Ɛsekeɛl 26 - mzwDBL

Korowii bol bwɛjen Taaya tena chɔɡa wa

¹ Bene fi dɛ beŋkpoŋ, korobiloɡle tɔpere waa tɔ sie baa lawɛ yaa laa ta kaa bojaŋ harɛfale ta la, Korowii bol waa men Ɛsekeɛl be ŋɔ,

² “Nɛwɛnyini bie, bwɛjen Taaya tena dɛ do silɛɛ lɔŋɔre ŋɔ, chwaasere, bwɛjen Jerusalam chɔɡɔ! Belaa bonadiire bwa ɛɛ la, waa chɔɡa nɔ, yaa do werii name.

³ Anomanta, Nemenɛ Korowii ŋɔ, ‘Taaya tena, n ne he dɔɔ. Mɛɛ ɡeloo harɛre nɛra wur bá tɔ he nɛɛ kɛŋɔ mpo nehɛma ken dɛ́ yo heya.’

⁴ Baa chɔɡ danjwɛɛ waa bar bwɛjen Taaya la bwaa, dɛ́ kuuɡi dejaŋa ɡe bwa. Mɛɛ ɡbaa teɡaŋa ne bwekuŋe bwaa le harɛ la ta, á ka bwetal ɡbo.

⁵ Bela ɛɛ berɛ bɔr nɛra aa dɛɛ ɛ nee toma mpo taa, baa nyenɛ ba dɔɔhne. Harɛre nɛra ɛɛ ka pa Taaya tena laalaa kɛŋɔ laa ta kwaa ken. Men Nemenɛ Korowiirii bola.

⁶ Baa kpoo nɛra baa soɡe bwɛɛre aa lɔ harɛ la ta keri nee, ásɛ Taaya tena jemɛ kɛŋɔ menee Korowii.”

⁷ Nemenɛ Korowii ŋɔ, “Mɛɛ ɡeloo Babelɔn Kooro Nebukadnesa waa ɛ koranar bwa koojen bá yo Taaya tena. O ne o laa tena ɛɛ warɔɔ le weekaŋle nyunduabɔr, bane valɛ, bane so jaɡre ne kwaa aa do kɛ torɔɡore baa vɔwa pɛl jaɡre ta, dɛ́ ba yoo ba.

⁸ Mɛɛ ɡeloo ba kpoo nɛra baa soɡe bwɛɛre aa lɔ Taaya harɛ la ta bwa keri ne. Baa ma teeraa sawɛ ba danjwɛɛ la, dɛ́ che a ta dɛ́ kpɔ kwaa tɔ ɡbemɡbe, dɛ́ yoo ba.

⁹ Mɛɛ ɡeloo bá kpɔ dakpeɡa chuɡe ba danjwɛɛre ta, dɛ́ kpɔ dɔmkwaa chɔɡ ba dejaŋa ɡe.

¹⁰ Ba dɔma Babelɔn tena la jaɡre ɛɛ warɔɔ, a ɡel tutuɡ bɔle ba nɛ. Kwaa aa dɔ tɔre baa taɡa kɛ torɔɡo, ne anɔ la baa vɔwa pɛl jaɡre kpɔ bwɛjen la doonyoa la ta jo he be naa, a ɡbɔɡa ɛɛ yiiɡi danjwɛɛ laanee.

¹¹ Baala baa soɡe jaɡre ta la ɛɛ kpɔ jaɡre laanee kpɔ fɔɡbaahna dɛɛ kpoo nɛra keri ne, ásɛ ba pilajena bwa ɡe kuuɡi.

¹² Dɔma la ɛɛ pa Taaya tena kondɔɔh ne kwaa baa dɛ di a bona bwaa. Baa taɡɛ ba danjwɛɛre bwaa ta, dɛ́ kuuɡi ba dedɛɛɡa ɡe bwa, ásɛ dɛ pa a bwekuŋe ne daa, dɛ teɡuŋe bwa ka ta mpo ta.

¹³ Mɛɛ ɡeloo he yela ne janjela sii bwa ba a jaɡa. Bɛlbwa aa a waa no kpa.

¹⁴ Mɛɛ ɡeloo bwɛjen la bwetal la ɡbo ka, ásɛ nɛra baa dɛ ɛ nee toma la ɛɛ nyenɛ ba dɔɔhne o ta. Baa won kwaa vɔrɔwe bwɛjen Taaya kpa. Men Nemenɛ Korowiirii bola.

¹⁵ Men Nemenɛ Korowii berɔ bol bwɛjen Taaya tena waa ŋɔ, ‘Ba yo heyaa dɛ pɔ he nɛɛ tonɛ aa, nɛra baa soɡe mpo nyoa la ɛɛ ɔmɔɔ taeh, lɔŋɔre nɛra baa dɛ kpoo ba la aa dɛ dooɡe la wa.

¹⁶ Koranar baa lɔ mpo nyoa la bwa ɛɛ ir ba kookane taa, dɛ́ foo ba koolaala ne ba laala baa sɔh kwaa dawɛ a taa bil. Baa dɛɛ ɔmɔɔ kohona he wa, dɛ́ so harɛ bochela ne.’

¹⁷ Baa taa wiilee ŋɔ, ‘Ba chɔɡ bwɛjen o sɔn aa lea la. Ba pa o stiimaere bwa le mpo ta kaa. A ɡɛ nɛra baa soɡe bwɛjen nɔ ta laanee dɛɛ di kpeɡri mpo ta, dɛɛ aah nɛra baa soɡe o nyoa la.

¹⁸ Awola bwɛɛ la aa paɡra la, nɛra baa soɡe mpo nyoa ne ekwie ta la ɔmɔ, ba bwara yɔr a wa.’ ”

¹⁹ Nemenɛ Korowii ŋɔ, “Mɛɛ ɡeloo bwɛjen Taaya chɔ pɛɛ kɛŋɔ bwɛjena aa paɡra nomɛlbwa aa wola toole a ta, dɛ́ kpɔ mpo ba tɔ o ta ó ka vil ta.

²⁰ Mɛɛ kpɔ bwɛjen Taayaa ka ja lala bini, o ka pu saŋ la tena baa serewa la. Mɛɛ ɡeloo o ka so bela kɛŋɔ bwɛɛre a fa aa paɡra la, o ne nɛra baa serewa biɡri la so. Waa won ba harɛ nɔ ta weera bini kpa.

²¹ Mɛɛ ɡeloo o chɔɡ kwaraa, o waa tonɛ. Nɛra ɛɛ dɛɛ nyin o bɔree, baa on na kpa bwa. Men Nemenɛ Korowiirii bola.”