Ɛsekeɛl 39 - mzwDBL

Nomonjen Gɔɡ nɛɛ pɔe

¹ Nemenɛ Korowii ŋɔ men Ɛsekeɛl be ŋɔ, “Nɛwɛnyini bie, bol waa aa dɛ ba koonomoa Gɔɡ waa ɛ koonomoa dɛɛ nyiŋi Mɛsɛk ne Tubal be ŋɔ, n ne o dɔɔ. Kenii men Nemenɛ Korowii bol,

² ‘Mɛɛ sɔɔh he nyoa dɛ́ tuuɡi harɛ le he ne bojaŋ weekaŋle nyunduabɔr le, dɛ́ kpɔe ka ta Israel bwejena la dor.

³ Mɛɛ lɔ he to waa lɔ he nɔŋɡal taa ta, ásɛ dɛ ɡel he hɛma le he diɡ ta lee.

⁴ Israel bwejena taa hɛɛ ba sewa, he ne he laa tena bwa, ne harɛre ta laa tena baa ja he nɛɛ bwa. Mɛɛ kpɔe tɛ jumbii ne kpɔɡ bini olchɔɡa aa di konlala, he ɛ a kondikwa.

⁵ Kpɔɡ binii hɛɛ ba sewa chɔ. Men Nemenɛ Korowiirii bola.

⁶ Mɛɛ kpɔ niinii ba fuh Maɡɔɡ harɛ ne nɛra baa soɡe deŋnesɔɔhna ta mpo nyoo, ásɛ ba jemɛ kɛŋɔ menee Korowii.

⁷ Mɛɛ ɡeloo n nɛra Israel tena jemɛ kɛ n sɔn do ɡoroŋ, dɛ bɛ doŋa kpɔ kah n sɔn kpa. Ásɛ harɛre ta nɛra jemɛ kɛŋɔ menee Israel Nɛŋɡoroŋ la.

⁸ Tɔpere la ta dɛ ba, wɛɛ bao kpela. Men Nemenɛ Korowiirii bola.

⁹ Nɛra baa soɡe Israel bwɛɛre ta la ɛɛ leo ka pa dɔmkwaa la, dɛ́ kpɔ ɛ damara. Dɔmkwaa kɛŋɔ kwaa baa kpɔa dɛɛ tɔ ba te ɡbemɡbe laa ta, anjena ne anjeɡre, tori ne hɛma, ne koŋkwaa baa dɛ yo a ne laa bwa soo siwi, dɛ lampeare. Bene anuanɛ dɛ ba ta dɛ mara.

¹⁰ Aa hiah kɛŋɔ ba la kpɔɡ bini ka nyin daa kɛɛ dɛ́ ka teŋni daa kɔr bini ba mar kpa, dɛkalkɛ baa dɛɛ mar dɔmkwaa laanee. Ba ɡe ɛɛ ka pa nɛra baa pa ba laala laa ta la laalaa. Men Nemenɛ Korowiirii bola.

¹¹ Awola tɔpere la, mɛɛ tɛ nomonjen Gɔɡ lala huɡribɔree Israel harɛ ta, fɛlembɔjen waa lɔ wee leebɔr ŋwɛnɛ nɛra aa kpɔ o ta baa kaa mpo ta la. Huɡribɔr la ɛɛ tɔ bela nɛra aa kpɔa baa kaa la ŋwɛnɛɛ, dɛkalkɛ belaa baa ba nomonjen Gɔɡ ne o laa tena bwa huɡa. Anomanta, baa yerɛ belaa Hamɔn Gɔɡ Fɛlembɔjen.

¹² Korobie anuanɛ dɛ Israel tena ta dɛ huɡ ba ɡɛ, dɛ́ won laa doŋa kpɔ harɛ la ta.

¹³ Nomɛlbwa waa lɔ harɛ la ta la ɛɛ jao dɛɛ huɡ ba. Awola tɔpere la, baa tɛ mɛ jirimaa, ásɛ o ɛ tɔpere baa kpɔ dɛɛ lii a ɡɛ waa nɔ. Men Nemenɛ Korowiirii bola.

¹⁴ Korobie anuanɛ habɔɔ la, baa le baalaa ba ɡaaɡe harɛ la ta bwa dɛ huɡe banɔ la baa wola ban nae huɡe la bwa, ásɛ dɛ laa harɛ la ta doŋa kpɔ.

¹⁵ Ba dɛ ɡaaɡe dɛ ka le hoɡ la bɛl nɛ aa, baa kpɔ konee pa bela, ásɛ nɛra baa dɛ kwi lalbɔɔne la ba kpɔ ka huɡe Hamɔn Gɔɡ Fɛlembɔjen la bini.

¹⁶ Bwɛɛ bɛl ɛɛ bɛne belaa ba kpɔ o sɔn pa laa tena la, dɛɛ yerɔ Hamona. Gɛɛ baa ba doŋa laa kpɔ harɛ la ta.’ ”

¹⁷ Nemenɛ Korowii ŋɔ men Ɛsekeɛl be ŋɔ, “Nɛwɛnyini bie, yerɛ jumbii bwa soo siwi, dɛ kpɔɡ bini olchɔɡa bwa ŋɔ, ‘Hé bwa le ba boa nyoa, dɛ́ di saraha maa dɛ ba ɛɛ dɛ tɛ heyaa nɔ. O ɛ sarahajen Israel bwejena dor. Hɛɛ di olaa dɛ́ nyɔ chal.

¹⁸ Hɛɛ di laa tena olaa, dɛ́ nyɔ koranar baa lɔ harɛ nɔ ta chale kɛŋɔ pebala ne pebiiri, kɛɛ boohna ne nabala a bwa aa dɔ bo-ola kɛrɛdɛ dɛ le Basan harɛ ken.

¹⁹ Saraha maa dɛ ba ɛɛ tɛ heyaa la, hɛɛ di ola aa dɔ noo a ba pe heya, dɛ́ nyɔ chal kohona a dɛɛ heya.

²⁰ N tiɡ ta, hɛɛ di jaɡre ne nɛra ba dɛ so a ta, ne banyoola, dɛ laa tena bwa soo siwii olaa, dɛ́ vaɡre ɡɛ bwa haa dɛ nyin. Men Nemenɛ Korowiirii bola.

²¹ Mɛɛ ɡeloo harɛre ta nɛra na n jirima, dɛ́ na n deŋnetɛra maa kpɔa dɛɛ ba ba nɛ, ne ɡɛ maa cheɡɛ n kpeɡri ta dɛɛ ɛ, ne ɡɛ n liire aa wera.

²² Le awola dɛɛ kaa la, mɛɛ ɡeloo Israel tena jemɛ kɛŋɔ menee Korowii baa dɛ tom mɛ la.

²³ Harɛre ta nɛra ɛɛ jemɔɔ kɛŋɔ, Israel tena wechɔɡa baa ɛa laanee ɡela ba dɔma laɡ ba laa ta kaa bojaŋ harɛfale ta, dɛkalkɛ ba le n habɔɔ. N laa sie kpɔ ba nɛɛ dɛ kpɔ ba do ba dɔma nɔn ta, ba kpoo ba keri ne.

²⁴ Ba wedoŋa ne wechɔɡa kohona nomanta, n laa sie kpɔ ba nɛ, dɛ ɡel ba dɔ deŋnetɛra ɡɛ aa chɛa.’ ”

²⁵ Anomanta, Nemenɛ Korowii ŋɔ, “Mɛɛ berɔɔ lawɛ Jekɔb naanar baa ɛ Israel tena laanee le bojaŋ harɛfale la ta, dɛ́ sune ba nɛ, ásɛ n sɔn waa do ɡoroŋ la bɛ chɔɡ.

²⁶ Baa soh ba sihihwaa ne kasinteŋ bɛ dɔe dɛ tɛ mɛ ɡɛ saŋ baa soɡe deŋnesɔɔhna ta ba harɛ ta, nomɛlbwa aa wola ban aah la.

²⁷ Maa laɡ ba le harɛre ta, ba dɔma harɛre baa soɡe a ta dɛ́ ba boa ba nyoa la, mɛɛ che ba nɛɛ dɛ́ ɡel harɛre ta nɛra jemɛ kɛ n do ɡoroŋ.

²⁸ Belaa baa ba jema kɛŋɔ, menee Korowii baa dɛ tom mɛ la. A lole kɛŋɔ n doŋ ba kaa bojaŋ harɛfala ta te, kɛ mɛɛ boa ba nyoaa, dɛ́ ba ba ne ba ɡbaɡba harɛ ta, maa bɛlbwa habɔɔ ta.

²⁹ Maa sie laa kpɔ ba nɛɛ kpa, mɛɛ kpɔ n Domaa ba so Israel tena nɛ. Men Nemenɛ Korowiirii bola.”