Ɛsekeɛl 27 - mzwDBL

Bwɛjen Taaya wiile

¹ Nemenɛ Korowii ŋɔ men Ɛsekeɛl be ŋɔ,

² “Nɛwɛnyini bie, taa wiile tɛ bwɛjen Taaya,

³ ŋɔ bwɛjen waa lɔ mpo nyoa dɛ ɛ bonadibɔr tɛ nɛra baa lɔ mpo nyoa bobɛlbwa be ŋɔ men Nemenɛ Korowii ŋɔ, ‘Bwɛjen Taaya, he ŋɔ he wer ka tonɛ.’

⁴ Mpo nyoa he do. Nɛra baa vɔrɔwe ɡelɔ he do wer kohona kɛŋɔ stiimae.

⁵ Hɛmɔn Bwejen taa ba le dakpeɡa ne dɛ ba kwaare. Dɛ le peleme daa ne Lɛbanɔn dɛ ba kwaa dajaŋ yal waa baŋre he ta la ta.

⁶ Dajenaa ba kpɔ le Basan harɛ ba ɛ he ŋwandaa, dɛ kpɔ dakpeɡa ane ɡe le Saepros, ne bala nyena, dɛ ba kwaa he bini, he do wer.

⁷ Ijipt harɛ taa ba kpɔ ŋwɛndɛɛɡe sɔh yapondɛɛɡe waa baŋre he doa dɛɛ kaa he ne la, dɛ berɛ kpɔ ane ɛ he fraŋkaa. Saepros ekwi harɛ taa ba le yaburum ne oŋkɔl waa wera ne, a tɔ he nɛɛ dɛɛ tɛɛ chunchule.

⁸ Bwɛjena Sidon ne Aavad baalaa dɛɛ tawɛ. He ɡbabir nɛra baa dɔ he wejemaa jaa dɛɛ nyiŋi he nɛ.

⁹ Nɛmbena baa jemɛ stiimaere kwaara kɛrɛdɛ le Beblɔs, dɛ ja ba nɛ. Nɛra baa le bobɛlbwa dɛ kpɔ stiimae dɛɛ kpɔ mpo ta balɔ ba ne hɛɛ di bona.

¹⁰ Pɛɛsea ne Lidia dɛ Put harɛre baalaa ɛ he laa tena. Ba kpɔ kwaa baa kpɔa dɛɛ tɔ ba te ɡbemɡbe, ne buni ɡbɛrɛre saɡɛ he danjwɛɛre ta, dɛ ɡel he dɔ sɔn ne jirima.

¹¹ Bwɛjen Aavad ne Helɛk harɛ baalaa dɛɛ nyiŋi he danjwɛɛre ta, asɛ Gamad baala ɛɛ daah he dejaŋa ta. Ba kpɔ kwaa baa kpɔa dɛɛ tɔ ba te ɡbemɡbe saɡre he danjwɛɛre ta, dɛ ɡel he do wer ka tonɛ.

¹² He kondɔɔh kohona nomanta, bonadiire le Taases dɛ kpɔ suuɡapoŋa ne bune dɛ kpana, dɛ baa charɛ kwaa he be.

¹³ Bonadiire baa le Tubal ne Mɛsɛk dɛ Grik tena harɛre, kpɔ kwaa baa kpɔ ayaawa ɛa ne yoma ba charɛ he laala.

¹⁴ Bonadiire baa le Bɛt Toɡama kpɔ jaɡre baa dɛ ɛ a ne toma, ne anɔ la baa dɛ la a ne laa, dɛ keeɡo neenanar ba charɛ he laala.

¹⁵ He ne baala baa le Roods di bona. He ne nɛra kɛrɛdɛ baa soɡe mpo nyoa ɡe di bona. Ba kpɔ bala nyena ne dadɛɛɡa ba charɛ kwaa he be.

¹⁶ Siiria harɛ ta tena ne he di bona kwaa haa dɔa kohona nomanta. Ba kpɔ bwedɛɛɡa aa ɛ burum baa yera tɛɛkoes, ne bweswɛɛma ane baa dɛ yera rubire, ne koral aa le mpo bini, ne yakɔle, ne kwaa baa sɔah, ne yapondɛɛɡa, dɛ ba charɛ he laala.

¹⁷ Juda tena ne Israel tena ne he di bona. Ba kpɔ mea ne tohno ne ɔleve no, dɛ konsɔɔhsoma baa dɛ fɔɡla ba charɛ laala he be.

¹⁸ Damaskɔs tena ne he di bona kwaa haa dɔa kohona la wa. Ba kpɔ sen le Hɛlbɔn, dɛ pee pona ɡe le Saha ba charɛ laala he be.

¹⁹ Dan dea tena ne Grik tena baa le Usal kpɔ bune baa ɡuɡra dɛ choŋra, ne kalamus a sɔɔh a soma dɛ ɡel kondikwa ɛɛ do som, ba charɛ laala he be.

²⁰ Dedan tena ɡe kpɔ yale baa kpɔa dɛɛ dawɛ jaɡre nɛɛ dɛɛ so a ta, ba charɛ laala he be.

²¹ Arab tena ne Keda harɛ ta koranar ne he di bona. Ba kpɔ pebiiri ne pebala dɛ boohna ba charɛ laala he be.

²² Seeba tena ne Raama tena ne he di bona. Ba kpɔ konsɔɔhsoma bwa soo siwi aa wera kɛrɛdɛ ne bwedɛɛɡa a yoɡ aa kpeɡa, dɛ suuɡaswɛm ba charɛ laala he be.

²³ Bwɛjena ane baa dɛ yera Haran, ne Kanɛ, ne Eden, ne Seeba, ne Assur dɛ Kelmad ne he di bona. Ba kpɔ laala ba charɛ kwaa he be.

²⁴ Ba yoɡ yadɛɛɡa a yoɡ aa kpeɡa tɛɛ, yakɔle ne kwaa baa sɔah, ne kondɛɛɡa baa kpɔa dɛɛ pa harɛ dea, ne jisedɛɛɡa dɛ ɡboɡbie.

²⁵ Bwɛjen Taases stiimaeree dɛɛ kpɔ he laala. He do kɛŋɔ stiimae waa lɔ mpo ta dɛɛ che bontɔɡa.

²⁶ Dɛ baala baa dɛ tawɛ la, tawɛ kaa mpo baah ta naa, peu ɛɛ tao le wee leebɔr dɛ́ ba paɡre.

²⁷ He kondɔɔh ne laala haa dɛ di a bona bwa, nɛra baa dɛ ɛ toma stiimae la bini bwa, nɛra baa dɛ kwaaro ne bonadiire, dɛ laa tena te bwa baa lɔ o bini bwa sekwaraa ɛɛ morɔɔ, awola tɔpere stiimae la aa paɡre la.

²⁸ Mpo nyoa harɛ ɛɛ jiɡruu, nɛra baa dɛ nyiŋi stiimae la ta aa dɛɛ wi la.

²⁹ Nɛra baa kpoŋe ŋwandaa la bwa ɛɛ le ba stiimaere binii, ásɛ nɛra baa dɛ nyiŋi a ta bwa le ba che baŋ.

³⁰ Baa dooɡe lɔŋɔree dɛ́ wi kohona tɛɛ, dɛ́ kpɔ teera do ba nyuune ta dɛɛ ɡbili tɔɔ ta.

³¹ Baa koh he waa fonɛ ba nyuune, dɛ́ kpɔ lweyale tɔ. Baa wiu kohona tɛɛ lokua ne.

³² Baa wi dɛɛ tɛɛ la, baa taa wiilee tɛɛ ŋɔ, ‘Umee ya kpɔ bwɛjen Taaya maɡɔɔ? Mpo bɔle o ta o hel.’

³³ Haa kpɔ he laala haa dɛ di a bona kpɔ mpo ta la, he ɡelɔ harɛre tena na som. He ɡelɔ harɛ nɔ ta koranar che he kondɔɔh kohona, ne laala haa dɛ di a bona ta dɛ dɔ ba te.

³⁴ Taraken, he paɡrɔ mpo ta, dɛ chɔ vil bini. He laala haa dɛ di a bona ne he toma tena bwa ja he nɛɛ mpo bini.

³⁵ Nomɛlbwa waa soɡe mpo nyoa bwara yɔr he wa. Hale ɔmee chole ba koranar nɛɛ kohona. Ba siebɔra nya bena.

³⁶ Bonadiire baa lɔ harɛre ta dɛ chweere, he paɡrɔ aa wola were, he waa tonɛ kwaraa.”