Ɛsekeɛl 42 - mzwDBL

Sɔfore deene

¹ Baa la tɔ men Ɛsekeɛl sie, dɛ la n ne Korowii Dea weekaŋle nyunduabɔr o habɔɔ dembaah la ta, dɛ kpɔ mɛ jo deene a sie aa chaɡɛ Dea la dembaah, ne danjwɛɛ waa lɔ o baŋ bɛl weekaŋle nyunduabɔr pera.

² Dea o doonyoa aa chaɡɛ weekaŋle nyunduabɔr la jaŋne lɔ naɡale lafa fifraanue, asɛ o paɡri ɡe naɡale fifraanuanɛ dɛ anue.

³ Ŋwɛnɛ waa chɔ bini dembaah, ne onɔ la waa lɔ habɔɔ Korowii Dea la bɔr baah lɔ naɡale fifraatoro. Ba ma deene atoro chɔŋre dɔŋa nɛɛ kaa nyundua ŋwɛnɛ la baŋ bɛlbwa ta, a sie chaɡɛ dɔŋa, asɛ bɔr do a sie nɛn won che bela.

⁴ Ŋwɛnɛ chɔ deene la sie bini bela. O paɡri lɔ naɡale fi dɛ anue, o jaŋne ɡe lɔ naɡale lafa fifraanue. A doonyoo sie chaɡɛ weekaŋle nyunduabɔr.

⁵ Deene aa lɔ nyundua la aa paɡe kɛŋɔ anɔ la aa lɔ baah ta ne harɛ bɔr kwaa la, dɛkalkɛ a chɔŋre dɔŋa nɛɛ dɛ le habɔɔ.

⁶ Deene aa lɔ nyundua la ta pilare dɔe kɛ dembaah kwaa la, anomanta, a bini aa kanɛ kɛŋɔ baah ta ne harɛ bɔr kwaa la.

⁷ Danjwɛɛ bɛl lɔ deene la habɔɔ o sie chaɡɛ habɔɔ dembaah la, dɛ teŋe kpɔ deene la sie. O lɔ naɡale fifraanuanɛ dɛ anue.

⁸ Deene aa teŋɛ dɔŋa nɛɛ dɛ do baŋ bɛl habɔɔ dembaah la jaŋne lɔ naɡale fifraanuanɛ dɛ anue, asɛ anɔ la aa teŋɛ dɔŋa nɛɛ dɛ bɛne Korowii Dea la ɡe lɔ naɡale lafa fifraanue.

⁹ Nɛn le habɔɔ dembaah la ta dɛɛ ba naa, doonyoo aa lɔ harɛ deene ta la lɔ wee leebɔr.

¹⁰ Habɔɔ dembaah weekaŋle harɛbɔr la, danjwɛɛ le bela dɛ ba Korowii Dea dembaah la ta. O lɔ danjwɛɛ waa lɔ o habɔɔ la baŋ bɛl, asɛ deene do bela,

¹¹ ŋwɛnɛ chɔ a sie. A do kɛŋɔ deene aa lɔ weekaŋle nyunduabɔr la ken. A jaŋne ne a paɡri bwa beŋkpoŋ, dɛ dɔ bela baa kpɔa dɛɛ le, dɛ bwa le dɔŋa. Doonyoo aa lɔ weekaŋle nyunduabɔr

¹² ne doonyoo aa lɔ weekaŋle harɛbɔr la le dɔŋa. Ŋwɛnɛ bɛl pa mun le wee leebɔr pera dɛ fɛrɛ danjwɛɛ la doonyoa a sie chaɡɛ dɔŋa, nɛn won che o ta dɛ jo deene la bini.

¹³ Baa la ŋɔ men Ɛsekeɛl be ŋɔ, “Deene aa lɔ weekaŋle nyunduabɔr, ne anɔ la aa lɔ weekaŋle harɛbɔr a sie chaɡɛ Korowii Dea dembaah bela la, ɛ sɔfore deene. Belaa sɔfore baa dɛ ba men Korowii sie la ɛɛ ba saraha kwaa aa do ɡoroŋ kohona la dɛɛ dii. Deene la aa do ɡoroŋ kohona nomanta, a binii baa ba saraha kwaa aa do ɡoroŋ kohona kɛŋɔ mea sarahare, ne wechɔɡa kpɔe dɛ kɛ sarahare, dɛ bolchɔɡe dii saraha kwaa kpɔe dɛɛ cheɡ.

¹⁴ Sɔfore la baa jo Korowii Dea dɛ ɛ ba toma tonaa, ba bɛ le kaa habɔɔ dembaah bela. Bá foo laala baa doa ɛ toma la bil deene la bini, dɛkalkɛ a do ɡoroŋ. Bá do laala pɛɛne mɔɔ dɛ́ le kaa nɛra la bini.”

¹⁵ Waa maɡɛ Korowii Dea la bini bɔr bela tonɛ la, o tɔ n sie kpɔ mɛ le wee leebɔr doonyoa la ta, dɛ maɡɛ bela bwa bar.

¹⁶ O kpɔ daa la maɡɛ wee leebɔr pera, o ɛ naɡale lafraanuanɛ fifraanue.

¹⁷ O maɡɛ weekaŋle nyunduabɔr ɡe, o ɛ naɡale lafraanuanɛ fifraanue.

¹⁸ O berɔ maɡɛ weekaŋle harɛbɔr, o ɡe ɛ naɡale lafraanuanɛ fifraanue.

¹⁹ Belaa o berɛ sie chaɡɛ wee cholibɔr pera ɡe dɛ maɡɛ. O ɡe ɛ naɡale lafraanuanɛ fifraanue.

²⁰ Gɛɛ o maɡɛ baŋne anaarɛ la bwa. Danjwɛɛ baro, asɛ o jaŋne ɛ naɡale lafraanuanɛ fifraanue, o paɡri ɡe ɛ naɡale lafraanuanɛ fifraanue, dɛ pere bɔr waa do ɡoroŋ la le bɔr waa wola ɡoroŋ doe la ta.