyoo ne bɔra baa cheɡɛ a ta jo dɛɛ le a ta bwa.

⁶ Ŋɔ Israel lwɛmkpeɡ tena la be ŋɔ men Nemenɛ Korowii dɛ bol kɛŋɔ, ‘Israel tena, waa maa kia hɛɛ ɛ la maɡre ɡɛ.

⁷ A bwa habɔɔ, he ɡelɔ nɛŋhɔɔhra baa wola ba pena teŋe, baa wola men duu, ba jo n Dea la ta, dɛ kpɔ doŋa kaoh, ɡɛ saŋ haa kpɔ kondikwaa ne ola noorare, dɛ a chale ba ɛ saraha dɛɛ tɛ mɛ. A cheɡɛ a ta he chɔɡ n ne he fɔo la.

⁸ Heyaa chɛ kɛ he nyiŋi n waa aa do ɡoroŋ ta n Dea bela, kɛ he berɔ kpɔ do nɛŋhɔɔhra nɔn ta.

⁹ Anomanta, men Nemenɛ Korowii ŋɔ nɛŋhɔɔhra baa wola ba pena teŋe, baa wola men duu, ta chɛ kɛŋɔ bá jo n Dea la bini, hale nɛŋhɔɔhra baa soɡe he Israel tena bini.’ ”

¹⁰ Korowii ŋɔ n be ŋɔ, “Mɛɛ tɛr Lewi dea tena ba ne Israel tena aa le n habɔɔ dɛ kaa tomɛ voɡa la deŋnee.

¹¹ Ba ken ɛɛ dɔ bɔree dɛɛ daah n Dea doonyoo la, dɛɛ ɛ toma bela. Baa kpo saraha kwaa baa fuah, ne nɛra la kwaa baa kpoora, dɛɛ cha ba.

¹² Baa tomɛ voɡa dɛ ɡel Israel tena ɛ wechɔɡa nomanta, n ir nɔn dɛ ŋwɛɛ kɛŋɔ a chɛ kɛ ba dɔ deŋnetɛra ba wechɔɡa la wa. Men Nemenɛ Korowiirii bola.

¹³ Ba bɛ n sie ba, dɛ́ ba tom mɛ kɛŋɔ sɔfore, kɛɛ dɛ́ ŋɔ baa tuuhnu tel kwaa aa do ɡoroŋ, ne saraha aa do ɡoroŋ kohona la bɛlbwa. A chɛ kɛ sihiih kpo ba, baa dɔ deŋnetɛraa waa maa kia ba ɛ la wa.

¹⁴ Kɛ ane a bwa, mɛɛ kpɔ tomkpeɡa aa chɛ kɛ baa ɛ n Dea bela la bwaa do ba nɔn ta.

¹⁵ Kɛ Sadɔk naanar baa ɛ Lewi dea sɔfore dɛ kpɔ kasinteŋ ba tom mɛ n Dea bela, ɡɛ saŋ Israel tena aa le n habɔɔ la, banee ba n sie bela dɛ ba tom mɛ. Kɛ taraken, bá ba che n sie dɛ́ kpɔ ola noorare ne a chale ɛ sarahare dɛɛ tɛ mɛ. Men Nemenɛ Korowiirii bola.

¹⁶ Ba ɡboo dɔ ŋwɛnɛ dɛ́ jo n Dea la ta, banee dɛ́ suuh tel n saraha kon la, dɛ́ɛ ɛ n Dea bela toma bwa.

¹⁷ Ba cheɡɛ dembaah doonyoo la ta jo n Dea la bini naa, a chɛ kɛ bá do yapondɛɛɡa laala. A ta chɛ kɛ bá do komɛlbwa baa kpɔ olpona ɛo ba jo bini dembaah kɛɛ n Dea bela, dɛ́ ɛ toma.

¹⁸ Bá kpɔ yapondɛɛɡa baa vɔwa nyuune ne a yapebori. A ta chɛ kɛ bá do komɛlbwa aa ɡel bɔwɔb laɡ ba.

¹⁹ Mɔɔ ba le ka jo habɔɔ dembaah la ta bela nɛra aa lole la, bá foo laala baa doa ɛ toma la bil deene aa do ɡoroŋ la bini. Bá kpɔ laala pɛɛne do, ásɛ a bɛ waa kpɔ ba ta nɛra la nɛ.

²⁰ Sɔfore bɛ ba nyumpona paa ta, ba bɛ ɡel a moɡɛ kohona ɡe. Bá fona a ba harɛ.

²¹ Sɔfo bɛlbwa dɛ ba Dea la bini dembaah la ta joe yaa, o bɛ sen nyɔ.

²² Sɔfo ta chɛ kɛ ó mo luhaah kɛɛ haah o jaa aa vɛoh. Wɛɛ won mo Israel bihaah waa wola baa jemɛ, kɛɛ luhaah sɔfo aa sewa ɡelo.

²³ A chɛ kɛ sɔfore la chaɡle n nɛra wa, dɛ́ ɡel ba jemɛ kwaa aa do ɡoroŋ ne kwaa aa wola ɡoroŋ doe, dɛ́ pere kwaa doŋa aa lɔ a ta le kwaa doŋa aa wola toole a ta.

²⁴ Nomɛl ne o dɔŋ dɔ waane aa, sɔfore laanee dɛ́ nyiŋi a ta, dɛ́ bola, ɡɛ aa lɔ me Mmarare ta la. A chɛ kɛ baa teŋɛ me Mmarare ne n waa maa kpɔa tɛɛ ba bwa ta, n tɔpejena maa lea cheɡ bwa, ásɛ dɛɛ di n Ona Tɔpera la, dɛ́ ɡel a do ɡoroŋ.

²⁵ Sɔfo bɛlbwa ta chɛ kɛ o leɡe nɛn waa sewa dɛ́ kah doŋa, nemenɛ o nya ne mɛɛ, bibaa kɛɛ bihaah, o nime kɛɛ dɔɔ kɛɛ nimambie waa wola yalɛ mɔɔ.

²⁶ Dɛ o kah doŋa ba sɔɔ taa, ó so tɔpera anuanɛ.

²⁷ Awola waa ba jo Korowii Dea, o bini dembaah la ta bela dɛ́ ba ɛ toma la, ó ɛ wechɔɡa kpɔe dɛ́ kɛ saraha tɛ o te. Men Nemenɛ Korowiirii bola.

²⁸ Menee dɛ́ tɛ sɔfore la komɛlbwa baa dɛ nyin. He bɛ ban Israel harɛ la pera tɛ. Menee ba kondɔɔh.

²⁹ Banee dɛ́ di mea sarahare, ne wechɔɡa kpɔe dɛ́ kɛ sarahare, ne bolchɔɡe dii sarahare, dɛ komɛlbwa Israel tena aa kpɔa baa tɛ mɛ la. A bwa ɛ ba kwa.

³⁰ He koo kondikonloɡla aa wera, ne komɛlbwa haa kpɔa baa tɛ mɛ la ɛɛ ɛ sɔfore la kwaa. He kpɔ menloɡla ba tɛɛ ba, ásɛ n swee andɛɛɡa tɛ heyaa he deremi.

³¹ Sɔfore ta chɛ kɛ ba di jumbie kɛɛ ol bɛlbwa waa sewa ta baŋa, kɛɛ onɔ la kpɔɡ bini olchɔɡa aa kpoo.”