Ɛsekeɛl 43 - mzwDBL

Korowii jirima berɔ ba o Dea

¹ Baa la kpɔ men Ɛsekeɛl ba Korowii Dea wee leebɔr doonyoa la ta,

² asɛ n na Korowii Israel tena aa dɛ tomɔ la jirima o le wee leebɔr dɛɛ ba. O taa do kɛŋɔ chuubu sii ken, asɛ o jirima chaah kohona harɛ la ta bwa.

³ Wepila la do kɛŋɔ anɔ la Korowii aa baa chɔɡ bwɛjen Jerusalam, ne Keba Moo nyoa kwaa maa naa la, asɛ n ba harɛ dɛ kpɔ sie pi harɛ.

⁴ Korowii jirima la cheɡɛ wee leebɔr doonyoa la ta, dɛ ba su o Dea la bini.

⁵ Belaa Korowii Doma la kpɔ mɛ ir, dɛ ba n ne bini dembaah la ta, asɛ Korowii jirima su o Dea bela.

⁶ Dɛ baa la cheɡɛ n jwɛh, asɛ n no nomɛl taa Korowii Dea la bini wɛɛ bol waa n be.

⁷ O ŋɔ, “Nɛwɛnyini bie, n kookara chebɔree bonɔ. Bonɔɔ mɛɛ ba soɡa saŋ bɛlbwa dɛɛ la, dɛɛ nyiŋi n nɛra Israel tena nɛ. Israel tena aa ba koranar baa serewaa ɛ kɛŋɔ voɡa aa wola mkpa dɔe, dɛɛ toma dɛɛ ɛ jwamanwa bonɔ, dɛ́ kpɔ doŋa kah n sɔn waa do ɡoroŋ la kpa.

⁸ Koranar la kpɔ ba doonyoo ne a daa ba kpaɡɛ n Dea doonyoo kwaa la, asɛ danjwɛɛ teŋe n ne ba baah ta. Ba ɛ waa maa kia, dɛ kpɔ doŋa kah n sɔn waa do ɡoroŋ la, asɛ n baah di n kpoo ba.

⁹ Bá ɡel jwamane la, dɛ́ pa ba voɡare ne ba koranar voɡare mkpa aa wola toole a ta la ta, ásɛ n ba so ba baah ta saŋ bɛlbwa dɛɛ la.”

¹⁰ Korowii berɔ ŋɔ n be ŋɔ, “Nɛwɛnyini bie, baɡle ɡɛ n Dea la wa aa doa Israel tena be, ásɛ sihiih kpo ba ba wechɔɡa baa ɛa la wa. Gel ba nyiŋi o mar,

¹¹ dɛ sihiih kpo ba ba wechɔɡa baa ɛa la wa aa, baɡ ba ɡɛ n Dea la mar aa doa. Gɛ o bini mar ne o doonyoo baa cheɡɛ a ta jo dɛɛ le, dɛ́ baɡ ba o waa bwa. Chwerɛ waa nɔ bwa bil ba, ásɛ ba won na ɡɛ Dea la wobɛlbwa aa doa, ásɛ ba jemɛ dɛ́ won dɛɛ teŋɛ mmarare la bwa ta.

¹² Mmara waa chɔ le dɛ tɛ Korowii Dea laanee teŋa nɔ. Bwejen la doa ne bɔr waa baro bwa chɛ kɛŋɔ ó do ɡoroŋ kohona.

Kon baa dɛ ɛ saraha o ta

¹³ Naɡale baa kpɔa maɡɛ Korowii Dea la, ɡɛ tentenee ba maɡɛ saraha kon la ɡe. Saraha kon la lɔɡa dɛ bar la, bɔɔ bɛl lɔ bela. O paɡri lɔ naɡale beŋkpoŋ ne tama, o luŋri ɡe tel natuune ta, asɛ o nyoo dɛ bar bare ɛ nɔmpaa del. Saraha kon la daŋaa nɔ,

¹⁴ le o lɔɡa bɔɔ la ta, dɛ́ ba o keŋkeŋ bela waa wola kanɛ la lɔ naɡale atoro, o paɡri ɡe lɔ naɡale beŋkpoŋ ne tama. Le o lɔɡa bela aa wola kanɛ dɛ́ ba o doa waa kana ɡe lɔ naɡale anumɛl, asɛ o paɡri ɡe naɡale beŋkpoŋ ne tama.

¹⁵ Saraha kon la nyundua bela baa kpo kwaa dɛɛ fuah la lɔ naɡale anumɛl, asɛ kwaane aa do kɛŋɔ nyeɡlare anaarɛ paaɡe o loŋkoni ta.

¹⁶ Kon baa dɛ ɛ sarahare o ta la ɛ fɔɔskwɛɛ. O jaŋne lɔ naɡale fi dɛ anuatoro, asɛ o paɡri ɡe do ɡɛ.

¹⁷ O nyundua bela waa kana ɛ fɔɔskwɛɛ. O jaŋne lɔ naɡale fifraanɛ dɛ beŋkpoŋ, o paɡri ɡe do ɡɛ, asɛ kon waa bar o nyoa la ka tama o tel naɡale beŋkpoŋ. Saraha kon la bɔɔ luŋri lɔ naɡale beŋkpoŋ ne tama. Kon baa cheɡɛ o ta dɛɛ teeh ɡe do o wee leebɔr pera.”

¹⁸ Nemenɛ Korowii berɔ ŋɔ n be ŋɔ, “Nɛwɛnyini bie, dɛ ba ɛ saraha kon la tonaa, ŋwɛnɛre baa che a ta dɛɛ fuh saraha kwaa dɛ́ kpɔ a chale dɛɛ merɛ o ta laanee teŋa nɔ.

¹⁹ A chɛ kɛ he lawɛ nabale ɛ wechɔɡa kpɔe dɛ kɛ saraha tɛ Lewi dea tena baa ɛ sɔfore dɛ ɛ Sadɔk naanar. Banee dɛɛ ba n sie dɛ baa tom mɛ. Men Nemenɛ Korowiirii bola.

²⁰ Kpɔ o chal la ane ɛ kwaa anaarɛ aa do kɛŋɔ nyeɡlare dɛ paaɡe saraha kon la loŋkoni ta la ta, dɛ́ kpɔ ane ɛ o doa bela waa kana la, ne kon waa bar o nyoo ta bwa bar. Gɛɛ hɛɛ ba ɛɛ dɛ́ laa doŋa bɛlbwa kpɔ saraha kon la ta, ó do ɡoroŋ.

²¹ Kpɔ nabale la ɛ wechɔɡa kpɔe dɛ kɛ saraha, dɛ́ fuuh bela baa lea cheɡ Korowii Dea la dahara bela.

²² Tɔɔ perɔ aa, a chɛ kɛ he lawɛ bombal waa wola kirihiah bɛlbwa dii, ba ɛ wechɔɡa kpɔe dɛ kɛ saraha, ásɛ dɛ kpɔ o chal laa doŋa kpɔ saraha kon la ta, ɡɛ haa kpɔ nabale la ɛ la.

²³ Haa laa doŋa bɛlbwa kpɔ saraha kon la ta tonɛ la, kpɔ nabale ne pebal a bɛlbwa aa wola kirihiah dii le he kondɛɛra bini ba tɛ mɛ.

²⁴ Kpɔa ba n sie, ásɛ sɔfore la ɛ yar merɛ a ta, dɛ́ kpɔ ɛ saraha baa fuah tɛ mɛ.

²⁵ Berɛ lawɛ bombal ne nabale dɛ pebal, a bɛlbwa aa wola kirihiah dii, le he kondɛɛra bini ba ɛ wechɔɡa kpɔe dɛ kɛ saraha tɔpere bɛlbwa tɔpera anuanɛ tɛ mɛ.

²⁶ Tɔpera anuanɛɛ sɔfore la kpɔ soŋe men Korowii, dɛ́ laa doŋa bɛlbwa aa lɔ saraha kon la ta kpɔ tɛ mɛ, dɛ́ kpɔ do n nɔn ta dɛ́ pilu.

²⁷ Tɔpera anuanɛ nɔ ba a jaɡa aa, tɔpenuatoro wee la, sɔfore la chɛ kɛŋɔ bá kpɔ saraha kwaa haa fuah, ne deŋnesɔɔhna sarahare la ba saraha kon la ta, ásɛ n lɛ heyaa do. Men Nemenɛ Korowiirii bola.”