Ɛsekeɛl 35 - mzwDBL

Korowii Bol Edom tena chɔɡa wa

¹ Korowii bol waa men Ɛsekeɛl be ŋɔ,

² “Nɛwɛnyini bie, eɡle sie ta Edom harɛ ta tena nɛ, dɛ́ bol waa aa dɛ ba ba nɛɛ bala.

³ Men Nemenɛ Korowii ŋɔ, ‘Edom bwejena, n ne he dɔɔ. Mɛɛ tɛr nɔnee pa he nɛɛ dɛ́ chɔɡ harɛ la, o ta do ɔma dɛ́ chɔ pɛɛ.

⁴ Mɛɛ chɔɡ he bwɛjena bwaa a berɛ dimɡbia dɛ́ chɔ pɛɛ. Belaa hɛɛ ba jema kɛŋɔ menee Korowii.

⁵ Edom tena, he fa ɛ Israel tena dɔm, dɛ ɡel ba dɔma kpoo ba ba wenaale tɔpere, ba wechɔɡa baa ɛa deŋnetɛraa.

⁶ Anomanta, men Nemenɛ Korowii, n ŋwɛɛrɔ kɛŋɔ n taa lole nɔ, haa dɛ kpoo nɛra nɔ, he ɡe ɛɛ sewɔɔ, haa won le a nyoa.

⁷ Mɛɛ ɡeloo Edom harɛ deŋɡare chɔ pɛɛ, dɛ́ kpoo nɛra baa dɛ kpɔ o ta bwa.

⁸ Mɛɛ ɡeloo lala su bwejena dor bwa, ásɛ banɔ la baa kpoo ba laa ta chɔɔɡe deŋɡarere ta, dɛ́ su nenabɔɔne bwa bini.

⁹ Mɛɛ chɔɡ harɛ laanee kwaraa, ásɛ nɛra aa won berɛ ba so o ta kpa. Anee hɛɛ ba jema kɛŋɔ menee Korowii.

¹⁰ Menee Juda ne Israel harɛre nɛra ɛɛ tomɛ, kɛ he Edom tena ŋɔ hɛɛ ka kpɔ harɛ laanee ɛ he kon.

¹¹ Anomanta, men Nemenɛ Korowii, n ŋwɛɛrɔ kɛŋɔ n taa lole nɔ, mɛɛ bɔ heyaa kemee he bandia ne meera, dɛ haeh haa hah n nɛra la wa. Ásɛ ba jemɛ kɛŋɔ menee dɛɛ tɛr he deŋne waa haa ɛɛ ba la wa.

¹² Anee hɛɛ ba jema kɛŋɔ men Korowii, n no nɛnhɛlwobol haa bola Israel bwejena waa ŋɔ a bwa chɔ pɛɛ ba kpɔ tɛ heyaa a ɛ he kwa.

¹³ N no mbarafo waa haa bola yaɡ mɛ aa wola nyoa dɔe.’ ”

¹⁴ Nemenɛ Korowii ŋɔ, “Mɛɛ chɔɡ he ne he harɛ Edomee ó chɔ pɛɛ, ásɛ harɛ nɔ ta nɛra bwa sie lɛ.

¹⁵ Edom tena, he sie aa lɛa ɡɛ saŋ Israel tena harɛ aa chɔ pɛɛ la, ɡɛ tentenee mɛɛ ba kpɔe ɛ heya, Sɛɛ Bwejen ne Edom harɛ bwa. Asɛ nomɛlbwa jemɛ kɛŋɔ menee Korowii.”