Ɛsekeɛl 4 - mzwDBL

Dɔma teera mae dɛ́ sawɛ Jerusalam danjwɛ

¹ Korowii berɔ ŋɔ men Ɛsekeɛl be ŋɔ, “Nɛwɛnyini bie, nyin berekese dɛ́ kpɔ bil he sie, ásɛ dɛ ɛ bwɛjen Jerusalam dawɛ o ta.

² Ásɛ he ma teera sawɛ danjwɛɛ la, dɛ́ kpɔ bwejeɡre baro, á che tɛ kwaa dɔma aa won che a ta teeh jo bwɛɛ la ta. Ɛ bwejeɡre á che tɛ dɔma la tɛnte deene, dɛ́ kpɔ dakpeɡa baa dɛ ba wona kpɔ kuuɡi danjwɛɛ waa bar bwɛɛ la baro.

³ Kpɔ buni loɡ cheɡ he ne berekese la haa ɛ bwɛjen la dawɛ o ta la baah ta, dɛ́ kpɔ sie chaɡɛ bwɛjen la, á do kɛŋɔ he tɔ bwɛjen la do, á baɡle waane tɛ Israel tena dɛ́ kah ba.

⁴ Chɔ he ɡal ta, ásɛ n kpɔ Israel tena wechɔɡa dawɛ he nɛ. Tɔpera haa chɔ he ɡal ta la bwa, ba wechɔɡa ɛɛ dawɛ he nɛɛ he na wahala.

⁵ N kpɔ ba wechɔɡa baa ɛa la bwa dawɛ he nɛ. Tɔpera lafraatoro fifraanuanaarɛɛ hɛɛ ba Israel tena wechɔɡa cheɡa.

⁶ Haa ba tonɛ anɔ la, berɛ chɔ he diɡ ta, dɛ́ lɛ Juda tena ɡe wechɔɡa dawɛ he nɛ. Tɔpera fifraanaarɛɛ n kpɔ tɛɛ, tɔpebeŋkpoŋ bɛlbwa cheɡɔ tɛ benanyoa beŋkpoŋ.

⁷ Berɛ sie chaɡɛ Jerusalam haa ɛo dɛ tɔɔ do la, dɛ́ tɛr nɔn dɛ́ bol waa bandia ne, á baɡle waa aa dɛ ba bala.

⁸ Mɛɛ vɔrɔwee ŋwɛɛra nee, ásɛ haa won berɛ he te, dɛ́ chɔ baŋ bɛl ka tel kɛŋɔ tɔpera haa tɔ bwɛjen la do la aa baa kaa.

⁹ Kpɔ mea bwa soo siwi ne chebe koo dɛ wɔɔ paanoo. Anee hɛɛ ba dii tɔpera lafraatoro fifraanuanaarɛ haa chɔ he ɡal ta la.

¹⁰ Maɡɛ he tɔpere bɛlbwa kondikwa a tɔɡre tel suuɡapoŋa fifraanɛ.

¹¹ Nee ɡe haa nyɔ la, dɛɛ nyɔ pɛrɛntoa del tɔpere bɛlbwa.

¹² He kondikwaa la, kpɔ nɛra benɡewa wɔɔ paanoo la, dɛ́ dia nɛra la bwa siwi ta.”

¹³ Korowii ŋɔ, “Gɛɛ Israel tena ɡe ɛɛ ba kondikwaa aa ɛ kii kwaa dii, awola maa ba lɔ ba peɡre bá ka so harɛfala ta la.”

¹⁴ Asɛ men Ɛsekeɛl ŋɔ, “Akai Nemenɛ Korowii, le n bechale saŋ ba le fini, n ta konlale kɛɛ kon olchɔɡa aa kpoo kpɔe leɡe n nyoa bwa. Kondikwaa aa ɛ kii kwaa ta n nyoa joɛ bwa.”

¹⁵ Ate, Korowii berɛ ŋɔ, “N kpɔ nabena chiɡ nɛn kwaa la naa ta, he kpɔ wɔɔ paanoo la.”

¹⁶ O berɔ ŋɔ, “Nɛwɛnyini bie, mɛɛ tɔ kondikwaa ŋwɛnɛɛ a waa do tɔɡre Jerusalam. Maɡaa baa ba kondikwaa maɡa dɛɛ di, ásɛ nee waa ɡe do tɔɡre a ha ba, baa dia tebinichɔɡ ne.

¹⁷ Kondikwaa ne nee waa ɛɛ do tɔɡree ba ɡwaŋre. Ba bɔra ɛɛ yɔr dɔŋa nɛɛ, bá serewe ba wechɔɡa wa.”