Ɛsekeɛl 29 - mzwDBL

Korowii bol Ijipt harɛ chɔɡa wa

¹ Baa lawɛ yaa laa ta kaa bojaŋ harɛfale ta bene fi, korobie fi tɔpera fi dɛ anɛ ta la, Korowii bol waa men Ɛsekeɛl be ŋɔ,

² “Nɛwɛnyini bie, eɡle sie dɛ́ bol waa aa dɛ ba Ijipt kooro ne o harɛ ta bala.

³ Ŋɔ o be ŋɔ men Nemenɛ Korowii ŋɔ, ‘Ijipt kooro, n ne he dɔɔ, he do kɛŋɔ lɛŋɔ damanta dɛ do he nenabɔɔne ta. He ŋɔ Nael Moo ɛ he kon, he ɡbabirii ɛo.

⁴ Kɛ mɛɛ do ɡoŋa he nyoaa, ásɛ pɛŋa aa lɔ nee la ta bwa marɛ he pɛɡa ta, ń tɛɡre le baŋ.

⁵ Mɛɛ ɡelee ta pua hɛŋle ɡbo harɛ la ta, he ne pɛŋa la bwa. Hɛɛ chɔ pɛɛpɛɛ harɛ la taa, nomɛlbwa aa wola hen kpɔ. Mɛɛ kpɔe tɛ harɛ la ta olchɔɡa ne jumbii á di he ol.

⁶ Ásɛ nɛra baa lɔ Ijipt harɛ ta bwa jemɛ kɛŋɔ menee Korowii.’ ” Korowii ŋɔ, “Israel tena kpɔ ba te dawɛ he Ijipt tena nɛɛ dɛɛ nyin kɛ hé cha ba, kɛ he do kɛŋɔ pul daŋɡbala waa wola kpeɡe.

⁷ Baa lawɛ kpoŋe la, he pɛɡrɔ dɛ tɔɡɛ ba vaama. Baa kpɔ ba te dawɛ he nɛɛ la, he kuu dɛ ɡel ba nyaŋ diɡe.

⁸ Anomanta, men Nemenɛ Korowii ɛɛ ɡeloo laa tena kpɔ keri ba yoi, dɛ́ kpoo he nɛra ne kondɛɛra bwa.

⁹ Ijipt harɛ bwa dɛ ba chɔɡa, dɛ́ chɔ pɛɛ, ásɛ ba jemɛ kɛŋɔ menee Korowii. Haa ŋɔa ŋɔ hen dɔ Nael Moo, henee ɛo la wa.

¹⁰ N ne he dɔɔ, n ne he nenabɔɔne ɡe dɔ. Mɛɛ chɔɡ Ijipt harɛ bwaa o chɔ pɛɛ, le bwɛjen Miɡdol waa lɔ weekaŋle nyunduabɔr, ka le bwɛjen Aswan o ɡe aa lɔ weekaŋle harɛbɔr, dɛ́ kpoŋe ka le Itiopia harɛ jwɛh ta.

¹¹ Nɛn kɛɛ ol bɛlbwa aa o taa kpɔ. Bene fifraanaarɛ habɔɔ laa aa, nomɛlbwa kɛɛ komɛlbwa aa won so bela.

¹² Mɛɛ ɡeloo Ijipt harɛ chɔ pɛɛ, dɛ́ ja harɛre aa chɔɡa bwa ta. O bwɛjena bwa dɛ ba pɛɛ chɔe bene fifraanaarɛ. Ásɛ n lɔ Ijipt tena peɡre harɛre bwa ta.”

¹³ Nemenɛ Korowii ŋɔ, “Bene fifraanaarɛ la habɔɔ la, mɛɛ lawɛ Ijipt tena maa lɔ ba peɡre harɛre ane ta laanee pɛ,

¹⁴ dɛ́ ɡel ba ba so Ijipt harɛ weekaŋle harɛbɔr, ba naawa harɛ ba fa aa soɡe o ta la ta. Ba harɛ la kora aa kpeɡrii do kpa.

¹⁵ Wɛɛ ɛ kora waa wola kpeɡrii do kpa harɛre koranar bwa bini. Waa ir dɛ́ do kpeɡri dɛɛ nyiŋi harɛfala ane ta kpa.

¹⁶ Israel tena aa ba tenee kpɔ dawɛ Ijipt tena nɛɛ ŋɔ bá cha ba kpa. Baa na waa aa ba Ijipt harɛ laanee, dɛ na kɛ aa were kɛŋɔ ba kpɔ ba te dawɛ Ijipt tena nɛ. Ásɛ Israel tena jemɛ kɛŋɔ menee Nemenɛ Korowii.”

¹⁷ Baa lawɛ yaa laa ta kaa bojaŋ harɛfale ta bene fifraanɛ dɛ anuanɛ, korobiloɡle tɔpere waa tɔ sie ta la, Korowii bol waa men Ɛsekeɛl be ŋɔ,

¹⁸ “Nɛwɛnyini bie, Babelɔn Kooro Nebukadnesa kpɔ o laa tena ka yo bwɛjen Taaya tena. O ɡelɔ o laa tena la che bontɔɡa ba nyuune ɡba, ba vaama swe. Kɛ kooro la ne o laa tena la bɛlbwa ta tɔnɔ bɛlbwa dɔe le a ta.

¹⁹ Anomanta, Nemenɛ Korowii ŋɔ, wɛɛ kpɔ Ijipt harɛɛ do Babelɔn Kooro Nebukadnesa nɔn ta, ásɛ o pa Ijipt harɛ ta kondɔɔh bwa laa ta kaa, á ɛ o laa tena kembɔr.

²⁰ N kpɔ Ijipt harɛ bɔ Babelɔn kooro ne o laa tena kem, waa baa kaa ɛ tɛ mɛ la wa. Men Nemenɛ Korowiirii bola.

²¹ A ɡɛ waa nɔ chiɡo aa, mɛɛ ɡeloo Israel tena do kpeɡri, ásɛ dɛ ɡel hen Ɛsekeɛl bol waa nomɛlbwa no, ásɛ ba jemɛ kɛŋɔ menee Korowii.”