Ɛsekeɛl 23 - mzwDBL

Bitoli banɛ bane jwamane wa

¹ Korowii bol men Ɛsekeɛl be ŋɔ,

² “Nɛwɛnyini bie, bihaahna banɛ bane ba bwa aa le nya beŋkpoŋ waa nɔ.

³ Ijipt harɛ taa ba so, dɛ le ba toli saŋ kpɔ bannyin dawɛ ba sie ta, dɛɛ bɔ jwamane.

⁴ Nomoa la sɔne Ohola, asɛ bechala la ɡe sɔne Oholiba. N haahnaa ban, ba loɡle bibaala ne bihaahna tɛ mɛ. Ohola cheɡɔ tɛ Samaria asɛ Oholiba ɡe che tɛ Jerusalam.

⁵ Ohola le n habɔɔ, dɛ kaa teŋɛ Asiiria baala nɛ.

⁶ Ba ɛ laa tena dɛ do laala burum, dɛ ɛ harɛ la nomonjena ne laa nomonome baa wera bonɔɔna dɛɛ yo jaɡre ne.

⁷ Ohola kpɔ o te tɛ Asiiria nomonome la bwa dɛɛ bɔ jwamane. A che a ta o kaa tomɛ ba voɡare dɛ kah doŋa.

⁸ O teŋɛ jwamane waa pa a mun Ijipt harɛ ta la ta, dɛ chɔɡ o te. O toli saŋ bwaa o le baala lawɔ dɛɛ chɔ.

⁹ Anomanta, n vɛoh tɛ Asiiria baala waa dɛ pɛlɛ ba nɛɛ kohona la.

¹⁰ Ba wur Ohola laala o che mumɡbal, dɛ lawɛ o bibaala ne bihaahna bwa kaa, dɛ kpoo kere ne. A ɛ waa dɛ chɔ le haahna bwa ɛɛ bol o wa.

¹¹ O nime Oholiba na ɡɛ waa nɔ bwa, kɛ dɛ ɡarɛ bɔ jwamane ɡwaa o nahaah la kwara.

¹² Asiiria harɛ nomonjena ne laa nomonome, baa do laala aa wera dɛ do wer bonɔɔna, dɛɛ yo jaɡre ne nɛɛ o ɡe ka teŋɛ.

¹³ N nao kɛŋɔ dɛ ɡɛɛ o ɡe do, o da deno doŋ kɛŋɔ o nahaah la.

¹⁴ Oholiba ta ɡelɛ a maɡre bela. O na Babelɔn tena fotore baa kpɔ konswɛɛma ɛa a dawɛ danjwɛɛ ta,

¹⁵ ba ɛ banyoola baa vɔwɛ kirisore dɛɛ yo jaɡre ne, dɛ kpɔ yapondɛɛɡa vɔwɛ nyuune.

¹⁶ Waa na ba la, o jwamanwaa la den ir, asɛ o tomɛ toroma ba be Babelɔn harɛ ta.

¹⁷ Baala la le bela ba o be, dɛ ba lawɔ chɔ. Ba chɔ o ne chɔ chɔɡa hale a ba peo.

¹⁸ Bɛlbwa na o we-ɛɛla kɛŋɔ o ɛ hanjwamane. N baah diu n vɛoh ɡɛ maa vɛh o nahaah la.

¹⁹ Oholiba ta ɡelɛ a maɡre ɡɛ, o teŋɔ bɔ jwamane ɡɛ o toli saŋ o fa aa lɔ Ijipt harɛ ta la.

²⁰ Dɛ baala baa won haahna chɔe, ba pena do kɛŋɔ keeɡore kɛɛ jaɡ-bala penaa wɛɛ nyin name.

²¹ Oholiba, ɡɛɛ a do he lii he toli saŋ haa lɔ Ijipt harɛ ta dɛɛ pɛlɛ baala nɛ. Baala jaɡre he ela a bwa sɔɔh.

²² Anomanta, men Nemenɛ Korowii dɛ bol hen Oholiba be ŋɔ, ‘Mɛɛ ɡeloo baala ba wa aa pee la baah di he nɛ, dɛ́ le baŋ bɛlbwa, dɛ́ ba bare cheme.

²³ Baala baa le Babelɔn ne Asiiria dɛ Kaldea tena baa lɔ Pɛkɔd ne Soa dɛ Koa bwa ɛɛ ba he bee. Mɛɛ boa laa nomonome baa wera bonɔɔna, ne harɛ la ta nomonjena, ne laa nomonome baa soɡe jaɡre ta dɛɛ yo la bwa nyoaa, ba ba he be.

²⁴ Baa kpɔ dɔmkwaa le weekaŋle nyunduabɔree, dɛ́ so torɔɡore baa vɔwa pɛl jaɡre, ne anɔ la aa dɔ tɔre baa taɡa kɛ torɔɡo warɛ kohona dɛ́ ba yo. Baa le bobɛlbwaa dɛ́ ba bare, dɛ́ kpɔ kwaa tɔ ba te ɡbemɡbe dɛ́ pi laa ɡbɛrɛre. Mɛɛ kpɔe do ba nɔn ta ásɛ ba tɛr he deŋne.

²⁵ N baah aa di he nɛɛ kohona nomanta, mɛɛ ɡeloo ba kpɔ bandia doe sibeɡra kohona. Baa teŋe he mee ne deŋnaa ta, dɛ́ lawɛ he bibaala ne bihaahna kaa, dɛ́ fuh banɔ la baa kaa la.

²⁶ Baa wur he laala bwaa, ásɛ dɛ kpɔ suuɡaswɛm kwaa haa dɛ doa baŋa ne nɔɔra la.

²⁷ Gɛɛ mɛɛ ba he ɛɛ, dɛ́ ba he jwamanwaa haa pa a mun Ijipt harɛ la ne a jaɡa. Haa voɡa la kɛɛ Ijipt harɛ ta wobɛlbwa waa liira ba kpa.’ ”

²⁸ Nemenɛ Korowii ŋɔ, “N dɛ ba he kpɔe do nɛra ba wa aa pee he hah ba la nɔn ta.

²⁹ Baa haeh nomanta, baa pa he komɛlbwa haa dɔa bwaa kaa, ásɛ he ka che mumɡbal, nɛra bwa nae kɛŋɔ hanjwamane. He pɛlchɔɡa ne jwamanee

³⁰ ba anɔ bwa ne ba tɛɛ. Harɛre nɛra bwa bee he bɔ jwamane ka tel, dɛ teŋɛ ba voɡare nɛɛ dɛ kah doŋa.

³¹ Ŋwɛnɛ he nahaah aa kpɔ o ta laanee he ɡe kpɔ, anomanta, hɛɛ nyɔ o deŋnetɛra nee la anee.”

³² Nemenɛ Korowii ŋɔ, “Gɛ maa tɛr he nahaah deŋne kohona laanee mɛɛ ba he ɛɛ. Nomɛlbwa ɛɛ mamɛɛ dɛ́ muɡli he baah, dɛkalkɛ deŋnetɛra la kan kohona.

³³ Hɛɛ dɛɛroo kohona dɛɛ di suna. Deŋnetɛra waa do ɔma dɛ chɔɡ he nahaah waa cheɡa tɛ Samaria laanee hɛɛ ba dɔe.

³⁴ Hɛɛ nyɔ deŋnetɛra nee la bwa kpɛlɛŋŋ, dɛ́ kpɔ nɔn lɔ ela dɛɛ di suna. Men Nemenɛ Korowiirii bola.

³⁵ Kenii men Nemenɛ Korowii ɛɛ bol hen Oholiba be. Haa soh n waa dɛ berɛ habɔɔ kpo mɛ nomanta, hɛɛ dɔ deŋnetɛra he pɛlchɔɡa ne he jwamane la waa.”

³⁶ Korowii ŋɔ n be ŋɔ, “Nɛwɛnyini bie, hɛɛ bol Ohola ne Oholiba waa dɛ́ pa ba bolchɔɡe aa? Di ba kasinteŋ waa maa kia ba ɛ la wa.

³⁷ Ba bɔ jwamane dɛ kpoo nɛra ɡe ja. Ba le n habɔɔ dɛ kaa tomɛ voɡare, dɛ kpoo bii baa lol ba tɛ mɛ. Ba kpɔ ba ɛ saraha voɡare ta, dɛ fuuh ba.

³⁸ A ɡbo laa. Ba kpɔ doŋa kah n Dea la dɛ vɛh n Ona Tɔpera dii.

³⁹ Awola tenten baa kpɔ ba bii tɛ ba kpoo ba voɡa ta tonɛ la, ba baa jo n Dea dɛ kpɔ doŋa kaoh.

⁴⁰ Ba dɛ tomɛ toroma ba ka yerɛ baala le bojaŋa ba. Ba balaa, ba yon sɔ ne, dɛ́ kpɔ kwaa pe ba siebɔra, dɛ́ kpɔ suuɡaswɛm kwaa do ba baŋa ne ba nɔɔra.

⁴¹ Ba yon so kane aa wera ta, asɛ teebur che ba sie, ba kpɔ daawiile a sɔɔh aa soma, ne ɔleve noo aa ɛ n kwaa la chɔŋɛ o ta.

⁴² N dɛ no nɛra baa wara dɛ di kwaa dɛɛ lɛ ba sie ɡbɔɡa. Ba ɛ baala baa le ba ne pua hɛŋle ɡbo harɛ ta. Gɛ baala la kpɔ nɔnloɡa do haahna la, dɛ kpɔ haŋkoo-ɡbɛrɛre aa wera pi ba.

⁴³ Belaa n bol haah jwamane wa aa peo la waa ŋɔ, ‘Hé lawɔ ka chɔ, o ɛ jwamane te wubwa.’

⁴⁴ Baala la teŋɔ la Ohola ne Oholiba baa ɛ jwamane tena la be, ba ne ba ka chɔ.

⁴⁵ Nɛra ba wa aa toɡra ɛɛ tɛr ba deŋnee ba jwamane ne nɛra baa kpoora la waa, dɛkalkɛ ba di bolchɔɡe a ta.”

⁴⁶ Nemenɛ Korowii ŋɔ, “Nɛ́nlaa wur ba, dɛ́ ba tɔ ba nɛ, dɛ́ do ba sibeɡra, dɛ́ pa ba laala kaa.

⁴⁷ Nɛnlaa ɛɛ foɡ ba bweaa, dɛ́ kpoo ba keri ne. Baa kpoo ba bihaahna ne bibaalaa, dɛ́ fuh ba deene ɡe.

⁴⁸ Gɛɛ mɛɛ ba ɛɛ, dɛ́ ba jwamane ne a jaɡa harɛ la ta, ásɛ a ja haahna ba bɛ ban hweli.

⁴⁹ Mɛɛ tɛr he bwa deŋnee he jwamane ne voɡa haa toma la waa, ásɛ he jemɛ kɛŋɔ menee Nemenɛ Korowii.”