Ɛsekeɛl 24 - mzwDBL

Vii baa kpɔa dɛɛ daa kwaa wa

¹ Baa lawɛ yaa laa ta kaa Babelɔn bene anuanaarɛ, korobie fi tɔpera fi ta habɔɔ la, Korowii bol waa men Ɛsekeɛl be ŋɔ,

² “Nɛwɛnyini bie, bɔ fini tɔpere nɔ deeti bil, dɛkalkɛŋɔ Babelɔn kooro kpɔ o laa tena dɛɛ ba ba tɔ Jerusalam tena do fini.

³ Kpɔ sɛɡla bol waa chaɡle Israel deŋnekpeɡ tena la be ŋɔ, men Nemenɛ Korowii ŋɔ, ‘Hé ɛ nee do vii bini, dɛ́ kpɔ chɔŋɛ nii ta.

⁴ Lawɛ pee waa wera dɛ́ chɛwɛ o ola do o bini, hé pa andɛɛɡa la, a vaama ne a hwie. Kpɔ hoɡa bɔra aa wera ɡe ja a ta.

⁵ Kpɔ pee ola la bela aa wera kɛrɛdɛ. Mar nii dɛ́ pa ola la do vii la bini, dɛ́ kpɔa chɔŋɛ nii ta.’

⁶ Nemenɛ Korowii ŋɔ, ‘Bwɛjen Jerusalam nɛŋkpoa aa lɔ o ta kohona la bwɛɛlɛ. O do kɛŋɔ vii o bini aa deera ken, o doŋa la aa wola le. Tɔɔ ola baa chɛwa do o bini la beŋkpoŋa beŋkpoŋa le ó chɔ pɛɛ.

⁷ Ba kpoo nɛra bwɛjen la ta, ba chale chɔ bwea ta, harɛpɛɛ ta laa a chɔ, ásɛ teera tɔ a ta.

⁸ N ɡelɔ chale la chɔ ɡɛ ba ta a ta tɔe, ásɛ n naa n baah di kohona, dɛ́ yoo ba bɔ kem.’

⁹ Anomanta, Nemenɛ Korowii ŋɔ, ‘Bwɛjen nɛŋkpoa aa lɔ o ta la bwɛɛlɛ. N ɡe ɛɛ pa damaraa bil a daŋɛ.

¹⁰ Hé pa daa ba ja kohona ásɛ dɛ huuh nii do a ta. Hé daa ola la kɛrɛdɛ, dɛ́ do kwaa a ta a do som, hé fuh hoɡa la.

¹¹ Hé kpɔ buni vii ɡbo chɔŋɛ ninhɔla ta, dɛ́ ka tel kɛŋɔ waa bea dɛ swɛɛ, ásɛ doŋa bɛlbwa aa lɔ o bini la fuh, ó berɛ do wer kohona.

¹² N ɛ wobɛlbwa dɛ ba kahonɛ, doŋa aa wara dɛ do o bini la ta wone le. Hale nii la ta wone le a ne.

¹³ Jerusalam tena, he wedoŋa la ɡelɔ he kah doŋa. N takapɔ kɛŋɔ ń laa he doŋa bwa kpɔ he nɛ, kɛ n ta wone. Aa won le he nɛ, nemenɛ haa na n bandia kohona la bwa mɔɔ.

¹⁴ Men Nemenɛ Korowii bola. Saŋ telo kɛŋɔ ń ɛ waa maa ɛ name. Maa sie laa kpɔ he wechɔɡa ta, maa he sum ɡee na. Hɛɛ dɔ deŋnetɛraa, waa haa ɛa la wa. Men Nemenɛ Korowiirii bola.’ ”

Ɛsekeɛl haah seo

¹⁵ Korowii berɔ bol waa n be.

¹⁶ O ŋɔ, “Nɛwɛnyini bie, n dɛ ba nɔn uma lɔ nɛn haa dɛ nyinu kohona la dɛ́ kpoo. Bɛ waane bol kɛɛ dɛ́ wi.

¹⁷ Wi dɛɛ do he bini. Bɛ wi tɛ lale la, bɛ nakpapɛɛ valɛ, bɛ yal waa vɔwɛ he nyu ta laa kpɔ á baɡle kɛ he dɛ ɛ lwe. Bɛ kon kpɔ tɔ he nyoa, bɛ kondikwaa nɛra baa dɛ ɛ lwe aa dɛ di la ane di.”

¹⁸ Men Ɛsekeɛl, n bol waa nɛra la be chɔɔbɔr, asɛ jɔmɔra la n haah sewɛ. Tɔɔ aa pera chɔɔ la, n ɛ ɡɛ Korowii aa do mɛ la.

¹⁹ Belaa nɛra la bɔɔ mɛ ŋɔ, “Haa won baɡle yaa a ɡɛ waa nɔ mun aa?”

²⁰ Asɛ n ŋɔ ba be ŋɔ, “Nemenɛ Korowii ŋɔ ń bol he Israel tena be kɛŋɔ,

²¹ o dɛ ba o Dea haa dɛ ɛ mbarafo dɛɛ maŋkura he te o waa la chɔɡa. O wer he sie ta hɛɛ nyinu. Wɛɛ ɡeloo ba kpoo he bibaala ne bihaahna haa ɡel ba habɔɔ Jerusalam la laa ta.

²² Hé ɛ ɡɛ maa ɛa nɔ. Haa kwaa kpɔ tɔ he nyoo, haa kondikwaa nɛra baa lɔ lwe ta aa dɛ di la ɡee di.

²³ Hɛ́ ɡel yapondɛɛɡa la vɔwɛ he nyuune, hé do naŋɡaware, dɛ bɛ wi, hɛɛ ɡwaŋɔɔ he wechɔɡa nɔ wa, bɛlbwa sɔh dɛɛ wi.

²⁴ Hé nyiŋi men Ɛsekeɛl dɛ́ kpɔ hweli wa, dɛ́ ɛ ɡɛ maa ɛa la. Anee dɛ́ ɡel he jemɛ kɛ onee Nemenɛ Korowii.”

²⁵ Korowii ŋɔ, “Nɛwɛnyini bie, mɛɛ chɔɡ n Dea baa dɛ ɛ mbarafo o waa o do wer ba siwi ta, ba sie ɛɛ lɛ o ta laanee. Mɛɛ lawɛ ba bibaala ne ba bihaahna bwa ɡee ja.

²⁶ Awola tɔpere maa ɛ ɡɛ waa nɔ la, nɛn waa wona le a nyoa la ɛɛ bao, dɛ́ ba bol a waa baɡle.

²⁷ Awola tɔpere la, mɛɛ ɡeloo he berɛ won waa bola, ásɛ he ne naate bol wa. Gɛɛ aa ba ɛɛ ba nyiŋi dɛ́ kpɔ hweli waa dɛ́ jemɛ kɛŋɔ menee Korowii.”