Ɛsekeɛl 22 - mzwDBL

Jerusalam tena wechɔɡa wa

¹ Korowii bol waa men Ɛsekeɛl be ŋɔ,

² “Nɛwɛnyini bie, hɛɛ bol Jerusalam nɛŋkpoa nɛra aa suu nɔ waa yaa? Bol o nɛra we-ɛɛla maa kia la waa ba be.

³ Ŋɔ ba be ŋɔ, nɛra baa kpoora dɛ teŋɛ voɡa ta, dɛ kpɔ doŋa kah ba te nomanta, ba deŋnetɛra tɔpere dɛ ba.

⁴ Jerusalam tena di bolchɔɡe ba nɛra baa kpoora la wa, dɛ kah doŋa voɡa baa ɛa la wa. Anomanta, ba deŋnetɛra tɔpere telo. A waa n ɡel harɛre ta nɛra ɛɛ mam ba dɛ bwa ɛɛ nyiŋ ba dɛɛ vah la.

⁵ Harɛre aa bɛna ne anɔ la aa lɔ bojaŋa bwa nɛra dɛ mam ba, ba wesaɡasaɡare la wa.

⁶ Na ɡɛ Israel koranar aa cheɡɛ ba ɡbaɡba kpeɡri ta dɛɛ kpoo nɛra!

⁷ Nomɛlbwa toole bwɛjen la ta dɛɛ duu o nya ne o mɛɛ. Ba dɛ faah nɛŋhɔɔhra, baa luhaahna ne bilalbii ɡe waa lii.

⁸ Ba siwii aa n kwaa aa do ɡoroŋ la su, dɛɛ chɔɡ n Ona Tɔpera.

⁹ Ba bini bane teŋe nyosone dɛ ɡel baa kpoo ba bala, bane ɡe ɛɛ di voɡa kwaa deŋɡarere ta, bane ɛɛ bɔ jwamane.

¹⁰ Ba bini bane ɡe lawɛ ba mɛɛnanar haahna dɛɛ chɔ. Bane ɡe ɡuɡri haahna ba bwara aa chɔɡa ba ne baa chɔ.

¹¹ Bane dɛ bɔ jwamane, bane ɡe lawɛ ba bii haahna, kɛɛ ba nimambii ba ne baa pɛ nya ɡbo, kɛɛ mɛɛ dɛɛ chɔ.

¹² Ba dɛ yawɛ ba bini bane sen baa kpoo nɛra. Bane ɡe dɛ́ kemɛ ba bala Israel tena suuɡa, dɛ́ chɔŋɛ a nee dɛ́ che a ta ɛ dɔɔhna. Ba soh n waa la kwara. Men Nemenɛ Korowiirii bola.

¹³ Mɛɛ lɔ kpaŋa bandia nee dɛ kooɡa ta ba nɛ, ŋwɛɛ ne nɛŋkpoa la wa.

¹⁴ Baa wono che n deŋnetɛra nyoa dɛ ta dɔ bokpeɡa awola maa ba tɛr ba deŋne la kɛɛ? N bol wa aa, n dɛ teŋɛ a ta. Men Nemenɛ Korowiirii bola.

¹⁵ Mɛɛ lɔ baa peɡre harɛre ne bwɛɛre ta, ásɛ dɛ ɡel ba wechɔɡa bwa ba a jaɡa.

¹⁶ Gɛɛ dɛ ɡel harɛre ne bwɛɛre baa kaa a ta nɛra ɛɛ nyiŋi ba nyubaahna, ba siwi aa ban tɔɡɛ, ásɛ ba jemɛ kɛŋɔ menee Korowii.”

¹⁷ Anee Korowii berɛ ŋɔ n be ŋɔ,

¹⁸ “Nɛwɛnyini bie, Israel tena waa ta tɔnɔ bɛlbwa dɔe dɛ tɛ mɛ kɛŋɔ ba yon kpɔ suuɡapoŋ do nii ta, dɛ mwɛɛlo asɛ ayaawa ne buni, dɛ kpana yon le a ta kɛ doŋa aa wola tɔnɔ dɔe la. Gɛɛ Israel tena ɛ doŋa tɛ mɛ.

¹⁹ Anomanta, men Nemenɛ Korowii ŋɔ, ‘Haa wola tɔnɔ bɛlbwa dɔe tɛ mɛ nomanta, Jerusalamee mɛɛ ba he nyoa boara.

²⁰ Gɛ ba yon mwɛɛ suuɡapoŋa ne ayaawa, ne buni dɛ kpana la, ɡɛɛ n banfuih ɛɛ ba heyaa mwɛɛla bwɛjen la bini.

²¹ Kpela, Jerusalamee mɛɛ ba he nyoa boara, dɛ́ mar nii do he lɔɡa n bandia ne, dɛ́ mwɛɛ heya.

²² Gɛ baa dɛ mwɛɛ suuɡapoŋ nii ta la, ɡɛɛ mɛɛ ba heyaa mwɛɛla Jerusalam, ásɛ he jemɛ kɛŋɔ men Korowii, n kpɔ n bandia kohona ba he nɛ.’ ”

²³ Korowii berɔ bol waa n be ja.

²⁴ O ŋɔ, “Nɛwɛnyini bie, bol Israel tena be ŋɔ ba wechɔɡa ɡelɔ harɛ la kah doŋa, anomanta, n baah diu mɛɛ ba ba deŋne tɛra.

²⁵ Ba koranar do kɛŋɔ nyujentena yon lawɛ ola dɛɛ kaa dɛɛ kɔɡre la. Ba dɛ kpoo nɛra, dɛ pa ba suuɡare ne ba kondɔɔh bwa, a che a ta luhaahna warɛ o ta.

²⁶ Sɔfore ɡe vɛh me Mmarare ta teŋa. Baa waa aa do ɡoroŋ, ne anɔ la aa wola ɡoroŋ bini peɡri. Baa waa aa wera, ne anɔ la aa wola were ɡe baɡle, dɛ ɡel n Ona Tɔpera ɡe dii, a che a ta Israel tena vɛɛh mɛ.

²⁷ Israel nomonome do kɛŋɔ ɡboli dɛɛ peeɡe ola aa kpoora la. Nɛŋkpoa taa ba che dɛɛ nyin kondɔɔh.

²⁸ Ba keamechɔɡa laa sie kpɔ ɡɛ wechɔɡa nɔ ta, kɛŋɔ baa kpɔ fula lɔ dekɔɔh danjwɛ ta, dɛ tɔ o peɡra ta ken. Ba won nyosone teŋa ŋɔ ba na waane wepila ta, dɛɛ baɡle ŋɔ waane ɛɛ bao, dɛɛ neɡre nɛra ŋɔ men Nemenɛ Korowii bee a le, dɛ n laa bol wobɛlbwa.

²⁹ Harɛ la ta, nɛra ɛɡre nɛra dɛɛ lɛ ba kwa, dɛɛ faah nɛŋhɔɔhra ne nyaara, baa waa bolɛ dɛɛ tɛɛ ba aŋwɛnɛ ta.

³⁰ N nyiŋo kɛŋɔ mɛɛ na nomɛl ba binii ó ba ma Jerusalam danjwɛɛ la bela waa kua la, dɛ́ che ba naa ta, dɛ́ lɛ bwɛɛ la ta, ásɛ n fee ɡel o chɔɡa, kɛ n ta nomɛlbwa nae.

³¹ Mɛɛ kpɔ n banfuih ba ta ba nɛɛ kohona, dɛ́ chɔɡ ba, ba waa baa ɛa la wa. Men Nemenɛ Korowiirii bola.”