Ɛsekeɛl 38 - mzwDBL

Korowii bol nomonjen Gɔɡ chɔɡa wa

¹ Korowii bol waa men Ɛsekeɛl be ŋɔ,

² “Nɛwɛnyini bie, eɡle sie ta koonomoa Gɔɡ waa lɔ Maɡɔɡ harɛ ta, dɛɛ nyiŋi Mɛsɛk ne Tubal harɛre ta. Bol waa aa dɛ ba o nɛɛ bala

³ dɛ ŋɔ o be ŋɔ men Nemenɛ Korowii, n ne o dɔɔ.

⁴ Mɛɛ sɔɔh o nyoa, dɛ́ kpɔ ɡoŋre do o nyoa ta, dɛ́ tɛɡro, dɛ́ kpɔ o ne o laa tena bwa kaa. O nɛra baa vɔwɛ ntoa dɛ so jaɡre ta, ne laa tena baa kpoŋe kwaa baa kpɔa dɛɛ tɔ ba te ɡbemɡbe, ba bwa ɛɛ beɡre ba keri bobɛlbwa.

⁵ Baala baa le Pɛɛsea, ne Itiopia, dɛ Libya harɛre ta bwa ɛɛ ba ja o nɛɛ, dɛ́ kpoŋe kwaa baa kpɔa dɛɛ tɔ ba te ɡbemɡbe laa ta, ne bune ɡbɛrɛre.

⁶ Laa tena bwa baa le Goma, ne Bɛt Toɡama waa lɔ weekaŋle nyunduabɔr bwa baa ja o nɛ, ɡɛɛ harɛre kɛrɛdɛ bwa laa tena ɡe ba ja.

⁷ Ŋɔ o be ŋɔ o ne o laa tena damanta baa baa ja o nɛɛ bwa ir, dɛ́ kpɔ ba te, ásɛ o tɔ ba sie.

⁸ Bene ane habɔɔ la, mɛɛ ɡeloo o nyin dɔmkwa, dɛ́ ka bar Israel harɛ ba fa aa yoo o chɔ pɛɛ la. O nɛraa ba boa ba nyoa le harɛre ta, ba ba so deŋnesɔɔhna ta la.

⁹ O ne o laa tena ne harɛre ta nɛra baa ja o nɛɛ la ɛɛ warɔɔ, dɛ́ ba harɛ la ta kɛ peukpeɡ, dɛ́ ba tɔ harɛ la ta bobɛlbwa kɛŋɔ bam ken.

¹⁰ Waa men Nemenɛ Korowii aa dɛ bol nomonjen Gɔɡ be laanee nɔ, ‘Awola tɔpere la, liichɔɡa ɛɛ pa munii ba he nyu bini, ásɛ hɛɛ nyin a ŋwɛnɛre.

¹¹ Hɛɛ ŋɔɔ hɛɛ ka yo Israel harɛ ta bwɛɛre baa dɛ lii kɛŋɔ ba soɡe deŋnesɔɔhna ta, baa wola danjwɛjena mae bara, a ba ɛ kɛ aa dɔ doonyoo ba kpɔ bune dɛɛ kaɡra laanee.

¹² Hɛɛ pa nɛra baa soɡe bwɛjena a bwa fa aa paɡra dɛ ɛ dimɡbeeni la laalaa kɛŋɔ laa ta kwa. Gɛ nɛra nɔ nyoa ba boa le harɛre ane ta la. Taraken, ba dɔ kondɛɛra ne laala tenten dɛ so harɛ la baah ta.’ ”

¹³ Korowii berɔ ŋɔ, “Seeba ne Dedan, dɛ bonadiire baa le Taases ne o bwɛjeɡre ta ɛɛ bɔɔ heyaa ŋɔ, ‘Hɛɛ boa he laa tena nyoa, dɛ́ ba yo dɛ́ pa suuɡaswɛm ne suuɡapoŋa, kondɛɛra ne laala kɛŋɔ laa ta kwaa dɛ́ kaa kɛɛ?’ ”

¹⁴ Anomanta, Nemenɛ Korowii ŋɔ men Ɛsekeɛl be ŋɔ, “Nɛwɛnyini bie, ka bol waa aa dɛ ba nomonjen Gɔɡ nɛɛ bala ŋɔ, ‘Awola n nɛra Israel tena aa so ba deŋna sɔɔh ba la, haa ban na naa?

¹⁵ Hɛɛ le bojaŋ le weekaŋle nyunduabɔree, dɛ́ tɔ harɛre laa tena baa wara dɛ so jaɡre ta sie dɛ́ ba. Ba ɛ laa tena baa wara dɛ do kpeɡri kohona.

¹⁶ Hɛɛ ba tɔ n nɛra Israel tena nɛɛ kɛŋɔ bam yon tɔ harɛ ta la. Awola tɔpere la, mɛɛ ɡeloo hen nomonjen Gɔɡ ba yo n nɛra Israel tena, ásɛ harɛre ta nɛra jem mɛ, maa ba che he nɛɛ dɛ́ baɡle kɛŋɔ n do ɡoroŋ ba siwi ta la.

¹⁷ He waa laa n faa che n bonɔɔna baa ɛ Israel keamere nɛɛ dɛ bol la aa? A ɡɛ saŋ la, n bol waa aa dɛ ba bala biɡri kɛŋɔ mɛɛ ɡeloo nomonjen Gɔɡ ba yoo ba.

¹⁸ Waa aa dɛ ba chiɡa awola tɔpere laanee nɔ. Nomonjen Gɔɡ kaa yo Israel tena ba harɛ ta naa, n baah ɛɛ diu kohona. Men Nemenɛ Korowiirii bola.

¹⁹ N siwi aa beɡre n baah di kohona awola tɔpere la, mɛɛ ɡeloo harɛ jiɡri kohona Israel harɛ ta.

²⁰ Pɛŋa aa lɔ mpo ta, ne jumbii aa dɛ ɡah, ne kpɔɡ bini ola, ne kwaa aa dɛ tuuɡi tea ta, ne anɔ la aa dɛ huuh, dɛ nɛra baa lɔ harɛ ta bwa bwara ɛɛ sa n siee. Bwejena bwa ɛɛ huɡruu, diŋɡoŋni kuuɡi, ásɛ bwɛjena danjwɛɛre bwa ɡe choɡli.

²¹ Wenaale bɛlbwa soo siwii mɛɛ ba kpɔe ba ta nomonjen Gɔɡ nɛ. Ba bini bɛlbwa ɛɛ berɛ o keree ba o dɔŋ nɛɛ dɛ́ kpoo. Men Nemenɛ Korowiirii bola.

²² Weechɔɡa ne nɛŋkpoaa mɛɛ ba kpɔe ba tɛr ba deŋne. Bwaalajen ɛɛ nɛo kohona, ásɛ dombwea ne jebɔrɔwe nii lee nomonjen Gɔɡ ne o laa tena, dɛ harɛre laa tena baa ja o nɛɛ bwa nɛ.

²³ Gɛ taa mɛɛ ba ɡela harɛre ɡalɡa nɛra na ɡɛ maa kana dɛ do ɡoroŋ. Ásɛ ba jemɛ kɛŋɔ menee Korowii.’ ”