Ɛsekeɛl 28 - mzwDBL

Korowii bol Taaya kooro chɔɡa wa

¹ Korowii bol waa men Ɛsekeɛl be ŋɔ,

² “Nɛwɛnyini bie, bol Taaya kooro be ŋɔ men Nemenɛ Korowii ŋɔ, ‘He dɛ ɡɔɔ he te dɛ ŋɔ he ɛ voɡ, he dɛ so voɡ kara ta mpo bare cheme. Kɛ nɛwɛnyinii hen, he ta voɡ ɛɛ, he dɛ lii kɛ he ne voɡ wejema kɛrɛdɛ.

³ He wejema ɡwaa Danɛl aa? Wobɛlbwa toole he nɛɛ dɛ sɔh aa?

⁴ He cheɡɛ he wejema ta dɛ dɔ kondɔɔh, suuɡaswɛm ne suuɡapoŋa bwa su he be.

⁵ He cheɡɛ he bona dii wejema kohona ta, dɛ dɔ kondɔɔh kohona. He kondɔɔh nomanta, he nyu bini dɛ do he som.

⁶ Anomanta, he dɛ lii he te wejereme kɛŋɔ voɡ.

⁷ Mɛɛ ɡeloo nɛŋhɔɔhra baa ɛ harɛre nɛra ba nyu bini aa kpeɡa ɡwaa harɛre bwa nɛra ba yoi. Baa pamɛ ba kerii, dɛ́ chɔɡ kwaa haa cheɡɛ he wejema ta dɔ dɛ do wer la.

⁸ Baa kpoe dɛ́ kpɔe ta mpo ta kɛŋɔ baa huɡe la ken.

⁹ Hɛɛ won ŋɔ he ɛ voɡ nɛra baa dɛ ba ba kpoe la be naa? Nɛwɛnyinii hen, he ta voɡ ɛɛ nɛra baa kpoe la nɔn ta.

¹⁰ Hɛɛ sewɔɔ kɛŋɔ nyoate ken, nɛŋhɔɔhra baa wola men tomɛ nɔɔra taa hɛɛ ba sewa. Men Nemenɛ Korowiirii bola.’ ”

¹¹ Korowii bol waa n be ja ŋɔ,

¹² “Nɛwɛnyini bie, taa Taaya kooro wiile, waa aa dɛ ba o nɛɛ bala la wa, dɛ́ ŋɔ men Nemenɛ Korowii ŋɔ, ‘Henee wera nɛra bwa bini ka tonɛ bá hweli, he dɔ wejema kohona dɛ do wer ka tonɛ.

¹³ Dɛ he fa lɔ Eden bodɛɛɡe men Korowii aa du daa la, dɛɛ do kwaa aa wera kɛŋɔ, bwedɛɛɡa bwa soo siwi baa dɛ yera rubi, ne topas, ne emirad, ne kresolet, ne onis, ne jasepa, ne safaaya, ne tɛɛkoes dɛ bɛrel. Awola baa tae laanee ba ɛ ɡɛ kwaa nɔ ne suuɡaswɛm kwaa tɛɛ.

¹⁴ N le Kerob cheɡ wɛɛ daahne. Dɛ he soɡe n bwejen waa do ɡoroŋ la ta, dɛɛ valɛ bwedɛɛɡa aa dɛ nyɛɡle baah ta.

¹⁵ He waa fa toole n waa bini le awola maa tae mɔɔ he baa ɛ wechɔɡa.

¹⁶ He sie fa beɡrɔ hɛɛ di bona, a che a ta he ɛ naɡrenyini, dɛ ɛ wechɔɡa. Asɛ n doŋi le n bwejen waa do ɡoroŋ la ta, dɛ ɡel Kerob la waa dɛ daahne la le he ne bwea aa dɛ nyɛɡle la baah ta.

¹⁷ He wer haa doa la ɡelɔ he ɛ mbarafo, dɛ chɔɡ he wejema, he nyanyini la wa. Anomanta, n taɡɛ ta harɛ a wa, ásɛ koranar na a ja ba.

¹⁸ He wechɔɡa ne kasinteŋ bɛ dii he bona dii ta ɡelɔ he kpɔ doŋa kah deene haa dɛ tomɛ a bini. A waa n ɡel nii ba le bwɛjen la ta, dɛ fuh o bwa dɛɛboo. Nomɛlbwa na ɡɛ bwɛjen la aa fuah dɛ berɛ tɔɔ.

¹⁹ Harɛre nɛra baa jemɛ bwa bwara yɔr he wa, he chɔɡɔ aa wola were kwara, baa hen na kpa.’ ”

Korowii bol bwɛjen Sidon tena chɔɡa wa

²⁰ Korowii bol waa men Ɛsekeɛl be ŋɔ,

²¹ “Nɛwɛnyini bie, eɡle sie ta bwɛjen Sidon dɛ́ bol waa aa dɛ ba o ta bala, ŋɔ

²² men Nemenɛ Korowii ŋɔ, ‘Bwɛjen Sidon, n ne he dɔɔ. He nɛɛ mɛɛ ba cheɡa dɔ jirima. He nɛra ɛɛ jemɔɔ kɛŋɔ menee Korowii ɡɛ saŋ maa ba tɛr ba deŋne, dɛ́ baɡle kɛŋɔ n do ɡoroŋ la.

²³ Mɛɛ kpɔ weechɔɡaa ba ta he nɛɛ dɛ́ ɡel chal ɛɛ palɛ he fɔɡbaahna. Nɛra ɛɛ serewoo chɔ bobɛlbwa, keri nee baa ba ba kpoora, ásɛ he jemɛ kɛŋɔ menee Korowii.

²⁴ Bwɛɛre aa bar Israel cheme, ba ne baa wola somɛ, baa lii ba ne wechɔɡa, dɛ do kɛ jabalnadaŋɛre ne sɔɔhne tɛɛ ba la aa lee do kpa. Baa jemɔɔ kɛŋɔ menee Nemenɛ Korowii.’ ”

²⁵ Nemenɛ Korowii ŋɔ, “N baa boa Israel tena maa lɔ ba peɡre harɛre ta bwa nyoa tonaa, harɛre nɛra bwa ɛɛ jemɔɔ kɛŋɔ n do ɡoroŋ. Israel tena ɛɛ so ba ɡbaɡba harɛ maa kpɔa tɛ n bonɔɔ Jekɔb la taa.

²⁶ Baa so deŋnesɔɔhna taa, dɛ́ do deene, dɛ́ parɛ daa kooni. Mɛɛ tɛr nɛra baa ɛɛ ba hɔhɔrɔwa la deŋnee, ásɛ Israel tena dɔ ba te. Ásɛ ba jemɛ kɛŋɔ menee Korowii baa dɛ tom mɛ la.”