Ɛsekeɛl 40 - mzwDBL

Korowii Defale la bɔr wa

¹ Baa lawɛ yaa laa ta kaa bojaŋ harɛfale ta bene fifraanɛ dɛ anue ta, benfale tɔpera fi ta la, dɛ Jerusalam aa paɡra bene fi dɛ anaarɛ habɔɔ. Awola tɔpere laanee Korowii kpeɡri ba n nɛɛ dɛ kpɔ mɛ kaa Jerusalam.

² Korowii kpɔ mɛ kaa Israel harɛ ta ka chɔŋɛ bwejen bɛl waa kaa nyundua kohona doa chaahna ta. Bwejen la weekaŋle harɛbɔr, n na deene ane bela kɛŋɔ bwɛjen bɛl ken.

³ O la n ne bela, asɛ n na baa bɛl waa cheɡɛ deene la doonyoa dɛɛ nyɛɡle kɛŋɔ ayaawa. O kpoŋe ŋwɛmpoŋ ne daa baa kpɔa dɛɛ maɡɛ kwa.

⁴ Baa la ŋɔ n be ŋɔ, “Nɛwɛnyini bie, nyiŋi kɛrɛdɛ, dɛ́ cheɡ deŋne no waa maa dɛ ba he be bola nɔ kɛrɛdɛ, dɛkalkɛ a waa n ba he ne bonɔ. Ásɛ dɛ ka bol wobɛlbwa haa naa Israel tena be.”

Doonyoa waa lɔ wee leebɔr

⁵ N na danjwɛɛ waa bar Korowii Dea la cheme. Baa la kpɔ o daa la o jaŋne aa ɛ naɡale anuanaarɛ maɡɛ danjwɛɛ la. O bare lɔ naɡale anuanaarɛ, o jaŋne dɛ́ kaa nyundua ɡe lɔ naɡale anuanaarɛ.

⁶ Belaa o kaa doonyoa waa chaɡɛ wee leebɔr la ta, dɛ ka che kon baa cheɡɛ o ta dɛɛ teeh la, dɛ teeh kaa nyundua dɛ ka maɡɛ doonyoa waa lɔ bela ɡe, o ɡe lɔ naɡale anuanaarɛ.

⁷ Dejeɡre atoro lɔ bela nɛra che a bini dɛɛ daah bɔr. A bɛlbwa paɡri lɔ naɡale anuanaarɛ, asɛ a jaŋne ɡe lɔ naɡale anuanaarɛ. Ba ma danjwɛɛ o bare aa ɛ naɡale anuanɛ ne tama dɛ teŋni a baahna. Baa la maɡɛ bɔr waa chɔa kaa dejeɡre la doonyoa, asɛ o ɛ naɡale anuanaarɛ.

⁸ O berɔ maɡɛ bela baa cheɡa dɛɛ kaa doonyoa la ta,

⁹ o lɔ naɡale fi dɛ anɛ, o doonyoa daa la ɡe bare lɔ naɡale atoro. Bela baa cheɡa dɛɛ jo la sie chaɡɛ Korowii Dea la.

¹⁰ Wee leebɔr doonyoa la bini bela, dejeɡre atoro lɔ baŋ bɛlbwa ta, a bwa kɛrɛdɛ, asɛ danjwɛɛre aa lɔ a baŋ bɛlbwa ta la ɡe kɛrɛdɛ.

¹¹ Ate, baa la berɛ maɡɛ bɔr baa kpɔ o ta dɛɛ kaa doonyoa la ta paɡri. O lɔ naɡale fi dɛ anue, asɛ o jaŋne ka tama o ɛ naɡale fifraanɛ.

¹² Dejeɡre la bɛlbwa sie, ba ma danjwɛɛ o jaŋne aa kaa nyundua dɛ ɛ naɡale beŋkpoŋ ne tama, asɛ dejeɡre la bɛlbwa bini paɡri ne o jaŋne lɔ naɡale anuananaarɛ.

¹³ Asɛ dɛ berɛ maɡɛ le dea la habɔɔ danjwɛɛ la ta, dɛ ba ɡale bela baa cheɡa dɛɛ jo la, asɛ a ka tama a ɛ naɡale fifraatoro dɛ anuatoro.

¹⁴ O maɡɔ le dea waa lɔ tia la dɛ ba Korowii Dea dembaah la ta, o lɔ naɡale fifraanuanaarɛ.

¹⁵ Le doonyoa waa lɔ Dea la habɔɔ, dɛ kaa doonyoa waa lɔ nyoa ta dea la ta ɡe lɔ naɡale fifraanuanɛ dɛ anue.

¹⁶ Bɔjeɡre lɔ dejeɡre la habɔɔ danjwɛɛ ne bini danjwɛɛ la ta. Ba ɛ bambie daa maɡre bini danjwɛɛre aa chaɡɛ bɔr waa chɔa kaa la ta.

Habɔɔ dembaah

¹⁷ Baa la kpɔ mɛ jo habɔɔ dembaah la bini. Bela la, n na deene fifraatoro baa maa pɛl danjwɛɛ la, ne ŋwɛnɛ bɛl baa mao bwea ne o ir nyundua, dɛ bar dembaah la cheme.

¹⁸ Gɛ ŋwɛnɛ la chɔɔ bar dembaah la. Habɔɔ dembaah la lɔ harɛ dɛ ɡwaa bini dembaah la.

¹⁹ O maɡɔ le bini doonyoa la ta, dɛ ba harɛbɔr doonyoa la ta, dɛ ba bini dembaah la baŋ. O wee leebɔr la ne o weekaŋle nyunduabɔr la lɔ naɡale lafa fifraanunue.

Weekaŋle nyunduabɔr doonyoa

²⁰ Baa la maɡɛ doonyoa o sie aa chaɡɛ weekaŋle nyunduabɔr paɡri ne o jaŋne. Belaa ba che dɛɛ jo habɔɔ dembaah la ta.

²¹ Dejeɡre la, atoro lɔ baŋ bɛl, atoro ɡe do baŋ bɛl. A danjwɛɛre ne bela baa cheɡa dɛɛ jo la bwa jaŋne ne a paɡri kɛrɛdɛ kɛŋɔ doonyoloɡle la ken. O jaŋne lɔ naɡale fifraanuanɛ dɛ anue, o paɡri ɡe ka tama o tel naɡale fifraatoro dɛ anuatoro.

²² Dea la bɔjeɡre ne bela baa cheɡa dɛɛ jo la, dɛ bambie daa baa ɛa dawɛ danjwɛɛ la ta o do wer la bwa, ba maɡa a ɛ kɛrɛdɛ, kɛŋɔ doonyoa waa chaɡɛ wee leebɔr la. Kwaa baa cheɡɛ a ta teeh dɛɛ kaa o ta anuanɛ lɔ bela, a sie chaɡɛ bela baa cheɡa dɛɛ jo la.

²³ Dɛ doonyoa bɛl lɔ bini dembaah la ta, dɛ chaɡɛ doonyoa waa lɔ weekaŋle nyunduabɔr, ɡɛ tenten wee leebɔr doonyoa la aa doa la. O maɡɔ le doonyoa bɛl ta, dɛ kaa bɛl o ɡe sie aa chaɡɔ ta, asɛ a baah la ɛ naɡale lafa fifraanue.

Weekaŋle harɛbɔr doonyoa

²⁴ Baa la kpɔ mɛ kaa weekaŋle harɛbɔr pera, asɛ n na doonyoa bɛl o sie aa chaɡɛ weekaŋle harɛbɔr. O maɡɛ doonyoa daa la ne bela baa cheɡa dɛɛ jo la, a bwa ne anɔ la maɡa ɛ kɛrɛdɛ.

²⁵ Doonyoa la ne bela baa cheɡa dɛɛ jo la, bɔjeɡre lɔ a ta kɛŋɔ bɔɔne aa lɔ anɔ la ta la. O jaŋne lɔ naɡale fifraanuanɛ dɛ anue, asɛ o paɡri ɡe ka tama a tel naɡale fifraatoro dɛ anuatoro.

²⁶ Kwaa baa cheɡɛ a ta teeh dɛɛ kaa o ta anuanɛ lɔ bela. A sie chaɡɛ bela baa cheɡa dɛɛ jo la, asɛ ba ɛ bambie daa dawɛ danjwɛɛre la baŋ bɛlbwa ta a do wer.

²⁷ Bini dembaah la dɔ doonyoa o sie chaɡɛ weekaŋle harɛbɔr, asɛ o che doonyoa la ta maɡɛ kaa doonyoa waa lɔ habɔɔ weekaŋle harɛbɔr la ta, o ɛ naɡale lafa fifraanue.

Doonyoo aa dɛ kaa dembaah bini bela

²⁸ Ate, baa la kpɔ mɛ kpɔ weekaŋle harɛbɔr doonyoa la ta, dɛ ba n ne bini dembaah la ta. O maɡɛ doonyoa waa lɔ weekaŋle harɛbɔr la, asɛ o ne anɔ la bwa ɛ kɛrɛdɛ.

²⁹ O dejeɡre ne danjwɛɛre aa lɔ bini la, ne bela baa cheɡa dɛɛ jo o ta la bwa, ba maɡa a ɛ kɛrɛdɛ kɛŋɔ anɔ la ken. Doonyoa la ne bela baa cheɡa dɛɛ jo o ta la dɔ bɔjeɡre a bwa ta. O jaŋne lɔ naɡale fifraanuanɛ dɛ anue, o paɡri ɡe ka tama o tel naɡale fifraatoro dɛ anuatoro.

³⁰ Bela baa cheɡa dɛɛ jo doonyoo aa lɔ bini dembaah la ta bwa la paɡri ka tama o tel naɡale fifraatoro dɛ anuatoro. He joɔ dɛɛ kaa bini ɡe aa, a lɔ naɡale anuanɛ ne tama.

³¹ Bela baa cheɡa dɛɛ jo o ta la sie chaɡɛ habɔɔ dembaah la, asɛ ba ɛ bambie daa dawɛ danjwɛɛre aa lɔ ŋwɛnɛ la ta la ta. Ba ma kwaa anuatoro bela baa che a ta teeh dɛɛ kaa o ta.

Wee leebɔr doonyoa waa lɔ bini dembaah

³² Baa la berɔ laɡ mɛ ba bini dembaah la ta, wee leebɔr pera, dɛ ba maɡɛ bela doonyoa la, o maɡa a ne anɔ la bwa ɛ kɛrɛdɛ.

³³ O dejeɡre ne o bini danjwɛɛre, dɛ bela baa cheɡa dɛɛ jo, ne anɔ la bwa maɡa kɛrɛdɛ. Doonyoa la ne bela baa cheɡa dɛɛ jo la, bɔɔne lɔ a bwa ta. A jaŋne lɔ naɡale fifraanuanɛ dɛ anue, a paɡri ɡe ka tama o ɛ naɡale fifraatoro dɛ anuatoro.

³⁴ Bela baa cheɡa dɛɛ jo o ta la sie chaɡɛ habɔɔ dembaah la, asɛ ba ɛ bambie daa dawɛ danjwɛɛre aa lɔ ŋwɛnɛ la ta. Ba do kwaa anuatoro bela baa che a ta teeh dɛɛ kaa o ta.

³⁵ Ate, o berɛ laɡ mɛ ba weekaŋle nyunduabɔr doonyoa la ta, dɛ ba maɡɔ. O ne anɔ la bwa, ba maɡa a ɛ kɛrɛdɛ,

³⁶ ɡɛɛ o dejeɡre ne bini danjwɛɛre, dɛ bela baa cheɡa dɛɛ jo la, bɔɔne do a bwa ta. O jaŋne lɔ naɡale fifraanuanɛ dɛ anue, o paɡri ɡe ka tama o ɛ naɡale fifraatoro dɛ anuatoro.

³⁷ Bela baa cheɡa dɛɛ jo la sie chaɡɛ habɔɔ dembaah la, asɛ ba ɛ bambie daa dawɛ danjwɛɛre la bɛlbwa ta, a do wer. Kwaa anuatoro do bela ba che a ta teeh dɛɛ kaa o ta.

Deene baa dɛ kwaa saraha kwaa a bini

³⁸ Dea bɛl pɛl bela baa cheɡa dɛɛ jo, doonyoo aa lɔ dem waa lɔ bini la bɛlbwa, belaa baa yaɡle saraha kwaa baa dɛ fuah la.

³⁹ Bela baa cheɡa dɛɛ jo doonyoa ta la, teeburre anɛ cheɡɛ baŋ bɛlbwa ta. A taa baa kpoo saraha kwaa baa dɛ fuah, ne wechɔɡa kpɔe dɛ kɛ saraha, dɛ bolchɔɡe dii saraha kwa.

⁴⁰ Bela baa cheɡa dɛɛ jo danjwɛɛ la habɔɔ, weekaŋle nyunduabɔr doonyoa, teeburre anɛ cheɡɛ baŋ bɛl dɛ bɛne kwaa baa cheɡɛ a ta dɛɛ teeh la, asɛ anɛ ɡe che a baŋ bɛl.

⁴¹ Gɛɛ a do asɛ teeburre anaarɛ che doonyoa la baŋ bɛlbwa ta, a bwa ɛ teeburre anuatoro, baa kpoo kwaa baa kpɔa baa ɛ saraha a ta.

⁴² Ba sɛh bwea ɛ teeburre anaarɛ ɡe tɛ saraha kwaa baa fuah dɛɛ ɛ sarahare. Bɛlbwa jaŋne ka tama o ɡwaa naɡale anɛ, o paɡri ɡe ka tama o ɡwaa naɡale anɛ, asɛ o daŋa ɡe ɛ naɡale beŋkpoŋ ne tama. A taa ba yon kpɔ kwaa baa kpɔa dɛɛ kpoo, dɛɛ kwaa saraha kwaa baa fuah, dɛɛ dawɛ.

⁴³ Ba ɡoŋe bune a nyoo ɛ anɛnɛ pɛ danjwɛɛ la ta dɛ bar, a jaŋne do kɛ nɔmpaa del. Dɛ kpɔ saraha ola la dɛɛ dawɛ teeburre la ta.

Sɔfore deene

⁴⁴ Baa la berɔ kpɔ mɛ ba bini dembaah la ta. Deene anɛ lɔ bela. Bɛl lɔ weekaŋle nyunduabɔr doonyoa la jwɛh, o sie chaɡɛ weekaŋle harɛbɔr, onɔ la ɡe do weekaŋle harɛbɔr, o sie chaɡɛ weekaŋle nyunduabɔr.

⁴⁵ O ŋɔ n be ŋɔ, “Dea o sie aa chaɡɛ weekaŋle harɛbɔr la ɛ sɔfore baa dɛ ɛ Korowii Dea toma la kon,

⁴⁶ asɛ onɔ la o ɡe sie aa chaɡɛ weekaŋle nyunduabɔr la ɛ sɔfore baa dɛ nyiŋi kon baa dɛ ɛ saraha o ta la kon. Banee Sadɔk naanar, ba ɡboo ɛ Lewi dea tena baa dɛ ba wona la Korowii sie dɛ́ kaa tomɔ.”

⁴⁷ Asɛ baa la maɡɛ dembaah la, o ɛ fɔɔskwɛɛ. O jaŋne lɔ naɡale lafa fifraanue, o paɡri ɡe naɡale lafa fifraanue. Asɛ saraha kon la che Korowii Dea la sie.

Korowii Dea la

⁴⁸ Baa la kpɔ mɛ ba bela baa cheɡa dɛɛ jo Korowii Dea la, dɛ ba maɡɛ bela doonyoa daa la. A baŋ bɛlbwa paɡri lɔ naɡale anuanɛ ne tama. O doonyoa la paɡri ɡe lɔ naɡale fifraanɛ dɛ beŋkpoŋ, asɛ danjwɛɛ waa lɔ bini la baŋ bɛlbwa bare lɔ naɡale anaarɛ ne tama.

⁴⁹ Bela baa cheɡa dɛɛ jo la paɡri lɔ naɡale fifraatoro, le o nyoa ta kaa o tia ɡe lɔ naɡale fi dɛ anuatoro. Kwaa baa cheɡɛ a ta dɛ teeh dɛɛ kaa lɔ o ta, asɛ pilare do doonyoa daa la jwɛh.