Ɛsekeɛl 33 - mzwDBL

Korowii le Ɛsekeɛl wɛɛ daah o harɛ nɛra

¹ Korowii bol waa men Ɛsekeɛl be ŋɔ,

² “Nɛwɛnyini bie, bol he bwɛɛ tena la be ŋɔ dɛ n ba laa ne harɛ la ta, asɛ ba le ba bini bɛl ŋɔ wɛɛ daah harɛ la,

³ asɛ naate na laa tena bala aa, ó hoh bɛla dɛ́ ir harɛ la nɛra deŋne.

⁴ Dɛ bɛlbwa no bɛla la sii o ta kpɔe ɛ wa, asɛ dɔma la ba kpoo waa, o seo ɡure o ɡbaɡba nyu ta.

⁵ Naate no bɛla la sii dɛ vɛh o ta kpɔe ɛ wa aa, o seo ɛɛ ɡure o nyu taa. O pu sie ɛ waane aa, o fe dɔ o nyu.

⁶ Dɛ nɛn waa dɛ daah harɛ la na dɔma bala o ta bɛla la hoɛh nɛra la jemɛ, asɛ dɔma la ba kpo ba bini bɛlbwa naa, naate baa kpoo la sewɛ o wechɔɡa wa, kɛ mɛɛ pɛɛ naate waa sewa la chal waa le nɛn waa dɛ daah bɔr la be.

⁷ Nɛwɛnyini bie, henee n le ŋɔ hɛɛ daah Israel harɛ ta nɛra. No waa maa bola nɔ, dɛ́ kpɔ ja ba.

⁸ N ŋɔ wechɔɡ-ɛɛ be ŋɔ wɛɛ sewɔɔ, asɛ he ta on kaeh o le o wechɔɡa ta, dɛ sewɛ a ta naa, mɛɛ pɛɛ o chal waa le he be.

⁹ Dɛ he kaoh o ta a ta leɛ yaa, wɛɛ sewɛ o wechɔɡa la taa, kɛ he te ɛɛ dɔ he nyuu.”

¹⁰ Korowii ŋɔ men Ɛsekeɛl be ŋɔ, “Nɛwɛnyini bie, ŋɔ Israel tena be ŋɔ, ba dɛ bol ŋɔ, ‘Ya wechɔɡa ne waa yaa koni a ta ɡwaa ya nɛ, a dɛ kaa ya ne mun ta. Ɛrɛɛ yaa ba ɛɛ dɛ́ dɔ ya nyu ɔ?’

¹¹ Ŋɔ ba be ŋɔ men Nemenɛ Korowii taa lole nɔ, n ŋwɛɛrɔ ŋɔ, ‘Ń sie aa wechɔɡ-ɛɛra seo ta lɛ, n dɛ nyin kɛ ba le a ta, dɛ́ dɔ ba nyu. Israel tena, hé charɛ! He charɛ he liire, dɛ́ le liichɔɡa ŋwɛnɛ bɛlbwa ta. Hé ɡel wechɔɡa haa dɛ ɛ la. Ɛrɛɛ hɛɛ nyin seo nɔɔ?’

¹² Anomanta, nɛwɛnyini bie, ŋɔ he bwɛɛ tena be ŋɔ, ‘Dɛ nɛn o wa aa toɡra ɛ wechɔɡa aa, waa o nyuu dɔ toɡra o waa fa aa toɡra wubwa la wa. Dɛ wechɔɡ-ɛɛ le o wechɔɡa ta naa, waa deŋnetɛraa dɔ.’

¹³ Dɛ n ŋɔ nɛn o wa aa toɡra be ŋɔ wɛɛ dɔ o nyuu, asɛ o kpɔ o te dawɛ toɡra o waa fa aa toɡra la ta dɛɛ ɛ wechɔɡa aa, maa o wedɛɛɡa waa ɛa wubwa la bɛlbwa liira ba. Wɛɛ sewɛ o wechɔɡa waa ɛa la waa.

¹⁴ N ŋɔ wechɔɡ-ɛɛ be ŋɔ wɛɛ sewɔɔ, asɛ o le o wechɔɡa la ta dɛɛ ɛ anɔ la aa wera dɛ toɡre,

¹⁵ kɛŋɔ dɛ nomɛl kpɔ komɛl ka tɛo o kpɔ cheɡ awɔba, dɛ lɛ suuɡa, asɛ o berɛ naate kon tɛo, kɛɛ dɛ kpɔ komɛl waa ŋwɛa ka tɛ kon te, dɛɛ teŋɛ mmarare aa dɛ tɛ mkpa ta, dɛ ɡel wechɔɡa ɛɛ yaa, waa sewa ba, wɛɛ dɔ o nyuu.

¹⁶ Mɛɛ kpɔ o wechɔɡa waa ɛa la bɛlbwaa kɛo, wɛɛ dɔ o nyuu dɛkalkɛ o ɛ waa aa wera dɛ toɡre.

¹⁷ Kɛ he nɛra la dɛ bol men Korowii waa ŋɔ n waa ta toɡrɛ. Gɛ laa a do, ba waa wola toɡrɛ.

¹⁸ Dɛ nɛn o wa aa toɡra ɡel wedɛɛɡa ɛɛ dɛɛ ɛ wechɔɡa aa, wɛɛ sewɛ o wechɔɡa waa ɛa la waa.

¹⁹ Gɛɛ dɛ wechɔɡ-ɛɛ ɡel wechɔɡa ɛɛ dɛɛ ɛ anɔ la aa wera dɛ toɡre aa, wɛɛ dɔ o nyuu.

²⁰ Kɛ he Israel tena ŋɔ, ‘Men Korowii waa ta toɡrɛ.’ Mɛɛ nyiŋi he bini bɛlbwa we-ɛɛla taa dɛ́ bol o wa.”

Jerusalam paɡra waa baɡla

²¹ Baa lawɛ yaa laa ta kaa bojaŋ harɛfale ta bene fi dɛ anɛ, korobie fi, tɔpenue ta la, baa bɛl waa dɔ bɔr chwa le Jerusalam ba men Ɛsekeɛl be, dɛ ba ŋɔ, “Bwɛjen Jerusalam paɡrɔ!”

²² Dɛ Korowii tɛ mɛ kpeɡri jɔmɔra bɛl, mɔɔ tɔɔper chɔɔbɔr baa la ba n be, asɛ Korowii pili n nyoa, dɛ ɡel n berɛ won waa bola.

²³ Belaa Korowii bol n be ŋɔ,

²⁴ “Nɛwɛnyini bie, nɛra baa soɡe Israel harɛ bwɛjena aa paɡra ta dɛ bol ŋɔ, ‘Dɛ Abraham ɡboo, asɛ Korowii kpɔ harɛ la bwa tɛo o ɛ o kon. Kɛ ya berɔ warɛ, anomanta, o berɛ ya bwa kon pi.’

²⁵ Anomanta, ŋɔ men Nemenɛ Korowii ŋɔ, ‘Haa dɛ di ola ne a chale, dɛ tomɛ voɡa dɛɛ kpoo dɔŋa nɔ, a chɛ kɛ he dɔ harɛ nɔ o ɛ he kon aa?

²⁶ Hé ɛ nɛŋkpoa nɛra, dɛɛ tomɛ voɡa maa kia, dɛɛ nyin dɔŋa haahna. A chɛ kɛ harɛ nɔ ɛ he kon aa?’

²⁷ Ŋɔ men Nemenɛ Korowii ŋɔ, ‘Ń ŋwɛɛrɔ kɛŋɔ n taa lole nɔ, baa kpoo nɛra baa kaa dɛ ta so bwɛjena aa paɡra la ta bwaa. Banɔ la baa chwaa ka so kpɔɡ bini la, kpɔɡ bini olchɔɡaa dɛ́ di ba ola, ásɛ weechɔɡa kpoo banɔ la ɡe baa chwaa ka so dekpeɡa ne bwebɔɔne bini.

²⁸ Mɛɛ ɡeloo harɛ la chɔ pɛɛ, ásɛ kpeɡri o fa aa dɔa dɛɛ ɛ mbarafo la ba a jaɡa. Bwejena aa lɔ Israel harɛ ta bwa ɛɛ chɔɡoo, ásɛ nomɛlbwa aa won kpɔ a ta.

²⁹ N ɡelɔ harɛ la chɔ pɛɛ waa maa kia ba ɛ la wa aa, baa jemɔ kɛŋɔ menee Korowii.’

³⁰ Kɛ hen Nɛwɛnyini bie, he nɛra la lawɛ dɔŋa pɛl bwɛjen la danjwɛɛ ne ba doonyoo dɛɛ bol he waa ŋɔ, ‘Hé ba yá ka no waa aa le Korowii be.’

³¹ Gɛɛ ba yon dɛɛ ba he be saŋ bɛlbwa, dɛ́ ba so dɛɛ no waa haa dɛ bol, kɛ baa an kpɔe dɛɛ ɛ ɡɛ aa dɛ baɡle. Ba nyoo ɡboo ba kpɔ dɛɛ baɡle kɛŋɔ ba ɛ nɛndɛɛɡa, kɛ anɔ la baa dɔ ɡbo taa ba liire do.

³² Ba te be la, he waa la do kɛŋɔ haa kpɔ janjela dɛɛ lɔ yelsoma tasom ne. Ba no waa haa bola la bwa, kɛ ba ta a bɛlbwa kpɔe ɛ waane.

³³ He waa nɔ bwa ɛɛ ɛo, aa bao kpela ɡe. Ásɛ ba jemɛ kɛŋɔ Korowii keame bɛl fa lɔ ba bini.”