Ɛsekeɛl 36 - mzwDBL

Korowii swee andɛɛɡa tɛ Israel harɛ

¹ Korowii ŋɔ men Ɛsekeɛl be ŋɔ, “Nɛwɛnyini bie, bol Israel bwejena be waa aa dɛ ba a nɛɛ bala, ŋɔ á no waa Nemenɛ Korowii aa dɛ bol a be.

² ‘He dɔma bol he waa ŋɔ, bwejaŋa aa lole saŋ la bwa la berɛ ba kwaa name.

³ Anomanta, men Nemenɛ Korowii bolɔ ŋɔ harɛre aa bar heyaa cheme aa baa yo heyaa dɛ lɛ Israel harɛre la, ba bwa chɛɡre Israel tena.

⁴ Anomanta, Israel bwejena ne deŋɡarere, ne nenabɔɔne ne fɛlembɔjena, ne bwɛɛre aa chɔɡa dɛ chɔ pɛɛ, dɛ bwɛjena baa pa a laala laa ta kaa, harɛre nɛra baa bar heyaa cheme la mamɛ heya.

⁵ Men Nemenɛ Korowii cheɡɛ n bandia kohona ta, dɛ bol waa yaɡɛ harɛre kabora la ne Edom harɛ bwa, dɛkalkɛ ba sie lɛo, dɛ che wedoŋa ta kpɔ n harɛ ɛ ba kon, dɛ kpɔ ba kondɛɛra dibɔra kɛŋɔ laa ta kwa.

⁶ Anomanta, bol waa aa dɛ ba Israel harɛ ta bala, dɛ́ ŋɔ bwejena ne deŋɡarere ne nenabɔɔne dɛ fɛlembɔjena be ŋɔ Nemenɛ Korowii bol waa meera ne bandia kohona ne, dɛkalkɛ he na hɔhɔrɔwa asɛ harɛre nɛra mamɛ heya.

⁷ Dɛ ɡɛɛ a do tenaa, n ir nɔn dɛ ŋwɛɛ kɛŋɔ harɛre aa bar heyaa cheme nɔ nɛra ɡe ɛɛ di sihiih bá mam ba.

⁸ Kɛ daa aa lɔ Israel bwejena dor ɛɛ berɔ moɡɛ, dɛ́ nɔnɛ kohona á ɛ kondikwaa tɛ n nɛra Israel tena, dɛkalkɛ aa biɡri n berɛ ba ba ne dem.

⁹ He waa lɔ n bambile ta, mɛɛ sune he nɛɛ he berɛ parɛ he harɛ la, dɛ́ du kwa.

¹⁰ Mɛɛ ɡeloo he Israel tena ya. Nɛra ɛɛ berɔ ba so bwɛjena aa paɡra la ta, dɛ́ kwaa vɔrɔwa.

¹¹ Mɛɛ ɡeloo nɛra ne kondɛɛra ya kohona, dɛ́ ɡel he berɛ ba so ɡɛ he fa aa soɡa wubwa la, ásɛ he wobɛlbwa do wer tɛ heyaa ɡwaa saŋ la kwara. Belaa hɛɛ ba jema kɛŋɔ menee Korowii.

¹² Mɛɛ ɡeloo Israel tena haa ɛ n nɛra berɛ ba so harɛ la ta ja. Wɛ́ɛ ɛ he kapɛrɛ konee, lɔr aa he biirii kpo o ta kpa.

¹³ Nɛra dɛ bol he be ŋɔ he dɛ kpoo he ɡbaɡba nɛra, a ɡel bechale toole he harɛ ta.

¹⁴ Kɛ le fini dɛɛ kaa, háa he ɡbaɡba nɛraa kpoo, ásɛ dɛ paŋɛ bechale kpa.

¹⁵ Maa ɡel he no harɛre ta nɛra loro baa dɛ di heya, ne mama baa dɛ mamɛ heyaa la, kɛɛ dɛ́ ɡel he harɛ la paɡre kpa. Men Nemenɛ Korowiirii bola.’ ”

¹⁶ Korowii berɔ bol waa men Ɛsekeɛl be ŋɔ,

¹⁷ “Nɛwɛnyini bie, Israel tena fa aa soɡe ba harɛ ta la, ba cheɡɛ ba da ne ba we-ɛɛla ta, dɛ kpɔ doŋa kah harɛ la dɛ chɔɡo. Ba we-ɛɛla do kɛŋɔ haah waa le dahara n be.

¹⁸ Anomanta, n kpɔ n bandia kohona ta ba nɛ, nɛra baa kpoora harɛ la ta, dɛ tomɛ voɡa, dɛ kpɔ doŋa kah harɛ la wa.

¹⁹ N lɔ ba peɡre harɛre ane ta, ba do harɛre ta bobɛlbwa, asɛ n pa ba bolchɔɡe ba we-ɛɛla la wa.

²⁰ Harɛre ta bobɛlbwa baa la la, ba chɔɡ n sɔn waa do ɡoroŋ la, dɛkalkɛ nɛra dɛ bol ba waa ŋɔ, ‘Korowii nɛraa nɔ, kɛ o doŋ ba o harɛ ta.’

²¹ N sɔn waa do ɡoroŋ la waa hiah mɛ, chɔɡa Israel tena aa chɔɡo tɛ harɛre ta nɛra, bela bwa baa laŋa.

²² Anomanta, ŋɔ men Nemenɛ Korowii ŋɔ Israel tena be ŋɔ, ‘He waa laa mɛɛ ba ɡɛ waa nɔ ɛɛ. N sɔn waa do ɡoroŋ he chɔɡo tɛ harɛre nɛra, bela bwa haa laŋa la waa.

²³ Mɛɛ baɡle ɡɛ n sɔnjen la aa do ɡoroŋ, n sɔn haa chɔɡo tɛ harɛre nɛra la. Ásɛ harɛre nɛra la bwa jemɛ kɛŋɔ menee Nemenɛ Korowii. He nɛɛ mɛɛ ba cheɡa, dɛ́ chaɡle kɛŋɔ n do ɡoroŋ ba siwi ta.

²⁴ Mɛɛ lawɛ heyaa dɛ́ boa he nyoa le harɛre la ta, dɛ́ ba he ne he ɡbaɡba harɛ ta.

²⁵ Mɛɛ ɛ nedɛɛɡaa merɛ he nɛ, dɛ́ laa doŋa haa kaah la kpɔ he nɛ. Mɛɛ laa doŋa bɛlbwaa kpɔ he nɛ, dɛ́ le heyaa le voɡa toma ɡe ta.

²⁶ Mɛɛ tɛ heyaa bambifale ne liifalaa, ásɛ he won dɛɛ teŋɛ n waa ta. Mɛɛ laa he bambile waa do kɛ bwe laanee kpɔ, dɛ́ tɛ heyaa bambile waa pwɛra.

²⁷ Mɛɛ kpɔ n domaa ba so he nɛ, ásɛ hɛɛ teŋɛ me Mmarare, ne waa maa baɡle heyaa la ta kɛrɛdɛ.

²⁸ Harɛ maa kpɔa tɛ he naawa laanee n berɛ dɛɛ ba kpɔe tɛ heyaa hé so o ta, ásɛ he ɛ n nɛra, ń ɡe ɛ Korowii haa dɛ tom mɛ.

²⁹ Mɛɛ lɛ heyaa le waa aa ɡela hɛɛ kah doŋa la ta, dɛ́ ɡel mea bu, dɛ́ doŋi lɔr le harɛ la ta, ásɛ he bɛ lɔr na.

³⁰ Mɛɛ ɡeloo he daa nɔnɛ kɛrɛdɛ, ásɛ koo kondikwaa ɡe ɛ kohona, ásɛ sihiih bɛ heyaa kpo harɛre ta nɛra be kondikwaa wa.

³¹ Belaa hɛ́ɛ ba he wechɔɡa ŋwɛnɛre ne he nyubinikpeɡ we-ɛɛla bwa liira, ásɛ he baah di he ɡbaɡba nɛɛ wechɔɡa ne kii waa haa ɛa la.

³² Israel tena, n dɛ nyin he jemɛ kɛŋɔ he waa laa mɛɛ ba ɡɛ waa nɔ ɛɛ. N dɛ nyin kɛ sihiih kpo heyaa we-ɛɛla haa dɛ ɛ la wa!’ ”

³³ Nemenɛ Korowii ŋɔ, “Awola maa ba laa he doŋa bwa kpɔ he nɛɛ la, mɛɛ berɔ ɡel he ba so he bwɛɛre la ta, dɛ́ berɛ kwaa vɔrɔwe anɔ la aa ɛ dimɡbeeni la bwa.

³⁴ Harɛ waa chɔ pɛɛ la ɛɛ berɛ harɛparee, ásɛ nɛra baa dɛ kpɔ o ta la na kɛŋɔ o ta pɛɛ chɔe kpa.

³⁵ Baa ŋɔɔ, ‘Harɛ waa chɔ pɛɛ laanee bera do kɛŋɔ Korowii Eden bodɛɛɡe la, bwɛjena a fa aa paɡra, dɛ chɔ pɛɛ laanee ba berɛ kwaa ma danjwɛɛre bara nɛra so a ta la.’

³⁶ Belaa harɛre aa kaa dɛ bar heyaa cheme la ɛɛ ba jema kɛŋɔ, menee bera ba vɔrɔwe bwɛjena a fa aa paɡra dɛ chɔ pɛɛ, dɛ berɛ ɡel harɛ la ɛ harɛpare la. Men Nemenɛ Korowiirii bola, mɛɛ ɛo ɡe.”

³⁷ Nemenɛ Korowii ŋɔ, “Mɛɛ berɔ no Israel tena wesoŋa ja, ásɛ dɛ ɛ ɡɛ waa la tɛɛ ba. N dɛ ba ɡela ba warɛ kɛŋɔ peera ken.

³⁸ Baa warɔɔ kɛŋɔ peera baa teɡa dɛɛ kaa dɛ́ ka kpoo ɛ saraha Jerusalam tɔpejena dii ta ken. Bwɛjena a fa aa paɡra la, nɛra ɛɛ ba su a binii, ásɛ ba jemɛ kɛŋɔ menee Korowii.”