Ɛsekeɛl 25 - mzwDBL

Korowii bol Amɔn tena chɔɡa wa

¹ Korowii bol waa men Ɛsekeɛl be ŋɔ,

² “Nɛwɛnyini bie, eɡle sie dɛ kah Amɔn tena, dɛ́ bol waa aa dɛ ba ba nɛɛ bala.

³ Ŋɔ ba be ŋɔ bá cheɡ deŋne dɛ́ no waa men Nemenɛ Korowii aa dɛ bol, ‘He sie lɛo kɛŋɔ baa kpɔ doŋa kah n Dea dɛ chɔɡ Israel harɛ bwa, dɛ lawa baa lawɛ Juda tena laa ta kaa bojaŋ harɛfale ta la.

⁴ Anomanta, mɛɛ ɡeloo nɛra le wee leebɔr bá yo heya, dɛ́ pɔ he nɛ. Baa baŋre ba tɛnte deene he harɛ taa dɛ́ so, dɛ́ di he daa nɔna, dɛ́ nyɔ he kondɛɛra elne.

⁵ Mɛɛ ɡeloo bwɛjen Raba berɛ nyoɡmare dibɔr, ásɛ Amɔn harɛ bwa ɡe berɛ peera chɔɔbɔr. Hɛɛ jemɔɔ kɛŋɔ menee Korowii.’

⁶ Nemenɛ Korowii ŋɔ, ‘He sie lɛo kohona he lɔ kpaŋa dɛ jah dɛɛ hɛɡre, liichɔɡa haa dɔa Israel harɛ chɔɡa wa.

⁷ Anomanta, n nɔn dawɛ he nɛ ń tɛr he deŋne. Mɛɛ kpɔ heyaa do harɛre nɛra nɔɔra ta kɛŋɔ baa pa laala laa ta kaa ken. Mɛɛ chɔɡ he bwaa kwara, haa wola warɛ dɛ́ tel harɛbir nɛra kpa. Hɛɛ jemɔɔ kɛŋɔ menee Korowii.’ ”

Korowii bol Moab tena chɔɡa wa

⁸ Nemenɛ Korowii berɔ ŋɔ, “Moab harɛ tena aa ŋɔa ŋɔ Juda harɛ tena do kɛŋɔ harɛre nɛra aa kaa la nomanta,

⁹ mɛɛ ɡeloo nɛra ba yo bwɛjena aa lɔ Moab jwɛh ta dɛ lɛo dɛɛ ta la. Bwɛdɛɛɡa ane kɛŋɔ Bɛt Jɛsemɔt ne Baal Meɔn dɛ Kiriataim bwa jao.

¹⁰ Mɛɛ kpɔ Moab harɛ ne Amɔn tenaa do nɛra baa le wee leebɔr nɔn ta, ásɛ Amɔn tena sɔn he kwaraa.

¹¹ Mɛɛ tɛr Moab tena deŋnee, ásɛ ba jemɛ kɛŋɔ menee Korowii.”

Korowii bol Edom tena chɔɡa wa

¹² Nemenɛ Korowii berɔ ŋɔ, “Edom tena yoi baa kaa yo Juda tena bandia ne, dɛ tɔ ba wel la nomanta, a ɡelɔ ba di bolchɔɡe kohona,

¹³ anomanta, men Nemenɛ Korowii ŋɔ, ‘Mɛɛ kpɔ nɔnee dawɛ Edom tena nɛɛ dɛ́ tɛr ba deŋne, ásɛ dɛ kpoo nɛra bwa ne ba kondɛɛra. Mɛɛ ɡeloo harɛ la chɔ pɛɛ le bwɛjen Teman dɛ́ ka le bwɛjen Dedan, ásɛ ba kpoo nɛra laa ta.

¹⁴ N nɛra Israel tena ɛɛ yo Edom tenaa dɛ́ tɔ n wel. Baa ɡeloo Edom tena na n bandia kohona, dɛ́ jemɛ kɛŋɔ menee tɔ ba wel. Men Nemenɛ Korowiirii bola.’ ”

Korowii bol Filisti tena chɔɡa wa

¹⁵ Nemenɛ Korowii ŋɔ, “Filisti tena aa ɛ Juda tena dɔma biɡri nomanta, ba dɔ liichɔɡa dɛ kpɔ nyubinikpeɡ ka tɔ ba wel Juda tena nɛ, dɛ chɔɡ ba.

¹⁶ Anomanta, n ŋɔ mɛɛ ka yo Filisti tenaa dɛ́ kpoo ba bwa le harɛ la ta. N dɛ ba nɛra baa kaa dɛ so mpo nyoa la bwa chɔɡa.

¹⁷ Mɛɛ kpɔ bandia kohonaa ka tɔ ba nɛɛ dɛ́ tɛr ba deŋne kohona bɔ kem. Ásɛ ba jemɛ kɛŋɔ menee Korowii.”