Ɛsekeɛl 30 - mzwDBL

Ijipt harɛ wiile

¹ Korowii bol waa men Ɛsekeɛl be ŋɔ,

² “Nɛwɛnyini bie, bol waa men Nemenɛ Korowii aa ŋɔa a dɛ ba bala dɛ wi ŋɔ, ‘Tɔpere waa do ɔma kohona dɛ ba!

³ Tɔpere la telo tonɛ. Tɔpere Korowii aa bol Ijipt harɛ tena waa la telo tonɛ. Baama ɛɛ tɔɔ awola, ásɛ harɛre bwa chɔɡ.

⁴ Laa tena dɛ ba ba yo Ijipt tena, Itiopia tena loo ɛɛ kuu. Baa ba kpoo Ijipt tena la, baa pa ba kondɔɔh kaa, dɛ́ chɔɡ harɛ la ó berɛ dimɡbia.

⁵ Baa kpoo Itiopia ne Lidia ne Arab, dɛ Lebya harɛre laa tena baa kaa kpɔ ba, ba ba cha ba la bwa laa taa, dɛ́ kpoo n nɛra la bini bane ɡe.’ ”

⁶ Anomanta, Korowii ŋɔ, “Ijipt chamene tena baa dɛ chao la bwa ɛɛ serewoo. O laa tena baa do kpeɡri wɛɛ ɛ mbarafo ba waa la bwa ɛɛ serewoo. Baa kpoo ba bwa laa taa le Miɡdol dɛ ba Aswan. Men Nemenɛ Korowiirii bola.

⁷ Harɛ la ɛɛ chɔ pɛɛ harɛre bwa bini, ásɛ o bwɛjena bwa ɡe chɔɡ kwaraa dɛ́ berɛ dimɡbia.

⁸ N ɡelɔ nii ba chɔɡ Ijipt harɛ dɛ kpoo nɛra baa dɛ chao waa, anee baa ba jema kɛŋɔ menee Korowii.

⁹ Awola tɔpere, mɛɛ tomɛ toromaa bá kpɔ stiimaere ba, dɛ́ ba aah Itiopia tena, dɛ́ le ba ne ba bosɔɔhna ta. Lokua ɛɛ chole ba nɛɛ awola Ijipt aa chɔɡ la. Tɔpere la ɛɛ bao kpela.”

¹⁰ Nemenɛ Korowii bolɔ ŋɔ, “Mɛɛ ɡeloo Babelɔn Kooro Nebukadnesa kpoo Ijipt harɛ nɛndamanta bwa.

¹¹ O ne o laa tena ba nyu bini aa kpeɡa kohona ɡwaa harɛre laa tena ɛɛ bao, dɛ́ ba chɔɡ harɛ la. Baa pamɛ ba kerii dɛ́ yo Ijipt tena, ásɛ Ijipt tena serewe perɛ harɛ la bwa ta.

¹² Mɛɛ ɡeloo nenabɔɔne aa su Nael Moo ta hweeh, ásɛ dɛ yoɡ harɛ la tɛ nɛnchɔɡa. Mɛɛ ɡeloo nɛŋhɔɔhra ba chɔɡ harɛ la, ne komɛlbwa aa lɔ o ta o chɔ pɛɛ. Men Korowiirii bola.”

¹³ Nemenɛ Korowii ŋɔ, “Mɛɛ chɔɡ voɡaa, ne anɔ la baa ɛa a do bwɛjen Mɛmfes bwaa. Kooro aa Ijipt harɛ taa do kpa, ásɛ n kpɔ ɔmee kohona ba ta nɛra nɛɛ harɛ la ta bwa.

¹⁴ Mɛɛ chɔɡ Ijipt harɛ weekaŋle harɛbɔree o chɔ pɛɛ, dɛ́ fuh bwɛjen Soan waa lɔ weekaŋle nyunduabɔr ɡe, dɛ́ ba tɛr Tebes waa ɛ ba bwɛjen la tena ɡe deŋne.

¹⁵ Mɛɛ kpɔ n bandia ba ta bwɛjen Pɛloseɔm waa ɛ Ijipt dekpeɡ la taa. Mɛɛ kpoo nɛndamanta baa lɔ bwɛjen Tebes ɡe bwaa.

¹⁶ Mɛɛ fuh Ijipt harɛɛ, ásɛ lokua chole bwɛjen Pɛloseɔm tena nɛ. Baa kuuɡi bwɛjen Tebes danjwɛɛre aa baroo la, ásɛ bwɛjen Mɛmfes tena ɛɛ na weweele saŋ bɛlbwa.

¹⁷ Baa kpoo bonɔɔna baa lɔ bwɛjena Hɛleopɔles ne Bubastis laa taa, ásɛ dɛ lawɛ bwɛjena la nɛra bane kaa.

¹⁸ N baa sɔɔh Ijipt harɛ kpeɡri nyoa aa, bɔr dɛ ba bira bwɛjen Tapanes, ásɛ Ijipt harɛ kpeɡri baa cheɡɛ a ta dɛɛ ɛ mbarafo la ba a jaɡa. Baama ɛɛ tɔ o bwaa, ásɛ ba lawɛ nɛra baa lɔ o bwɛjeɡre ta kaa.

¹⁹ Gɛɛ mɛɛ ba Ijipt tena deŋne tɛra, ásɛ ba jemɛ kɛŋɔ menee Korowii.”

²⁰ Baa lawɛ yaa laa ta kaa bojaŋ harɛfale ta bene fi dɛ beŋkpoŋ, korobiloɡle la tɔpenuanɛ ta la, Korowii bol waa men Ɛsekeɛl be ŋɔ,

²¹ “Nɛwɛnyini bie, n pɔ Ijipt kooro nɛ. A do kɛŋɔ maa ku o nɔn ba ta on vɔwɛ o choŋi dɛ do kpeɡri, dɛ́ won lawɛ kere kpoŋe la ken.

²² Anomanta, men Nemenɛ Korowii ne Ijipt kooro dɔɔ. Mɛɛ ku o nɔɔraa, ásɛ kere la le o nɔn ta le harɛ.

²³ N dɛ ba Ijipt tena bwa lɔe peɡre harɛre bwa ta.

²⁴ Mɛɛ ɡeloo Babelɔn kooro do kpeɡri, dɛ́ kpɔ n kere do o nɔn ta. Kɛ Ijipt kooro te, mɛɛ kuuɡi o nɔɔraa, ásɛ o bwara nyɛɡo wɛɛ pɛmɛ Babelɔn kooro sie, dɛ́ sewɛ.

²⁵ Gɛɛ, mɛɛ ɡeloo Ijipt kooro sɔɔh, dɛ́ ɡel Babelɔn kooro do kpeɡri. Maa ba kpɔ n kere do Babelɔn kooro nɔn ta, ásɛ o kpɔ pa Ijipt tena nɛɛ la, nomɛlbwa ɛɛ jemɔɔ kɛŋɔ menee Korowii.

²⁶ Mɛɛ lɔ Ijipt tena bwaa peɡre harɛre bwa ta, ásɛ ba jemɛ kɛŋɔ menee Korowii.”